Luk 4:9-32

⁹Meleŋniga Jisös waŋgita Jerusalem sitinöŋ anda jöwöwöl jikegö boŋe euyaŋgöreŋ öŋgöba kewö jii mörök, “Gi Anutugö nahönŋa akzan ewö, mönö kiaŋgöreŋök luhuba emu geman.

¹⁰Buŋa Kimbinöŋ keu kun kewö ohoget ahöza, ‘Anutunöŋ garataurupŋi jim kutum eŋgiiga ölöpŋanök galöm köla sel jöhöm gihime,’

¹¹aka keu kun kewö, ‘Yeŋön böröŋine ala nönögölim gihigetka geba kötnöŋ könage qahö guhum qizit akŋa.’” Miaŋgöra geba kude ayuhuman.

¹²Mewö jiyökmö, Jisösnöŋ kewö meleŋ waŋgiyök, “Qahö! Anutunöŋ jiza, ‘Gi mönö Kembugi Anutu kude esapköm waŋgiman.’”

¹³Bölöŋi Toŋan esapesap pakpak mi Jisös ak waŋgii teköiga mosöta anök. Mewö.

¹⁴Jisösnöŋ gölme qararaŋkölkölŋi mosöri Uŋa Töröŋaŋgö ösumŋan yambuk kiniga Galili prowinsnöŋ liliŋgöyök. Liliŋgöiga keu buzupŋan sehiba miri gölme liliköba tat angeri, mi pakpak dop köla anök.

¹⁵Dop köli miriŋi miriŋi liliköba köuluk miriŋine öŋgöba Buŋa keu kusum eŋgiyök. Kusum eŋgiiga mötkeri, körek yeŋön mönö söŋgaiba möpöseim waŋgiget. Mewö.

¹⁶Jisösnöŋ liliŋgöba malqarip taonŋi Nazaret miaŋgöreŋ anök. Sonda kendonöŋ kaiga ahakzawaŋgö dop köuluk mire öŋgöba Buŋa Kimbi oyoŋ eŋgimamgö wahörök.

¹⁷Wahöri kezapqetok azi Aisaiagö Buzup Kimbi waŋgigetka kötula keu kembaŋi kewö ohoget ahözawi, mi miwikŋaiyök:

¹⁸“Kembugö Uŋa Töröŋan nöŋgö urune geba nup memegö kelök supapŋi köl niŋgiba ambazip etqeqeŋi yeŋgöra Ölöwak Buŋa jim asarimakzal. Yaŋön melaim niŋgiiga keu kewö jim sehimakzal: Bölöŋan gwaröhöm eŋgii maljei, Anutunöŋ mönö i pösata meköm eŋgiiga malme. Anutunöŋ jegömöl ambazip jeŋini mem tohoiga kunbuk uba ekŋe. Taikpaik memba eta alget maljei, Anutunöŋ mönö i meköm eŋgiiga siyoŋsayoŋi qahö malme.

¹⁹Kembunöŋ amötqeqegö yambu ölöpŋi ali kam kuŋgumawi, nöŋön miaŋgö kolekŋa kaba mi jim asarimakzal.”

²⁰Keu mewö oyoŋda köpep supap mi köpeiba galömŋi waŋgiba eta tarök. Tariga köuluk mire tatkeri, yeŋön körek je qisilmisilŋi qahö dörötköba ehiget.

²¹Ehigetka könahiba kewö jii mötket, “Buzup Kimbigö keu ki oyoŋbi kezapŋine gei mötzei, miaŋgö ölŋan mönö merak asuhuza.”

²²Mewö jii mötketka kalem möriam keuŋi keuŋi numbuŋeyök eriga körekŋan mi möta welipköba jim soroköm waŋgiba keu miaŋgö jiji-kilik-kilikŋi mi kewö jiget, “Azi ki Josefgö nahönŋa me?”

²³Jigetka kewö jii mötket, “Iŋini nalöŋi nalöŋi keu kötŋi ki jimakze, ‘Mem ölöwak azi gi mönö nangi mem ölöwak aŋguman.’ Iŋini keu kötŋi mi dölki nöŋgöra jibingö mötze, mi mötzal. Mi jiba kewö jibeak, ‘Gi Kaperneam taonöŋ anda aŋgöletot öŋgöŋgöŋi menöŋga buzupŋi mörini, miaŋgö dop mönö nangi miri kiaŋgöreŋ mewöyök meman.’”

²⁴Mewö jiba jiyök, “Nöŋön keu ölŋi kun kewö jibi mötme: Kezapqetok ambazip kunöŋ mönö nanŋi malqarip taonöŋ qahö dop kölja.

²⁵“Nöŋön keu ölbölŋi kun kewö jibi mötme: Elaijagö (Elia) nalöŋe Anutunöŋ Suep naŋguŋi köli yambu (yara) karöbut aka köiŋ 6 miaŋgö uruŋe kie qahö yöhöiga bödi ketaŋi ahuiga gölme pakpak dop kölök. Nalö miaŋgöreŋ ambi malö gwötpuk Israel uruŋe malget.

²⁶Gwötpuk malgetmö, Anutunöŋ Elaija yeŋgöreŋök kungöreŋ anmapkö qahö melaiyökmö, kian gölme Saidongö miri qetŋi Sarefat miaŋgöreŋ ambi malö mohot-töp yaŋgöreŋ melaiiga anök.

²⁷Kezapqetok azi Elisagö nalöŋe uzikukunöŋ Israel azi gwötpuk turum eŋgiiga malgetmö, yeŋgöreŋök kunŋan kun qahö solaniyök. Qahöpmö, kian gölme Siriagö azi qetŋi Naman yaŋön mohot-kun mönö Elisagö keuŋi möt nariba solaniba ölöwahök.”

²⁸Jisösnöŋ mewö jiiga köuluk mire tatkeri, yeŋön körek keu mi möta irimŋini seholiiga urupik aket.

²⁹Urupik aka wahöta Jisös közöla taon yaigepŋe wuataŋgöba taon mi kunduŋaŋgö sem kösutŋe meget kinöhi, miaŋgöreŋ aköget gemapköra anget.

³⁰Angetmö, sutŋine qendeŋda eŋgömosöta anök. Mewö.

³¹Jisösnöŋ Galili prowins uruŋe Kaperneam sitinöŋ eta aŋgota Sabat kendonöŋ ambazip kambu kusum eŋgiyök.

³²Kusum eŋgiiga keuŋan kukösumŋambuk aiga jiyök. Miaŋgöra könagesö yeŋön mi eka auruba welipköget.