John 13:11-29

¹¹Dani-yung ni-yambini na-Jesus. Niga yamba ni-marrbuy nubagi-yung Judas anu-minbini, nga naagi-yung ambani-marangiiyn na-Jesus warruburru-yung-guy.

¹²Anubani-yung wani-mun-jarrbini-wala wugurru, manubama-yung ni-yabiyn mana-yaaḻi ngijang. Nga niigiyn wubani-yung niindhadhangayn ni-burri-rruj. Nga warruburru-yung wani-yandhawiwayn, ni-yamayn “Ngaya anaani ngana-mun-jarrbini. Yuga nurru-marrbuy wiijaminggarrina yuga?

¹³Nugurru nga ngirri-mayana yamba ngaya anaani ngana-yiyina-yinyung, marri nugurru ngirri-mayana Buunggawa. Aadanu wiij-maṉdhina aḏaba.

¹⁴Yijgubulu, ngaya anaani nga-Buunggawa, marri ngana-yiyina-yinyung anaani. Yagu ngaya ngana-mun-jarrbini nugurru. Wiiya yagu aadanu. Aadanila-wala nga ngana-bajiyini, aḏaba nugurraayung numburru-yamana numburru-mun-jarrbiynjina nugurru.

¹⁵Yaani nga ngaya ngana-bajiyini ngayawi-nyinyung anaani, nugurraayung numburru-yamana nimbirriij-dharrmani aani-yung-jii.

¹⁶“Ngubindi ngubindi anaani ngana-magana nugurri-wuy. Nubagi-yung-maynji na-wurrujung anu-yandhurrbangana nubagi na-buunggawa-yung, naagi-yung na-wurrujung waari ni-runggal-wi, waari ni-yami nguynju nubagi-yung-jii na-buunggawa-yung-jii. Marri anaani wiij-nguynju, nubagi-yung-maynji niwu-lhaawu-yarrijgina anubani ana-lhaawu nubagi-yung-jinyung naaynbajung, waari naagi-yung ni-runggal-wi, ni-yami nguynju nubagi-yung-jii ni-ragaana-yinyung-jii.

¹⁷Nugurru aadanu nurru-marrbuy aḏaba. Nugurru numburru-waṉbina, numburru-yamana aani-yung-jii. Marri na-God niga-waj nambaniigajij-majgana nugurru.” Dani-yung na-Jesus ni-yamayn niga.

¹⁸Naagi-yung na-Jesus ni-yambini-wugij. “Ngaya nga-marrbuy nugurru aadanu nga-wajbarini-yinyung. Waari anaani ngaya nga-magina nugurri-nyinyung-jinyung warraarrawindi-lhangu. Anubani yamba ana-lhaawu wu-magina anaani ana-wubiba-rruj, anubani anggu-waṉbina andhurrg wugurru. Anaani ana-lhaawu wu-magina wu-yamana, ‘Aynjaabu-nyung-maynji niga niini-nguni-yinyung bagu ngayawi-rruj, niga rulbu ngani-yayn ngayawi-wuy.’ Dani-yung wu-yamana anaani ana-wubiba, wu-magina.

¹⁹“Anaani ngana-magaa raga-ragij, wurrugu marri anggu-waṉiyn. Anubani-yung-maynji anggu-waṉbang, nga anubani ngirrii-ngu-jambarrgiiyn, ngaya-waj nga na-Runggal-yung.

²⁰Ngubindi ngubindi ngaya ngana-magana nugurri-wuy, ngaya-maynji nganamba-lharrganjii nugurru, warruburru-yung-guy warra-wurru-wurruj, marri anubani-yung nambambi-walgur-wana-maynji nugurru, anubani-yung amburru-yamang ngayawi-wuy anaani, ngambambi-walgur-wana wugurru ngaayunggaj. Warrubawi-yung-maynji ngambambi-walgur-wana ngaya, waari ngayawi-wugij-magaa, nga nigaayung na-Baba ambunu-walgur-wana niga ngani-lharrgayn-jinyung.” Dani-yung ni-yamayn na-Jesus ni-magini.

²¹Anubanila-wala, na-Jesus naagi-yung ni-yaal-wurrwurrlhiyn nga ramarr nima-wini. Nga wani-magayn wugurri-wuy, “Ngubindi ngubindi anaani ngana-magana nugurri-wuy, Aynjaabu-nyung nugurri-rruj, ngambani-minbumana ngaya.” ni-yamayn.

²²Wugurraayung nga wurru-ba-naynjini wugurru, wurru-maḻaḻadi yamba anaani ni-yambini-yinyung, a-yangi-yinyung.

²³Nga aynjaabu-nyung bagu waḻyinyung ni-burri, na-Jesus naa-ḏamarr-ngu-burri-yinyung nigawi-wuy, nga bagu nu-nangga-miṉmiṉḏangi naagi-yung niindhadhi na-Jesus-duj.

²⁴Nga nubagi-yung na-Peter nu-yandhawiwayn marang-mirri, “Banu-yandhawiwang, na-yangi-nyung-jinyung aadanu ni-yambina?” Ni-yamayn.

²⁵Nigaayung nubagi nu-warubaj-gayn na-Jesus-duj, naagi-yung nu-waraynjul-magayn, nu-yandhawiwandi, “Runggal-yung, yangi-nyung yuga nubagi, ani-waṉbina-yinyung niga?” Ni-yamayn.

²⁶Nigaayung na-Jesus naagi-yung nu-yambalmayn, “Anaani anu-ḏayn anubani-yung-maynji ngandhalwulhang wubani wugargayag-guy, nga nganuuyn nubagi-wuy na-waḻyinyung-guy, anubani ana-marrya.” Dani-yung ni-yamayn na-Jesus. Ni-miyn anubani anu-ḏayn, nga ni-lhalwulhiyn, nga nu-yayn na-Judas Iscariot-guy, nubagi-yung yaga na-niwiyayung na-Simon-jinyung.

²⁷Nga nigaayung nu-marang-miyn, ana-marrya, nga ni-miyn, aḏaba ni-nguni, naagi na-Judas. Niga na-baḏirrnya-yung na-Satan ni-yanggi nigawi-wuy. Nigaayung na-Jesus nu-magayn na-Judas-guy, “Ba-yaarri, anubani nagang aadanu baaṉbang-jinyung, ba-yaarri, ba-nguḻu-nguḻubiyn,” ni-yamayn.

²⁸Warruburru-yung warra-mulung-arrgi-yung warra-waḻya-waḻya, bagu nga wurraambargalangi, anaani wurru-maḻaḻadi na-Jesus-inyung, anubani ni-yambini aadani-yung.

²⁹Mulung-arrgi-yung wurraaḻamin-jamijgini, anubani-yung nu-yambini na-Judas-guy, ani-yanggi yungguyung nguynju ani-mangi ngurrji yagu marrya, anubani-yung-jinyung wurru-marrbuy-maa anubani ana-angel anubani-yunggaj. Niga-waj yamba dagi-yung Judas aadani-yung niwu-narrangi anu-ṉuga, wugurraa yungguyung. Yagu warra-mulung-aynbaj yingga wurraaḻamin-jamaa ani-yanggi, nga ambaniini yungguyung warruburru-yung-guy warraambaambalalari-wuy warra-wurru-wurruj.