Juan 13:11-29

¹¹Iena fécaitɨmɨena onona jira, Jesús jae daɨde “Nana dóñegaomoɨ.”

¹²Iaɨoɨ ɨdaɨ jócua méifodo, Jesús ie jinóidɨcuiro meine jɨtade. Güirábani abɨmo ráɨnaillanona daɨde: —¿Omoɨmo cue fɨnócafuena onódɨomoɨ?

¹³Omoɨ jae Llófueraɨmana, Ocuíraɨmana cue mamédɨomoɨ. Daɨí ñue daɨdɨ́omoɨ, nɨ́ɨmɨedɨcueza.

¹⁴Jae omoɨ Llófueraɨmadɨcue; jae omoɨ Ocuíraɨmadɨcue mei íadɨ omoɨ ɨdaɨ jocódɨcue. Afe izói danɨ conima ɨdaɨ omoɨ jocolle jitáirede.

¹⁵Jae ómoɨna fɨnócafuena onótatɨcue, cue fɨ́nua izói omoɨ fɨnóllena.

¹⁶Uáfuena dáɨitɨcue: Táɨjɨtatɨmɨe baɨmo jaide jaɨénicɨna iñede. Daje izói orédɨmɨe baɨmo jaide orécamɨena iñede.

¹⁷Aféfuiaɨ omoɨ onóadɨ, íemona afe izói ñiano, ióbificaitɨomoɨ.

¹⁸Omoɨri nana úriñedɨcue. Cue nɨzécamacɨna onódɨcue. Mei íadɨ Cuegáuai daɨna ñue fuitállena jitáirede. Cuegáuai daɨde: “Cue dɨga güitɨ́mɨe jae cue ícɨdote.”

¹⁹Afefue uícomo ómoɨmo llotɨcue afe íficaillɨruimo Crístodɨcue cuemo omoɨ ɨ́ɨnollena.

²⁰Uáfuena ómoɨna dáɨitɨcue, cue orécamɨena llɨ́ɨnotɨmɨe afe izói cuena llɨ́ɨnote. Cuena llɨ́ɨnotɨmɨe afe izói cue orédɨmɨena llɨ́ɨnote, —daɨde.

²¹Daɨí daɨna méifodo, Jesús jamánomo comecɨ zúucaide. Uáfodo jino llote: —Uáfuena ómoɨna dáɨitɨcue, ómoɨmona dáamɨe cue fécaite, —daɨde.

²²Ie jira llófuegamacɨ jɨáɨmamo eróricaidiaɨoɨ, onóñegaza budo úrite.

²³Llófuegamacɨmona dáamɨe Jesús ɨere izíruigamɨe. Afe güilláruido Jesús abɨmo ráɨide.

²⁴Simón Pedro íemo onócaɨdo llote: —Mai Jesumo jɨ́cano, ¿budo úrite? —daɨde.

²⁵Jira jofo áɨnozillano Jesumo jɨcánote: —Ocuíraɨma, ¿bu llotɨo? —daɨde.

²⁶Jira Jesús uai ote: —Daa pánllɨcɨna cue rɨáitano afémɨemo íitɨcue. Afe nɨ́ɨmɨe, —daɨde. Iemona pánllɨcɨna rɨáitano Judas Iscariote, Simón jitomo fecade.

²⁷Afe pan Judas llɨ́ɨnuamona, Taɨfe ie comécɨmo jofo jaide. Mei jira Jesús daɨde: —O fɨnóllɨfuena raɨre fɨno, —daɨde.

²⁸Júdasna daɨí daɨnáfuena güirábanimo güitɨ́nomona buna aféfuena onóñena.

²⁹Ucubellu Judas uícaiga jira dáamɨerie comecɨ facádiaɨoɨ: Jesús daɨíacade ráfuemo jitailla raana ɨ́bajitade. Jɨáɨmacɨ comecɨ facádiaɨoɨ, nɨbaɨ duéredɨno úcube afémɨe íllena.