Juan 13:11-29

¹¹Leezha nzhé xaa: “Naretlaka gu nzhul na”, snee nzhé xaa nel nela xaa xana xaa zaa xaa lo re xaa gut xaa.

¹²Gorna ngulo mdeeb Jesús nii re xaa, nu ngok xaa xab xaa nu mbare xaa roo mes stub welt nu nzhé xaa lo re xaa: —¿Che mla kwaan mle na yek gu?

¹³Lee re gu nii lo na Maestr nu Xaa Nabeyy, nu wen nle gu nii guya sbaa, nel nak naya.

¹⁴Mdeeb na nii re gu, nixa nak na Xmaestr gu nu Xaa Nabeyy lo gu, zee noka re gu nzhaal keeb nii wechxinn gu.

¹⁵Mle na kwaane, zee ne gu xomod nzhaal le gu, zee le gu kwaan mlu na lo gu.

¹⁶Wlipa na nii na lo gu, nik tub mos nanont mas ke xpatron xaa, nu nik tub xaa nanakt mas non ke xaa mxaal xaa.

¹⁷Chelee gu nla re kwaane yek gu, ble guya zee chul ded gu. Noka Jesús nzhé:

¹⁸—Nakazat na kwent cheen rese gu, nel nela na xana re xaa mleey na. Per nzhaal gak kwaan nkee lo Xkyech Dios: “Lee xaa kayaw kwaan na, gak xkontrad na”. Sal. 41:9

¹⁹Nii na kwaane lo gu, zee gorna gaka, zee wii gu lo na mod Xaa Mxaal Dios Nabeyy.

²⁰Wlipa na nii na, loka xaa wii lo xaa mxaal na, noka ngwii xaa lo na, nu xaa ngwii lo na, noka ngwii xaa lo xaa mxaal na.

²¹Gorna ngulo nzhé Jesús kwaane, tira nawent ngok lextoo xaa, zee nzhé xaa: —Wlipa na nii na, lee tub gu zaa na lo re xaa gut na.

²²Zee lee re nu, xaa mseed lo xaa, mzelo mwii lo wechxinn, nu nanet nu xana xaa kazet.

²³Lee na, xaa nkedoola Jesús, nzo xkwes xaa,

²⁴nu Simón Pér mle nseyn lo na zee nabdizh na, ne xana xaa kazaa xaa kwent.

²⁵Zee mbii na gaxra lo Jesús, nu mnabdizh na: —Xaa Nabeyy, ¿xana xaa ne?

²⁶Jesús mkeb nzhé: —Lebsii na tik pan, nu loka xaa za naya gaw, xaa zeeya. Gorzee mlebsii xaa tik pan nu mzaa xaaya lo Judas Iscariote, xgann Simón.

²⁷Nu gorna mzen Judas pan nu ndaw xaaya, gorzee mzeeb Maxuu lextoo xaa. Jesús nzhé: —Ble kwaan nzhaal le lu, zoza leya.

²⁸Per rese stub naz xaa, namlata yek chozhiin nzhé xaa kwaane lo Judas.

²⁹Judas nak xaa kwaan nzen xdemi re nu, nu lak xaa mle xgab, mxaal xaa xaa yazii xaa tub kwaan nkin re nu lo yalni o lo re xaa prob nyazaa xaa tub kwaan.