Zone 13:11-29

¹¹Ele gilania tu Zisu si asa pu kote qorana, gua asa ke zama guahe si Asa, “Keke mo koa gamu si lopu via,” gua.

¹²Meke sipu beto ṉuzapi Zisu sari na nenedi, si va sage pulea Sa sa Nana poko hake ulue, meke la habotu pule Nana pa tevolo si Asa. Meke nanasi Sa si arini, “Vegua, gilania tugo gamu sapu gua tiqe tavetia Rau koa gamu?” gua si Asa.

¹³“Poza Nau Titisa na Baṉara gamu, meke hinokara mia tugo, sina gua tugo asa si Rau.

¹⁴Ego, be Arau, sa mia Baṉara meke sa mia Titisa si ele ṉuzapi sari nenemia, si ego, gamu ba mi tavete kekeṉoṉo gua tugo asa pa varikorapa mia.

¹⁵Ele va dogoroni gamu Rau sa Qua vina titila, gua asa ke mi tavete lulia sapu gua taveteni gamu Rau.

¹⁶Maqu tozi va hinokarani gamu: loke nabulu si ululu hola nia sa nana palabatu, meke loke tie ta garununa si ululu hola nia si asa pu garununa sa.

¹⁷Ego, kamahire si ele gilania gamu sa hinokara hie, ke kaqu ta manae si gamu, be tavetia gamu sapu gua asa!

¹⁸Ba lopu gamu doduru si guni gamu Rau, gilani Qua sarini pu ele vizati Rau, ba pude tava gorevura sapu zama guahe pa Kinubekubere Hope: ‘Sa tie sapu henahena turaṉae koa Rau si kukiti Nau sa si Rau,’ gua.

¹⁹Maqu tozi va kenueni gamu kamahire, sipu lopu ele ta evaṉa si asa, meke be pana ta evaṉa sa, si kote va hinokaria gamu sapu Arau si Arau tugo.

²⁰Maqu tozini gamu sa hinokara: asa sapu va kamoa si keke tie sapu garunia Rau, si va kamo Au tugo sa si Arau, meke asa sapu va kamo Au, si va kamo ia tugo sa si Asa pu garunau si Rau,” gua se Zisu.

²¹Sipu beto zama nia Zisu sapu gua asa, si ta duaṉa hola sa bulona, ke zama si Asa, “Maqu tozi va hinokarani gamu: keke koa gamu si kote qora Nau si Arau,” gua si Asa.

²²Ke vari doṉoi sari na disaepeli, meke pupuhu beto nia dia sapu esei si gunia Sa.

²³Ba keke ri kasa disaepeli sapu tataru hola nia Zisu, si habotu kapae nana koa Sa.

²⁴Ke sipua Pita si asa meke zama, “Nanasia ko, esei si gunia Sa?”

²⁵Ke rizu tata valeana la koe Zisu sa disaepeli asa meke nanasa, “Baṉara esei si gunia Goi?” gua si asa.

²⁶Meke olaṉa la ia Zisu si asa, “Kote poṉa ia Rau sa bereti, meke ponia koasa tie asa.” Ke hena ia Sa si keke kali bereti, meke poṉa ia Sa, meke vala nia Sa koe Ziudasi, sa tuna e Saimone Isikarioti.

²⁷Sipu hena tugo Ziudasi sa bereti, si nuquria mo Setani, ke zama la ia Zisu si asa, “Ego, ture tavetia tu sapu hiva nia goi!” gua si Asa.

²⁸Ba lopu keke koari kasa pa tevolo si hite gilania, sapu gua zama nia Zisu koa sa.

²⁹E Ziudasi sina tie kopu poata, ke balabala ia rina disaepeli sapu gina tozi nia Zisu si asa, pude la holui kaiqa toṉa, sapu hiva ni rini pude tanisa inevaṉa, babe poni sari na tie habahuala, gua.