Yohani 13:11-29

¹¹Yesu amumanyili kala yula daamushengeti, ndi nongwa awombili naha, “Mwavosi yumwi mung'ala kala, ila yumu hela.”

¹²Pavawofuwili kala mawulu, kakusumbula yingwa yaki, kayikala pamesa, kavawombela, “Mufimanya fyendivagolili?

¹³Yumwi mukungema nenga Muwula na Bambu, yumwi mukuwomba nyanyi nongwa nenga mweni.

¹⁴Nenga muwula na Bambu wenu ndivawofua yumwi mawulu na yumwi mukudayila muyiwofuvi mwaveni mawulu.

¹⁵Ndiva gayila chilangushilu, yumwi mugoli kucha wugolili nenga.

¹⁶Nakaka nguvawombela, vavanda vavi vakomi ha kwa vabambu vawu na vanjagila vavi vakomi ha kwa yula yavalayishili.

¹⁷Mani muvamanya ava damuvi na ngiba pamugola.

¹⁸Afi fing'omba fya mwavosi yumwi ha, nenga ndiva manya vala ndivashawulili. Lakini Mayandiku yivayandikiwili yivawomba, ‘Yula yalili filivi pamu na nenga danshengeti.’

¹⁹Nenga ndivawombela filongu afi, fikali kufumbuka ponopa, fifumbuka muweshi kujumila kucha nenga ndi mweni.

²⁰Nakaka nguvawombela, yamupokela yula yindimulayishili akumbokela nenga na yula yambokela nenga akumpokela yula yanayishili.”

²¹Yesu pawombili filongu fila, ndima yimutama nendu kadeta, “Nakaka nguvawombela muyenu yumu dashengeti!”

²²Vandundami vayilola veni kwa veni, vamanya ha akumuwomba ghani.

²³Paveli na ndundami yumu Yesu yamtamili aveli kayikala pambali yaki.

²⁴Simoni Petili akamukupisheyi kwa mawoku pawomba, “Mudashi akumudeta ghani?”

²⁵Ndundami yula kaselela pabehi na Yesu kamudasha, “Bambu ghani ayu?”

²⁶Yesu kayangula, “Yula yindimupa chipandi cha libumunda chinikishilili ndi mweni. Pambeli katola chipandi cha libumunda kalikishila, kamupa Yudasi mwana wa Simoni Sikaliyoti.”

²⁷Yuda patolili libumunda lila, tepu, Lijangavandu limwingila. Yesu kamuwombela, “Chiwudayila kugola goli kalopu.”

²⁸Kwa hela mundu yayikalili pamesa yamanyili kucha wuli kamuwombela wula.

²⁹Yudasi aveli mkola mbiya, vamu vamanyili kucha Yesu akumuwombela mweni akahemeli findu fya lihungu awu kuvagayila vagaju findu.