Luke 4:9-32

⁹Damanina ba Satan i urabai i nae ku Jerusalem, ba yove taparoro tepanai dama i msiri ba Satan i wona, “Kom God natuna wai, nimai ki sou,

¹⁰kairavina, God wonana i kirumi i wona, God ana aneya kom kairavim ina kao tuneyisi kata sini taraparanim.

¹¹Ba kosi yarosiyai sina bokabarim, wai kaem kega ku akima kuna ravi.”

¹²Saba Iesu i kaobeyei i wona, “God wonana i wona, Bada am God kega ke raurubai.”

¹³Nikosi bai sakari ereonowasi i kakabi wai Satan Iesu i sumarei mara soena, ba ta marai yebo ina veramaga.

¹⁴Iesu Kanuma Kaoaobaisiyena ana maragatai i veramaga ku Galilee, ba warana i tuwapesari kupura ereonowana i bonuvei.

¹⁵Duwu yovesi kamosiyai i beyebeyena ba pipiya ereonowasi si kao bi gegaeni.

¹⁶Ba i nae ku Nazareth, i rakata wai ku meyagina. Ba i riu ku duwu yovena mamanina sabbath maranai i wosewosei wai rautanina. Ba i bomsiri ita baiyawa.

¹⁷Ba peroveta Isaiah ana buka si berei i botatari, ba gawara i panani memena i kiruma i wona,

¹⁸“Bada kanumina kauriku emamana, kairavina i bineiku, kata moyamoyakisi kurisi wara gairena ata botuvei. I poraiku kata patupatumisi kurisi tombaubaunisi ani yoneyonei, ba matapotapotasi sini kinana, ba bobogoyosi ana tombaunisi.

¹⁹Ba ani yonayona kata mara i botu, Bada ana pipiya ini yawasisi.”

²⁰Damanina Iesu buka i gudui ba aba saibisaibirina i bere meyei ba i makira. Ba pipiya ereonowasi duwu yovena kamonai si kita damanei,

²¹Ba kurisi i wona, “Niko God wonana ko nonori wai karaku e tuputupuwa.”

²²Pipiya ereonowasi si kao bigegaeni, ba wona kai masavisi i sisiyana wai si wareyei ba si wona, “Niko Joseph natuna kona?”

²³Saba Iesu kurisi i wona,” A kuiri niko bi maibai kona woniku kona wona, “Doctor, ki yawasa meyim! Ba yebo kona wona, awaika Capernum kamonai ku wosei wai am meyaga kamonai ke wosei kana kinani.

²⁴Ba Iesu i wona abi suwonimi, “Peroveta ana meyaga dama biyisi sina kao sirei.

²⁵Abi suwonim kata Elijah ana marai kega i kusana bodu tonu ba nawaravi six, ba gomara kaikapona dobu ereonowana i yauni. Kona maranai, Israel kamonai sobesobere pesarisi si mamana,

²⁶saba God Elijah i porai kega kesana meo sobere kurina, ba sobere kesana, Zerephathyai, Sidon kupurina kamonai i mamana wai kona wata kurina.

²⁷Ba peroveta Elisha ana marai, Israel kamonai pipiya pesarisi lepa gubagina si yauni, ba kega kesana i yawasi, saba Naaman Syira biyina wata i yawasi.

²⁸Pipiya ereonowasi duwu yovena kamonai nikona si nonori wai, si yagisi saki.

²⁹Si bomsiri ba Iesu si taina se’eseri si kasibau ku meyaga kupuna, ba si yauni si gae asi meyaga si bowai wai koyana ku tepana, asi waina ku sanaga siti garukirei.

³⁰Saba, koroto basusiyai wata i sonaga ba i nae.

³¹I nae ku Capernaum, meyaga kesana Galilee kamonai, ba Sabbath maranai pipiya ibi beyebeyisi.

³²Ba ereonowasi ana bi beyebeyena si wareyei, kairavina ana sisiya wai ere maragasina.