João 13:11-29

¹¹Towokane waro toexiryke morara tykase Jezu, “Aepytyã sã matose. Toiro mose tyyrypyry onurumekara tokurehse nase. Epypỹ saaro nase,” tykase Jezu eya xine.

¹²Morarame toto pupuru tukurikakehse ahtao tyya, tupõ tamuruse ropa eya. Meza pona typorohse ropa. Ynara tykase ynororo typoetory tomo a, —Menetupuhtou ynyrihpyry poko?

¹³Tuisa, ãko matose. Amorepatono ãko roropa matose ypoko. Zaero matose, oesẽkõme jexiryke,

¹⁴Ãmorepanekõme roropa jexiryke. Yrome anamotokõme sã opupurukõ ukurikano. Ysã ehtoko. Imehnõ pyno ehtoko. Imehnõ akorehmatoko roropa.

¹⁵Moro yrino onenerykõme. Morara exiryke moro ipoenohtoko.

¹⁶Ymotye pyra matose, ypoetoryme oexirykõke.

¹⁷Oesẽkõme ase yrome opupurukõ ukurikano, ysã imehnõ akorehmatohme oya xine. Morara ahtao tãkye exĩko matose moro poenopyryhtao oya xine.

¹⁸—Emero opoko xine kara ywy repe. Ynymenekatyã waro ase. Yrome pake Ritonõpo nymeropohpyryae ro jewokaneme toehse, “Mose, ymaro otuhkety jewokaneme toehse,” tykase pake.

¹⁹Sero poko ourutorỹko ase jewokara ro ahtao. Morarame morara toehse ahtao jenetupuhnõko matose Ritonõpo nymenekahpyryme. Morara exiryke jomihpyry anamonohpyra ase.

²⁰Zae rokẽ ase ynara karyhtao, ynenyokyhpyry pyno awahtao xine ypyno roropa matose. Morararo ypyno awahtao xine jenehpohpõ pyno roropa matose, tykase Jezu eya xine.

²¹Morarame tõturukehse tahtao samũ tykase ynororo tukurohtao. Ynara tykase ynororo, —Ajohpe pyra, toiro mose jewokãko nase, tykase Jezu eya xine.

²²Tõsenesenese toto oxime, owokato waro pyra toexirykõke.

²³Toiro ipoetory Jezu zamaro exikety. Imaro typorohse kynexine.

²⁴Tomary ke mokyro tykohmase Peturu a. Ynara tykase ynororo eya, —Ekaropoko eya, “Onoky ewokaneme nae?” tykase Peturu eya.

²⁵Eponarohme sã toytose mokyro Jezu a ekaropotohme, —Onoky mokyro oewokaneme? tykase.

²⁶Ynara tykase Jezu eya, —Zupãko ase zuaro oehtohme. Mosero mã jewokãko, tykase Jezu eya. Morarame wyi panõ tytohkase Jezu a. Tuhpase ahtao tokarose Juta a, Ximão Ixikariote mũkuru a.

²⁷Moro wyi panõ tapoise eya ahtao, Jezu zetũ tanỹse eya. Joroko tamuru omipona toehse. Mame ynara tykase Jezu eya, —Ehe axĩ ke ytoko oerẽtykyrỹpyry ekarota jũme rokene oerẽtykehtohme, tykase ynororo eya.

²⁸Yrome imehnõ Jezu maro exiketõ aomiry onenetupuhpyra toto.

²⁹Tytinerũkõ eraseme Juta exiryke, osepekahse rokẽ tonyohse tokarose eya xine. Tymõkomokãkara a tineru ekarose roropa tonyohse tokarose eya xine.