JUAN 13:11-29

¹¹Kom che nan Ne gan txuzh nak ne ydekwent Ne, por neguin re Ne: “Let yradet de ndaa.”

¹²Wluzhse waa Ne nii men yra men, wak ke Ne xab Ne ste; zhich guin wzob ke Ne lo mezh, lex re Ne lo men: ―¿Pe rdee de kwent neree ne wlaa noo?

¹³Laa de yra de, Dechey rnii de noo no le Maxter; nli rnii de, porke nli nak noo we.

¹⁴Noo ne nak noo Dechey no le Maxter, no waa noo nii de yra de, zenga ke rap de degne galsaa de nii xkompanyer de.

¹⁵Wlaa noo neree chen kwii de chen no de ylaa zeree zegne wlaa noo.

¹⁶Nligue yna noo lo de ne ni te mos nondet mazre ke lo xpatron men, no ni te mén ne ra mandad nondet mazre ke lo mén ne rxaal men.

¹⁷Nzoon de belne rdee de kwent neree no belne rlaa do.

¹⁸’Let por yradet de rnii noo; nan noo gan txuzh wye noo ne gak xpén noo. Per rap degne gak kumplir ne zëëd lo xgyiich Dëdyuzh ledne re: “Mén ne ru yrup men noo, le men che rwinyaan noo.”

¹⁹Ynague noo neree lo de yra de chen chene gako, ylaleedx de ne noo nak men ne nak noo.

²⁰Nligue yna noo lo de ne men ne tsukas mén ne yxaal noo ne tsa men, noo nga tsukas men; no men ne rukas noo, Xuz noo nga ne wxaal noo zëëd noo rukas men.

²¹Wluzh re Jesus zenga, kesentyent wdenles lextoo Ne, wzëët Ne neree lo xpén Ne, re Ne: ―Nligue yna noo lo de yra de, ne laake de te de nak ne ydekwent noo lo mén chen yzakzi men noo.

²²Orguin wzelo men noze rwilolsaa men te te men, ni nandet men txu por laa rnii Ne.

²³Te men ne nak ke xpoxter Ne ne kesentyent ryaan Ne, zobnka koo Ne.

²⁴Lex wluu Simon-Bëd senye lo men chen ynabdiiz men lo Ne gan txu por laa rnii Ne.

²⁵Kom koo Ne zobnka men, wnabdiiz men lo Ne, re men: ―Dechey, ¿txuzh ne?

²⁶Wke Ne re Ne: ―Ygaz noo tebla gyëtxtil; men ne ydee noo we lo, men guin ne. Lex wgaz Ne tebla gyëtxtil, wdee No lo Judas xpee Simon Iscariote.

²⁷Zegne wnëëz Judas gyëtxtil guin, wdegue Bzelo lextoo Judas. Lex re Ne lo Judas: ―Logne ylaa de, gulaa we gyiid gyiidske.

²⁸Per ni te men ne ndxin lo mezh wdeedet kwent gan penak re Ne lo Judas zenga.

²⁹Kom laa Judas nzen bols ne nuu med, por neguin nuu lextoo men gwrol men pazer ne ykyiin lo lni re Ne lo Judas yka Judas o ka pe ydee Judas lo menprob.