Luk 4:9-32

⁹Ŋunde yiní re wosoro Yerusalem uyaro rero Ya Surumímboro umó saŋano rotoro ŋande yaró, “Ke hamó Anutu koro Naŋuní tiníkaqo, ŋa noŋgo amuno soreka kiyowe.

¹⁰Dokoro, sokomeko ŋande yete, “‘Enendo sambo simóŋo yimironí sopo kere meté roŋgaru kereyowaŋgo,

¹¹ko kandeyembo hokoro koro kiri wondo kato khíndoŋgemo kama saŋga kereweya.’”

¹²Yiní Yesuko mande topé ŋande yaró, “Sokomeko ŋuno ŋande nakayáŋaró, ‘Ke Uni Parámi, keŋo Anutuke, ma towoŋowero.’”

¹³Monimbuko Yesu towoŋoní kini tiní rotoro naru kano quro soparó.

¹⁴Asa Yesuko rohoréŋoro Yuqa koro wimbímo Galili mirako ŋuno pitu ko uyaró. Uyariní unipare mira soso ŋu noŋgo qundo eneŋo mande piŋa ŋu iŋaŋgurí.

¹⁵Huru-huru yayemo ŋuno oro Anutu koro mandí rondaqe yunoyaró. Ko unipare soso eneŋo owí hokoyaŋgurí.

¹⁶Yate-yate Sapat naru kanoko Nasaret yendémo ŋuno uyaró. Yendé ŋuno ene simó tomó ta yate ŋuno parámi taró. Asa ŋu naruko ŋuno eneŋo murí howero huru-huru yano oró. Oro Anutu koro sokome qu weyowero otoqo kaŋaró.

¹⁷Kaŋiní sopo-sopo uni ŋundo Aisaiako mande nakayáŋaró ŋuro sokome qu ŋu re inoní rosaraqero mande ŋu weyoro ŋande yaró,

¹⁸“‘Uni Parámimboro Yuqayómbo no saŋanemo yote. Ŋunde ŋuro enendo no rokó niriní uni owéye moré kini ŋu piŋa mande meté yero yimirowano. Enendo asá niriní uni kusi-kusi yano yoteŋgo ŋu kinaŋge toŋewaŋgo ŋuro yesowowano, uni toŋeye piyimi mu pitu ko toŋetewaŋgo ŋuro yesowowano, uni quhurí koro kusuŋoyómo yoteŋgo ŋu yorewe kina toŋewaŋgo,

¹⁹Uni Parámimboro naruyó meté ŋuro yesowowano.’”

²⁰Ŋunde weyoro sokome ŋu wakaro sopo-sopo uni ŋu inoro kunditaró. Ko unipare huru-huru yano yaŋgo ŋu soso Yesuko toŋetaŋgurí.

²¹Asa hurí tero ŋande yimiraró, “Mande ŋano qu komo suki sokomeko nakayáŋaró ŋako itakako hamó tunoqete.”

²²Ŋunde yiní owí hokoro eneŋo maŋgómbo mande meté ŋunde qu yaró ŋuro iŋondata parámi tero ŋande epe mito-mito taŋgurí, “Uni ŋuko Josep koro naŋuní naŋge, ŋuko hamómbe?”

²³Ŋunde yiqo, ŋande yimiraró, “Ye tapara mande ŋambe ye nimirowaŋgo, ‘Dota, keŋo o piyimi ŋu reka meté tiní,’ yewaŋgo, ko, ‘O soso Kaperneam yendémo ŋuno taró ŋu naŋge ŋa mirako ŋano te,’ ye nimirowaŋgo, peka.

²⁴No mande hamó ye yimiroteno, Anutu koro ye-ye unindoro mirako ŋuno simburí muko ye-ye uni ŋuro mandí ŋu kama iŋoyoteŋgo.

²⁵Hamó yeteno, Elaija koro naruko ŋuno Israel mirako ŋuno wapu qambu yoraŋgurí. Ŋu naruko ŋuno kumima naru kapusa ko kombo kande saŋiyoro kanata ŋunde rotoro Israel mirako ŋuno sono kama umbuyaró. Ŋunde tiní korare parámi tunoqaró.

²⁶Quko Anutuko Elaija wapu ŋunde qu kano kama asáŋaró. Kini, mira meyowomo wapu ka, Sarepat yendé ŋu Saiton mira ŋuno wapu kano, ŋuno asáŋoní toŋeró.

²⁷Ŋuya ye-ye uni Elisa koro naruko ŋuno Israel mirako ŋuno koweye piyimi khumo uni qambu yoraŋgurí. Quko enendo se khumo uni ŋunde qu kama yoriní sara taró. Kini, Siria uni ka owí muko Naman, ŋu naŋge riní sara taró.”

²⁸Ŋunde yiní unipare huru-huru yano yoraŋgo ŋu mande ŋu iŋoro saŋgirí parámi taŋgurí.

²⁹Ŋunde tero otoqoro Yesu toworo yendé tapémo oŋgurí. Yendéye ŋuko mira purí titinímo yaró. Asa Yesu rero, purí sombé moŋgo raŋato, yero oŋgurí.

³⁰Quko keweroyewore kinaŋge yorotoro toŋeró.

³¹Asa Yesuko Galili koro yendéyó qu ka, Kaperneam yendé ŋuno oro Sapat naruko ŋuno Anutu koro mandí rondaqe unipare yunaró.

³²Yunoyoní eneŋo mandí iŋoro kondé yukuwaŋgurí. Dokoro mande yaró ŋuko wimbí moré.