San Lucas 4:9-32

⁹Ya quinene talo guiya Jerusalem ya pinelo gui sumanjilo y templo, ya ilegña nu güiya: Yaguin jago Lajin Yuus, yutejao güine papa:

¹⁰Sa esta matugue, na y angjetña sija jaencatga nu jago para unmaadaje,

¹¹Ya y canaeñija unquilile sa chamo matompo y adengmo gui acho.

¹²Manope si Jesus ya ilegña: Esta masangan: Chamo tietienta y Señot Yuusmo.

¹³Anae esta munjayan todo y tentasionña y anite mapos guiya güiya un rato.

¹⁴Si Jesus tumato gui ninasiñan y Espiritu asta Galilea: ya jumanao y famaña guiya todo y tano gui oriyaña.

¹⁵Ya güiya mamananagüe gui guimayuusñija, ya ninafanonra nu y todo.

¹⁶Ya mato guiya Nasaret anae jagas mapogsae: ya jumalom taemanoja y costumbreña gui jaanin sabado, gui guimayuus ya cajulo para utaetae.

¹⁷Ya manaegüe y leblon y profeta Isaias. Ya anae jababa y leblo, jasoda anae esta matugue:

¹⁸Y Espiritun y Señot gaegue gui jilojo, sa japalae yo para jupredica y mauleg na sinangan gui mamobble: ya matago yo para jusangane mancautibo, linibre, ya para y manbachet ufanmanlie, ya para junafanlibre y manchiguit,

¹⁹Para jusaganñaejon y guaeyayon na año y Señot.

²⁰Ya jajuchom y leblo ya anae janatalo y ministro, matachong; ya todo y mangaegue gui guimayuus, güiyaja manatan.

²¹Ya jatutujon sumangane sija: Pago esta macumple este na tinigue gui talanganmiyo.

²²Ya todoja manmannae testimonio ya esta ninafanmanman nu minauleg sinangan ni manjujuyong, gui pachotña; ya ilegñija: Ti güiya ini y lajin José.

²³Ya ilegña nu sija: Magajet insanganeyo nu este na sinangan: Medico, amte namaesajaoja: todo sija injingog na unfatinas guiya Capernaum, fatinas locue güine gui tanomo.

²⁴Ya ilegña: Magajet na jusangane jamyo, na ni un profeta guaegayon gui tanoña.

²⁵Lao magajet jusangane jamyo: Megae na biuda sija guaja gui Israel gui jaanin Elias, anae y langet majuchom tres años yan saes mesas, anae guaja dangculo na ñinalang gui todo y tano;

²⁶Lao ni uno guiya sija nae, esta matago si Elias, na as Sarepta, guiya tanon Sidon, guiya un palaoan biuda.

²⁷Ya megae na ategtog locue guaja guiya Israel gui tiempon y profeta Eliseo; lao taya guiya sija esta magasgas, na si Naaman taotao Siro.

²⁸Ayo nae todo y taotao gui guimayuus manbula y linalalo, anae jajungog estesija;

²⁹Ya mangajulo, ya chumulegüe gui sanjiyong y siuda, ya macone asta gui sanjilo y egso, anae esta maplanta y siudañija, para ufanyute gui papa.

³⁰Lao güiya, malofan gui entaloñija, ya mapos.

³¹Ya mato papa guiya Capernaum, siudan Galilea, ya ayo nae mamananagüe gui sabado na jaane:

³²Ya sija ninafanmanman nu y finanagüeña; sa y sinanganña gaeninasiña.