YOHAAN 13:11-29

¹¹Haali/ a’di mishki a’di jin midi ’ciṯẖ a’di is ki gwo mo. A’di i/ona a’di gwo gi wakan mo ki: Umi ’baar mo yisa idheleladhelel mo.

¹²Ki a’di lamki uni sho’k buni mo tani dhali a’di bu’thki burrinyem piti ka nyaŋ’ko’d mo dhali c̱a’b e mom piti mo, dhali a’di ki o uni gwo mo ki: Um mishi ’pemen miiŋ gwo yansan jin miiga/ gom um mowa?

¹³Um yuḵki aha/ ka Manṯor Gwo dhali ki Tap̱a mo. Dhali miim bum ’boro’d be haali/ aha/ wana kan mo be.

¹⁴Waḵki/ aha/ wana kan mmota Tap̱a mo dhali Amanṯor Gwom bum mo lamki um sho’k mo tani um si’da/ ḵa ba/ imini lam sho’k ka gam ’kup̱ mo be.

¹⁵Haali/ aha/ c̱ikina um she/um mii mo ki um si’da/ mini ’taki mii mii me’d aha/ mo me’d jin miika/ gom um mo be.

¹⁶Ka jiŋ gana/, ka jiŋ gana/ aha/ ṯora um gwo mo ki c̱iŋkina/ yisa ica’d ki tap̱am piti mo yisa, walla a’di jin hashu mo tani yisa ica’d ki a’di jin hashki a’di mowa.

¹⁷Waḵki/ um mini mish gwo gwansan mo tani mom’bor mii ’te/ ba/ gom um mo waḵki/ um mini mii uni mo be.

¹⁸Aha/ dinaki ṯor gwo gom umi ’baar mo. Aha/ misha uni gun kwanyka/ mo, a’di jin mina Gwo ma Arumgimis jin ’kwarkunu mo ki a’di minu thim moyi ki: A’di jin shwaki maam pem a’di ’de’kki ’penaṯiŋkilan sho’k piti ap̱o/ aha/ mo.

¹⁹Aha/ ṯora um gwo shwane/ nṯwa/a/ mo ki mo diki bu’th mo mo, waḵki/ a’di ki bu’th mo mo tani um ki gam gwo is ki aha/ tana a’di mo be.

²⁰Ka jiŋ gana/, ka jiŋ gana/ aha/ ona um gwo mo ki: A’diyin jin midi bu’th jan ṯal ’deŋ kamu/ ’peni bwam uni kun hashka/ mo tani a’di bu’thki aha/ mo, dhali a’di jin bu’thki aha/ mo tani a’di bu’thki a’di jin hashki aha/ mo be.

²¹AYesus oki gwo wakansan mo tani a’di murkin ma du mo e shi/in mo dhali ṯe gwo shoka ’cesh mo ki: Ka jiŋ gana/, ka jiŋ gana/ aha/ ona um gwo mo ki: Jan ṯal ’deŋ kamu/ ’peni um midi ’ciṯẖ aha/ is ki gwo mo be.

²²Dhali imanciḵ gwo uni sugkin ki e ka rem ’kup̱ mo mmomolkina uni wathi/ jin okina a’di mo be.

²³Jan ṯal ’de/ ’peni imanciḵ a’di gwo mo a’di jin enkin ma Yesus mo mmo/ishkina a’di ki ’dishe/ eya bor ma Yesus mo be.

²⁴Wakan Simaan Buṯerus wuḵki a’di ki ’kup̱ mo dhali o gwo mo ki: Ṯori aman wathi/ jin okina /e mo ma.

²⁵Wakan mmo/ishkina a’di abor ma Yesus ki ’dishe/ mo tani a’di ki o a’di gwo mo ki: Tap̱a kaja sa/?

²⁶Yesus ki thoḵ gwo mo ki: A’di ta a’di jin miga/ c̱ika gabul maaŋḵuthu’d yan mo ki aha/ mina ’thup̱ki a’di mo be. Wakan ki a’di ’thup̱ki a’di agabul maaŋḵuthu’d mo tani a’di ki c̱iki a’di ka Yahuusa jin ta ya/ ma Simaan Isḵariyuuṯi mo be.

²⁷Dhali yan’ko’d ka gabul maaŋḵuthu’d mo tani Seṯaan seki’da dum piti mo. Yesus ki o a’di gwo mo ki: A’di jin mura /e imii mo tani miiyi a’di ki jahanne/ mo ma.

²⁸Dhali jan ṯal ’deŋ kamu/ jin di’da tharabeesa yisa mishki ’pemen gwowa, kata okina a’di a’di kan mo.

²⁹Kun tiya ṯoshkin haali/ Yahuusa ta’d ga jisilaan ma guurush mo tani on ka Yesus ṯorki a’di gwo mo ki: Yoli tonṯe/ kun mina ana mii ta goma yuḵ jin yuḵu ka tul ’kup̱ mo, walla ki a’di midi ’taki c̱i to gom ’kwani kun hatha’ko’d mo be.