Johane 13:11-29

¹¹E doc bapa‐ticne mana tarahuc ʒiŋuc jazawec: “Ŋoŋe ɋaɋacnea mi jufâreŋgopieŋ.”

¹²Kike‐jeŋic ʒure‐fârerâ ŋaqi ʒora‐ticne mocwâc heme hume waha ŋehuc ʒiŋuc jazawec: “No wiac eŋarepac irec fuŋne manaŋgopieŋ me?

¹³Ŋoŋe Qaqazu â Wofuŋ munareeŋgopieŋ, erâ iŋeŋic jukopacte sâcne munareeŋgopieŋ.

¹⁴Eme no Wofuŋ â Qaqazu‐ŋeŋiczi kike‐ŋeŋic ʒure‐ŋarepacte ŋaŋaczia iŋuc jaha kike ʒuʒurec erahuc jupie sâckezejec.

¹⁵Mâsi eŋarepac izi juju bapare ma qâreŋ‐ŋeŋic eme i honehuc, eŋarepac irec sâc ehuc junʒepieŋ.

¹⁶No jâmbomac jâmbâŋ mupe mananiŋ: Kiŋaŋ moteczi bomboŋ‐ticnere sâc sirickerâ jujune i mi fokac, â sorekicnezi sorewec ere sâc sirickerâ jujune i wâc mi fokac.

¹⁷Eme dâŋ i manapaŋkerâ irec sâcko jupie no ŋoŋere manape ʒerine eocmu.

¹⁸No dâŋ mupe mâmâc sasawa mi rocŋopakac. No wenimoi rowosâec‐ŋopapo i manakopac. Dâŋqâreŋ moc kecʒiŋuc fokac, i sanaŋkeocmu hâcne: Nânâ bâfâuc ecneekopac eki wâc bunaneo bakac.

¹⁹Wiac i mi fuahame qanaŋ ŋazakopac, eme ʒâhec fuame, e Wofuŋzi qanaŋ manahuc muwec, nore iŋuc munʒepieŋ.

²⁰No jâmbomac jâmbâŋ ŋazape, moc e gie muŋarekicne ŋoŋe hezu hewâneŋ eŋareocmuzi gie rune no hezu hewâneŋ enareocmu, â moc e no enareocmuzi sorecnuwec e hezu hewâneŋ ecneocmu.”

²¹Jesu e dâŋ iŋuc murâ bu ʒaʒamaŋne fâuckezo eme mutaniŋkerâ ʒiŋuc jazawec: “No jâmbomac jâmbâŋ mupe mananiŋ, ŋoŋeraonec moczi no doc bacnuocmu.”

²²Iŋuc mume motec jaŋe hohonec efârerâ, i more mukac, muhuc kâuc bambiŋ.

²³Eme motec moc Jesure maŋfuŋko ŋewec, e bufuŋ jâmbâŋ‐ticne,

²⁴e hâcne Simoŋ Petorozi mezi sâsâc ecnerâ muwec, “Wiocnetec gazaoc, more mukac?”

²⁵Eme motec eki hâcne qizec‐ticne Jesure amecko fohorerâ muwec, “Wofuŋ go more mukic?”

²⁶Eme Jesuzi muwec, “Poroŋ sicko âke uruckerâ râcnepe nâocmu ere hâcne mukopac.” Iŋuc murâ poroŋ sicko âke uruckerâ Simoŋ ŋokâ‐ticne Juda, Karioto haeonec, e râcneme nâwec.

²⁷Nâme Sataŋzi maŋne sakioŋkewec. Eme Jesuzi ʒiŋuc âzâcnewec: “Wiac ezo mukomec, i biac jaha ezemec.”

²⁸Dâŋ iŋuc âzâcneme gâcne mâmâc ŋembiŋzi mi mana‐hâmombiŋ.

²⁹Ehuc tucnezi ʒiŋuc mumbiŋ: “Juda e moneŋ kânoŋ wirec‐nâŋec bajukacte hombaŋte wiac moc furine baocte sorekac, me ŋic hapetac moneŋ jareocte mukac.”