Yowan 13:11-29

¹¹Ngan Yesu in lon galanga ye tool yo be itaru la di koi ki baedi in oo. Ngan ye punu in la le iwete be di le imot ngan tinidi igalanga tiap nga.

¹²Yesu ingas di galiunu tina ngan kedi a imot, motong la isousou mulu ye sousoungu mooloo ki tani, inbe imulu la iwur ye nene. Motong la itor di nen, “Ai, ang nga lomim galanga ye soo so yo ayeii pang in lapau, too?

¹³Ang nga kakiu au ye ‘Pannoongoo’ inbe ‘Tool Mai’ nga, ngan kawete gorrau le dook mata, yesoo au i urata kiau tina nangan.

¹⁴Le kumata be au i Tool Mai inbe Pannoongoo kiang la angas kemim nga, ngan ole ang lapau, kayei nen a kangas di diemim kapala kedi.

¹⁵Ngan au i ayei dada nen pang nga, ngan be nen a matamim too, inbe ang lapau ole kayei dada dawa ben yo ayei pang nga.

¹⁶Awete pang moolmool nen, tool yo iyei urata ben kapraingi i, in ene mai le illoso tool mai ki, in tiap. Inbe tool yo tool san iwanga ye urata i, in ene mai le illoso tool yo iwanga i, in tiap lapau.

¹⁷Ngan nookoot nga ang ngan lomim galanga ye dada yo ayeii pang, in punu oo. Le kumata be katoo dook nga, ngan Maro ole iyei urata dook mata pang.

¹⁸“Betanga yo au i awete nga, ngan pang ang le imot tiap, yesoo au tauk i lok galanga ye di tooltool yo apootoo di pau nga. Bong dookoot be nen a betanga yo iken ye Rau ke Maro i, in ole kanono pombe moolmool. Ngan betanga tani in iwete nen, ‘Tool yo amru amkan porong i, in ole iyitmaka kene be iyirtoo au ye.’ 

¹⁹“Ngan so yo nookoot awete pang ye nga, ngan kanono pombe moolmool tiao. Bong au i lok be aso talngamim ye, a be nen ngan pang dama ni be pombe nga, ngan ole katara lomim medana nen be Au I Tool Tani Yo Iyepe Nen I.

²⁰Le awete pang moolmool nen, kumata sei tool be ikaua tool yo awanga a ila, in a iyei dada dook mata panga nga, ngan tool in ben iyei dada dook mata nen pau lapau. Inbe sei tool be iyei au dook mata nga, ngan tool in iyei dada yo nen ngan pang Tamak yo iwangau a asi i, in lapau.”

²¹Yesu iwete pang di galiunu nen a imot, inbe ikanamaii ngan lon gurrungu san. Motong la iwete pobe pang di nen, “Awete pang moolmool nen, ang tina nga atu la be itarau la di koi kiau baedi i.”

²²Iwete nen, le nga di galiunu tina ngan lodi sarere le matadi ikenen ye di diedi, inbe lodi kaua urata nen, ngan iwete nen ye sei.

²³Ngan di galiunu tina ngan atu yo Yesu lono panga mai san i, in iwur potai pang ye lapau.

²⁴Le nga Simon Pita iyei tomonai ye kutono pang ene tani be itoru, ngan sei iwete nen ye i.

²⁵Motong la galiunu tani, in irusu le la itadana Yesu, inbe itoru mos leu nen, “Tool Mai, ngan sei kuwete nen ye i?”

²⁶Le nga Yesu iyei ne, “Nga ole atepala porong kasin, inbe aroro ye sur yo iken omai lono i, lo ngan be akap pang ang tina nga atu. Ngan ya in tool tani yo awete nen ye i.” Motong la ikap porong kasin a iroro ye sur, inbe ikap pang Yuta Iskariot yo Simon natunu i.

²⁷Ye kene yo Yuta tani in ikap porong tina ngan ye in nga, ngan le Satan idewe a ilo lono. Motong la Yesu iwete panga nen, “Soo so yo lom be kuyeii i, in kuyei taraii.”

²⁸Yesu iwete panga nen, le nga di diede kapala yo tiye tiwur ye kookoowoo ke kaningi so nga, ngan tilongo, bong ngan lodi galanga ye betanga yo Yesu iwete ngan punu tiap.

²⁹Ngan Yuta tani in matan kala depe kidi yo ke pat i, le nga di tooltool kapala tiyeisa o Yesu iwete panga be la iyimi kaningi man tikan ye lal maiyoko ke sungunu tani, too be la ikap so pang di tooltool yo ballingadi tiap nga.