San Juan 13:11-29

¹¹Laany guniiny “masquɨ gati iratit” pur ni nánny tú gún entriagu laany.

¹²Chi gulull gudiibny nii de xpɨnny, chiy gubíi gudacuny xabloyaany. Chiyru guriny lo mɨlly stuby ax raipny laadeb: —¿Ta racbeet xi zelo ni bannía laat?

¹³Laat rniit nare Maistrɨ ne Dad, ne guldíctɨ narenquɨpacay.

¹⁴Anre nare ni naa Maistrɨ ne Dad agudiibia niit, ziygacza riáld gúntɨ, quiibytɨ nii de saat.

¹⁵Abliuua laat xa ná par gúntɨ, te par gúntɨ zectiziac ni abaania.

¹⁶Laat nanldít dec nic tuby mos quɨt sacti mazru que xlámni nicza ni re lo xcuend tu stuby quɨt sactib mazru que ni bxiaald laab.

¹⁷Dichos laat belati racbeet ne gúntɨ zec ni caniia.

¹⁸’Quɨt caniitia pur irat te pur nare nánna tú de aguliaa. Per ná par gac zec ni rnii lo xquiits Dios rut rnii: “Lagac ni rquinné nare, abiecquilob contrɨ naa.”

¹⁹Caguixteetellga lot te par chi gac ziy ax chaldilaaztɨ dec narenquɨpacay ni aguniia laat.

²⁰Rguixteldía lot dec elquɨ ni gún cuend ni ixiaalda, laab cayunbɨ cuend nare. Ne ni run cuend nare, laab cayunbɨ cuend ni bxiaald naa.

²¹Chi gulull gunii Jesús ziy, quesentiand nalas bziienny, ax gudixteeny lodeb raipny laadeb: —Rguixtiia lot dec lagac tubytɨ gún entriagu naa.

²²Chiy guzulo rguiaa lo saa de xpɨnny. Quɨt racbeetideb tú pur caniiny.

²³Per tuby xpɨny Jesús ni quesentiand rcaazny, zubbɨ cueeny chi cayundeb cenqui.

²⁴Ax baany Simóny Bed seny lob par inabdiidxbɨny tú pur caniiny.

²⁵Chiyru gubigaxbɨ cuee Jesús ax gunabdiidxbɨny: —Dad, ¿túngui gún entriagu laabiu?

²⁶Jesús cuaibny: —Iguadxa lday guechtily. Chiy ni ideedani, laabɨy. Ax bguadxny lday guechtily chiy bdeednyni Judas Iscariote, llingaan Simóny Iscariote.

²⁷Horac ni cuáa Judas guechtilqui, biiu bɨndxab láanbɨ. Chiy raipy Jesús laab: —Ni ná par gúnu, gueeldzi baanni.

²⁸Per nic tuby de xpɨnny ni zubnény lo mɨlly quɨt gucbeeti xínii raipny laab ziy.

²⁹Ne cun laznaa Judas nuu bols mɨly, parzi nuudeb baandeb xgab dec nuudxa xi gunabee Jesús laab chasiib par laní, o nuudxa xi chadeedbɨ de ni ná probeen.