Dion 13:11-29

¹¹Me ame wani iwa orup da me omine wapi me asigip tan menan anega wani, “E iragi kakae go orup daiton da kakae uon.”

¹²Wam ame pusimu bigi waritameni, me wanup entan mega pane amba at mega gapan sia ae wanden. Amba Iesu singui anega tayawamon, “E inayap dim da tanawa e anu awayan go uon?

¹³E Wadiaet ge Ayop dianek wanin ame tavewa di dianek wanin.

¹⁴Menan endi mame ne ayop wadiaet egawa pusia bigi warian, e ap mini pusia gare gare bigi wariwanian.

¹⁵Ne dim da tanawa ame guegue ta ewaen, e ap umap ta aisen.

¹⁶Ne tave di wadiaivin, nao taini apanewa ayop mega ya garawaseta, ap mini sep apanewa da watu eneni ya garawaseta.

¹⁷Endi mame iragi asik tayana, ame taiwaniampinawa God e wat atonat imaeta.”

¹⁸Iesu anega wan, “Ne da da om enuena, ne asiginap. Ne nop mame iragi inayap ya waivin, go orup daiton megenat. Ap menan ok watagetawa seane tavewa tauapen menan waivin, Orup da mapa taba nega den naini, me gariwa gamunap entani wan.

¹⁹Ya venaseni go ominana wani oisewa endi namu mame wadiaivin, menan wam ame venasepiwa e anu tumat tai ame God watu enanegeni ame ne me di.

²⁰Nop nega mondi uon anun di waivin. Waenapan da da dugup nega watu enamopena waupamopi ne den waupanek wanum. Amba waupanegepi Mamana watu enanegeni den waupiwanum.”

²¹Nop mame wani ewap Iesu bagu sisi guewa gapan anuni amba nop anega wan, “Ne tavewa di wadiaivin, e daiton da ominana wapen taiwanin.”

²²Me wa ewamot mega gare gare ase ma yayao mutan, anune imumu puk wan, ma da menan waiwan.

²³Yaumakamup wadiamot mega da, Iesu me menan anu guriniwa, Iesu mainep wanden.

²⁴Saimon Pita apan ame die anega wan, “Wayao ma da menan me waiwan?”

²⁵Apan ame Iesu gamup ase dave me singui anega tayaven, “Ayop, orup ansena da?”

²⁶Iesu gare wan, “Apan daiton da ameme wam mame ne buredi warap sip kundaun gapan kaum pisit antap enap wanapenawa ameme di.” Boge me buredi ware Diudes Iskeriot wanen.

²⁷Diudes taba wareni Seitan mek menawaet potap unugen, menan Iesu Diudes die anega wan, “Dim da tat anu taana menawaet di ta.”

²⁸Go mu da daiton ya di anu awane dimen Iesu manega me inap wan.

²⁹Koni ame Diudes wadiamot moni mugawa kwayupe me taiwandin menan, upi anune Iesu barip menan taba une tapen men inap nop waiwandat anun, go upi anune gare kayakayawan nagire munat anun.