Leemiso Maxaafaa 11

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹GODAI worddo meezaanaa ixxees; shin likke meezaanan ufaittees.

²Otoroi yiyo wode kaushshatettai yees; shin ashkketettaara aadhdhida eratettai yees.

³Xillota eta suuretettai kaalettees; shin ammanettennaageeta eta geellatettai xaissees.

⁴Hanqquwaa gallassi duretettai go77enna; shin xillotettai haiquwaappe ashshees.

⁵Boree bainna uraa ogiyaa a xillotettai sittissees; shin iita urai ba iitatettan kunddees.

⁶Suureta eta xillotettai ashshees; shin ammanettennaageeta eta amoi pire gididi oiqqana.

⁷Iita asi haiqqiyo wode, i naagiyo ufaissaikka aara issippe haiqqees; i ba wolqqan ceeqettiyoobai ubbikka xayees.

⁸Xilloi metuwaappe attees; a gishshaa iitaa bolli metoi yees.

⁹Xoossaa kaddida asi ba doonan asa xaissees; shin xilloti eran kessi ekkoosona.

¹⁰Xilloti bonchchettiyo wode, katamai ufaittees; qassi iitati haiqqiyo wode, hashshu gees.

¹¹Xillotu anjjuwaa gaasuwan katamai diccees; shin iita uraa haasayai katamaa xaissees.

¹²Ba shooruwaa kariya urau wozani baawa; shin akeekanchcha uri co77u gees.

¹³Zigirssanchcha asi xuuraa laalees; shin ammanettiya asi xuuraa genttees.

¹⁴Kaalettiyaabi xayikko, kawotettai kunddees; shin daro zoriyaageeti de7ikko, saroi de7ees.

¹⁵Erenna urau waase gidiya asi tumuppe metootana; hegaappe waase gidennan ixxiyoogee lo77o.

¹⁶Ulo keha maccaasiyaa bonchchettausu; shin meqettaa iita asai duretetta xalaalaa duretees.

¹⁷Keha asi baassi lo77obaa oottees; shin meqettaa iita asi bana qohees.

¹⁸Iita asi demmiyo miishshai cimo; shin xillotettaa zeriya uri tumu woituwaa cakkana.

¹⁹Xillotettan minnidi de7iya uri paxa de7ana; shin iitatettaa kaalliya uri haiqqana.

²⁰GODAI iita qofai de7iyo asata ixxees; shin suure hemettiyaageetan ufaittees.

²¹Iita asi qaxxayettanaagee attenna; shin xillotu zaree attana.

²²Adussa qofi bainna puulanchcha maccaasee puulai gudunttaa siiriyan aattido worqqaa alleequwaa mala.

²³Xillotu amuwaa poloi lo77o xalaala; shin iitatu amuwaa poloi hanqqo xalaala.

²⁴Issi issi asati bantta miishshaa asau coo kehoosona; shin eta aqoi yaa darees. Hara asati qassi bantta miishshau pala uuzettoosona; shin eta aqoi haa paccees.

²⁵Keha asi duretana; harata maaddiya asi maadettana.

²⁶Kattai al77in baizzanau minjjiya uraa asai qanggees. SHin ba kattaa asai koyiyo wode baizziya uraa anjjees.

²⁷Lo77obaa minttidi koyiya uri ufaissaa demmees; shin iitabaa koyiya uraa iitabai demmees.

²⁸Ba duretettan ammanettiya asi kunddana; shin xilloti balggo mittaadan daayana.

²⁹Ba so asaa bolli cabbo denttiya uri go7ettanabi aibinne baawa. Eeyyatikka aadhdhida eranchchatuyyo ashkkara gidana.

³⁰Xillo asi de7o aifiyaa aifiya mitta mala; shemppo ashshiyaageeti aadhdhida eranchcha.

³¹Xilloti sa7an bantta oosuwaa waagaa ekkiyaabaa gidikko, iitatinne nagaranchchati bantta oosuwaassi ekkana waagai waani daranddeeshsha!