João 13:11-29

¹¹Ig awna inakni henne mmanawa ig kuwis hiyak ku pariye gikamaykiswitni ta gitkis gipetunyapu.

¹²Pisenwa gisukan gikugkukis, ig kawih gidagmanpit akiw, ig batahkiswa akiw. Ayteke nikwe ig awna wothu: ―Ba yis pukuha ini ku pariye nukehni yikak kuri? Nah akkite yit.

¹³Yis kanumun yikipara yikannuhten. Yiwnapriknawa mmanawa nahnewa.

¹⁴Ku samah nah yikipara yikannuhten ikaw kewa pahapwi ibuktibe yidahan nah sukuhne yikugku, amawka ku yis hawwata yis ikaw ke ibuktibe adahan kehne kabayka pawtak.

¹⁵Nahnewa yikannuhten yiwtrik adahan yis ikaw tuwatapye ke nahbe.

¹⁶Ku samah nahwa yikipara yawahkisten ikaw tuwatapye amawka yis hawwata. Ihanabay inakni nuwnhu. Hennewatbaki in. Pahapwi ibukti ka kiyattema mpiy gikipara. Iné pahapwi iwatnit kawnata kiyattema mpiy gawahkisten.

¹⁷Kuri yis hiyak kabayhtiwa ku samah ini nuhiyakemni. Ku yis wew akak ini tuwatka, yis utí kaayhsima kabaykanek.

¹⁸―Henneme pahapwi ay yaytak ig ka utí kabaykanek. Nah hiyakni mmanawa nah kuwis hiyak ku pariye ay apit yiyakni yis nukanyanpu. Henneme nah kaniyi ku pariye nukanyanpu kahadbe in danuh ku samah Uhokri gannasan minikweknene awna numinhu. In awna: “Pahapwi ku pariye axne papetunak nukakhu iggi wageswepye nupetunyanek.” Ku apim inin inakni yuwit metakwa in kahayak.

¹⁹Henneme apit in kahayak nah akkamnihni yit kahadbe ku aysaw in kahayak yis hiyakni ku nah igyerwa Uhokri gikamkayh.

²⁰Ku pahapwi amapa nuwatni, amun ini nikwe in ke wotbe ig kuwis amapan hawwata. Ku pahapwi namerepten, amun ini nikwe in ke wotbe ig kuwis amapa ku pariye nawahkisten atan amadgat inin hawwata. Ihanabay inakni nuwnhu. Hennewatbaki in.

²¹Ayge amun ini ig Kiyapwiye Jesus katiw apit giyakni. Ig awna: ―Pahapwi yaytak ay iggi kamaykiswennek ta gitkis nupetunyapu. Ihanabay inakni nuwnhu. Hennewatbaki in.

²²Usuh gikannuhnipwi timapni henne, usuh msekwe he ipegbet. Usuh ka hiyak ku kamin ig awna.

²³Nah ayge bat gihumwa Kiyapwiye Jesus mmanawa ig batek nukakhu.

²⁴Ayteke kiyapwiye Simawh Pedru hiyapni henne, ig tawanha akak gitew. Ig minimni ta nuthu: ―Ayapnig ku kamin ig awna.

²⁵Nah timapni henne, nah ataybiswa ta git Kiyapwiye Jesus. Nah ayapri: ―Kiyapwiye, pariyekig?

²⁶Igme kaytwa nuwnhu: ―Ku karimkat nah akaki bugut mehbetakinen, ignewatbaki. Ayteke nikwe ig mehbete bugut ahakwa im araku, ig akakin ta gimkat Judas Iskariyotismin ku pariye amekene Simawh gikamkayh.

²⁷Igme ax ini bugut. Pisenwa gaxni, ner wapitye gikiparadkis Satanás kawihpig. Ig Kiyapwiye Jesus hiyapni henne, ig awna git: ―Iwawhawnaba. Hiyawa pis keh ku pariye pis kehkere.

²⁸Usuh ayge aranwa axtet usuh ka hiyak ku samah ig awna inakni git.

²⁹Waytak gipewkankis adahan ig isimne im adahan fet. Waytakme gipewkankis adahan ig ikene karukri ta gitkis madiptapye. Igkis kiyemna henne mmanawa ig Judas Iskariyotismin apuriwne ukakura.