Juan 13:11-29

¹¹Uñadu Jesuge chema be ama kete gwadaleda, malen ama gerudu: “Ba gdaite ta me kle trate.”

¹²Jesu kwian geru jwannga ulita sera gligu ulita gire Jesu mo ñometralla gitiru gbuni naskuni modi, Jesu toiduni dba blingwage, Jesu gerudu: —¿Suge ba ulitage mineade cha ba sera gligu?

¹³Ba ulita kle cha kade ba tkanga tangle geruge, kaire ba kle cha kade ba chugagwalla, e ulia, cha ba chugagwalla cha ba tkanga tangle ba kle cha kade kare.

¹⁴Cha ba tkanga tangle geruge, cha ba chugagwalla, cha ba ulita sera gligu agali, ene kaire ba ulita daba sera gligadale, ba daba na sera gligadale daba na ba sera gligadale, ene ulita. Ba ulita me ñage mo gbe ma kweri daba nage, ba ulita mo ta gbadale diali mo chudaboi ongoru ongoru.

¹⁵Cha ba chugagwalla, cha mo ta gbu ba ulita chudaboi cha ba ulita sera gligu, ba ulita mo ta gbadale no ene kaire, ba ulita agedale cha agedu kare ba ole.

¹⁶Cha gerule ulia ulia ba ulita ole, kwian lle boanga me ma kweri mo chugagwallage, kwian geru dbanga me ma kweri mo kagangage.

¹⁷Uñale ba ulitage cha ba chugagwalla agedu mine ba gwa giti, ba agedale ene kaire, ba age ene cha agedu kare nga be suga no no badi diali.

¹⁸Jesu gerudu dare kwian geru jwannga amage ulita ole: —Cha me kle gerule ba ulita be mo ta gbe age no cha agedu kare, me ene, uñale chage ba ulita mi age no cha agedu kare. Cha ba ulita gau chage cha ole, cha ba ulita ta uñe trate, uñale chage ba gdaite kle mo ta dbe cha dollale, be boi Chube gerua degaba unsuialin gerule kare cha giti, chada e gerule: “Cha skatemanalla gdaite blire ule cha ole, amaña mo blite cha dollale.”

¹⁹Cha kle geru ai kete ba ulitage ngeru be boige, ene be boi cha ole chuia be chke gire be suge bage kle boi ulita cha gerudu kare, e giti ba ulita be cha gai ulia ma no dare cha Cristo cha Chube Kirolla.

²⁰Cha kwian chanu kage cha gerua dbe kwian nage, kwian na bai kwian chanu gai ngwange no, kwian ene me kle kwian chanu alin allabi gai ngwange no, kaire ama kle cha gai ngwange no agali kare kwian chanu giti. Kwian bai cha gai ngwange no kwian ene me kle cha alin allabi gai ngwange no, kaire ama kle cha kaganga gai ngwange no agali kare cha giti.

²¹Jesu gerudu ene ulita gire Jesu ta chegu ta olire tanre Judas-Iscariote giti, Jesu gerudu trate geru jwannga amage gdataboko giti gdaboke ole: —Cha gerule ulia ulia ba ulita ole, ba ulita kle aini ule cha ole gdaite be cha kete kwian cha dollalege gwaleda.

²²Jesu gerudu ene gire kwian geru jwannga gdataboko giti gdaboke ulita chegu gwage modige, ulita gerudu modige: —¿Chema be age me no ene Jesu ole? Me uñadu ama ulitage chema giti Jesu kle gerule.

²³Kwian geru jwannga Jesuge ulita kle toiba dba blingwage blire ule Jesu ole, kwian geru jwannga gdaite kle Jesu ngena blire geru trage Jesu ole, Jesu no no ama ole,

²⁴kwian geru jwannga ege Simón-Pedro ko ñachugu, Simón-Pedro takalin geru jwannga gdaite e geru kade Jesuge chema giti Jesu kle gerule be age Jesu gerudu kare.

²⁵Gire kwian geru jwannga kle Jesu ngena jo ma Jesudige geru kadadale Jesuge, ama gerudu Jesu ole: —Cha Chugagwalla, ba gerule cha ole, ¿chema be age ba ole ba kle gerule kare?

²⁶Jesu jaindunga: —Cha be pan bita gbe date bligda chiaske, kwian gdaite baige cha be pan bita e kete ama be gai ngwange be gute, kwian e be cha kete gwaleda. Jesu gerudu ene gire ama pan bita gbu date bligda chiaske ketu Judas-Iscariotege, ama Simón-Iscariote kirolla.

²⁷Judas-Iscariote pan bita gau ngwange pan bita gutu gire blike dolla Satanás talla chku Judas-Iscariote tale age ulita Satanás takalin kare. Jesu gerudu Judas-Iscariote ole: —Ba mo ta gbaba age cha ole, agede ene blike.

²⁸Jesu gerudu ene Judas-Iscariote ole gire kwian geru jwannga na ulita kledu blingwage amage me sugedu mineade Jesu kle gerule ene Judas-Iscariote ole.

²⁹Uñadu kwian geru jwannga ulitage Judas-Iscariote ama igi gdea mananga, malen ama gweale tañachugu Jesu kle gerule Judas-Iscariote ole lle gweale gige chui ollade chuia alin gutadale, na tañachugu Jesu kle gerule Judas-Iscariote ole lle gweale gige ketadale kwian bai me igi molenge.