San Juan 13:11-29

¹¹Ma ragbeeman chu yayü laaman, zeel rëbaman: “Ad gratidi naya.”

¹²Chi gulox gudiibaman guiaꞌ reeman, bayajcw xabaman, gurejman xan mex guin zatijb, dxel rëbaman: ―¿Bigniaꞌdi ni benan ya?

¹³Rnieedi naj Mextr në Dad, waliquidi najn.

¹⁴Bal najn Mextr në Dad, gudiiban guiaꞌdi, ziangajc quiib guiaꞌ lasaꞌdi.

¹⁵Ma balün lëjt, din güündi ziꞌc benan.

¹⁶Diidxliczi ganin, achut mojs na̱j mazri guial loj bén rniabee laaman, achut bén riꞌt na̱j mazri guial loj bén rxhiaal laaman.

¹⁷Bal rigniaꞌdi nine güün tëëdan, yabaanë Dios lëjt.

¹⁸’Ad gratidi ruzatan ragbeen chu reenin gulen. Per rayal gac cumplid ni ca loj xtiidx Dios, rëban: “Bén rawnëꞌn tijbzi, bayejcaman contr naj.”

¹⁹Ma rugojnan lëjt din gagbeedi chi gac zian, din chililadxidi chu najn.

²⁰Diidxliczi ganin, bén rucaagdiajg ni rëb bén rxhialan, najn rucaagdiajgaman, guiáad bén rucaagdiajg da diidxan, xtiidx bén guxhaal najn rucaagdiajgaman.

²¹Chi gulox gunee Jesús zian, dád guyunayaman, dxel rëbaman loj reeman zagdxe: ―Diidxliczi ganin, tijb lëjt yayü naj loj ree bén gugüjt naj.

²²Dxel guzuloj ree xbejnman ruguiaa loj lasaꞌ reeman, niꞌquid ragbeet reeman chunin ruzaꞌtaman.

²³Tijb bén guyën daꞌtaman zojb cwëꞌman, hor zii chi cayaw reeman xche,

²⁴dxel been Bëd sen lojman din guiniabdiidxaman chunin ruzaꞌt Jesús.

²⁵Zeel mazri gubigaman cwëꞌ Jesús gunabdiidxaman, rëbaman: ―Dad, ¿chunin?

²⁶Badxiꞌ Jesúsan rëbaman: ―Gugajdxan taꞌn guiadxtil, din loj xin gudëdanan, laaxan yayü naj. Dxel bagajdxaman taꞌn guiadxtil badëëman laan loj Judas, xiꞌn Simón Iscariote.

²⁷Chi gudawixan, laa guyu gajc xindxab luxdoox. Zeel rëb Jesús lojx: ―Ni güünl, cari beenan.

²⁸Per achutczi ree bén zojb xan mex guin bigniaꞌ chexc zeel rëbaman zian.

²⁹Guial caꞌ Judas bols ni yuꞌ milia, zeel naladx garol reeman rëb Jesús lojx din chisiix ni gaw reeman lanij guin o gudëëdix taꞌnan loj ree bén rzagdiaj ya.