LUCAS 4:9-32

⁹Zhich guin wano Bzelo Ne Jerusalén, wlep Bzelo Ne xtoo xeydoo Dëdyuzh ledne mazre gyadee, re Bzelo lo Ne: ―Belne nli XPee Dëdyuzh nak de, gutsas nee, gugyab lyu;

¹⁰porke lo xgyiich Dëdyuzh re: Dëdyuzh yxaal xangel chen gapkwent xangel Ne de.

¹¹Ylisgya xangel Ne de kon nya xangel Ne chen tsakadet gye nii de.

¹²Wke Ne re Ne: ―Laake re ke lo xgyiich Dëdyuzh: “Ylaadet de preb XDëdyuzh de.”

¹³Chene che wzëldetre pezee ylaa Bzelo Ne preb, wbetxee Bzelo lo Ne te tyemp.

¹⁴Wberee ke Jesus lo lyu ne la Galilea, kesentyent waknonen Espíritu Sant Ne, no ydendxee nes guin ruu mén xdiiz Ne.

¹⁵Ra Ne lenxeydoo men ydendxee nes guin, raneluu Ne men; yrandxee men rzaknon Ne.

¹⁶Wa Jesus Nazaret ledne wroo Ne. Lex dxe ne rne men-Israel, wdee Ne lenydoo zegnak xkoxtumber Ne, lex wzuli Ne chen gool Ne lo xgyiich Dëdyuzh.

¹⁷Wdee men liber ne wkaa profet-Isaías lo Ne. Chene wxal Ne lo liber guin, wzël te ledne re:

¹⁸Laa XEspíritu Dëdyuzh raknonen noo, porke laa Ne wye noo por ne yzëët noo xdiznzoon Ne lo yra menprob. Wxaal Ne noo chen yzëët noo lo yra men ne nunyoow gan pezee yláá men, no chen ylaa noo ne gyenii bzalo menngwlëë, no chen yselaa noo yra men ne baanske rzak,

¹⁹no wxaal Ne noo chen yzëët noo lo mén ne le iz ne re Dëdyuzh ne yláá men che wdxiin.

²⁰Lex wtsëë Jesus lo liber guin wdee No lo men ne run yudar lenydoo, wluzh nga wzob Ne. Yrandxee men ne nuu lenydoo rzakyaanen lo Ne.

²¹Wzelo Ne wnii Ne lo men, re Ne: ―Yra ne zëëd lo xgyiich Dëdyuzh ne won de orree, laa we nee kayak nedxeree.

²²Yrandxee mén re ne wen yra ne rnii Ne, no kesentyent rzee rzak men por yra diznzoon ne rnii Ne. Lex rnabdizlsaa men, re men: ―¿Pe let laadet xpee Xeb nee?

²³Orguin re Jesus lo men yra men: ―Nanwen noo ne sna de lo noo, diiz ne re: “Doctor, gulaa de rmed laake de”, no sna de lo noo: “Ne won noo wlaa de gyëz-Capernaum, gulaa we no nee ledne nak laz de.”

²⁴No re Ne lo men: ―Nligue yna noo lo de yra de ne ni te profet rwiwendet mén men laake laz men.

²⁵No yna noo lo de, chene wuu profet-Elías, kesentyent ndal wnabyud wuu Israel, chene wyabdet gyo tson izgwrol, ydendxee gyëzlyu wuu gbiin,

²⁶per wxaaldet Dëdyuzh Elías ni te lo wnabyud ne nuu Israel, sinke le Dëdyuzh wxaal men lo te wnabyud ne nuu Sarepta ne nak nes Sidón.

²⁷No ndal ke men ne rzak gyiz ne la lepra wuu Israel chene wuu profet-Eliseo, per ni te men wneseyakden Eliseo, sinke le Eliseo wneseyaken nonchee Naamán men-Siria.

²⁸Chene won yra men ne ndxin lenydoo ne re Ne zenga, kesentyent wlayaa men.

²⁹Orguin wzuli men yra men, wboo men Ne lenlgyëz guin; wano men Ne xtoo gyeey ne nak gyëz guin, chen ydexee men Ne axtegue nga.

³⁰Per wdee Ne gwrooltee lad men yra men syague Ne.

³¹Zhich guin wa Jesus Capernaum te gyëz ne nak lo lyu ne la Galilea. Nga wkaneluu Ne mén dxe ne rne men-Israel.

³²Wzee wzak men por yra ne rneluu Ne, porke rnii Ne zegnak te men ne rnebééy.