SAN JUAN 13:11-29

¹¹Uc'a une yuwi caxcone u xe u yäq'ue' tä c'äbä. Jin uc'a u yäli: “Mach poco anetla apetela”.

¹²Cuanta u pocbijob yoc, u xoji u buc, chunwäni tä cha'num tä mesa, u yälbijob: ―¿A wila cua' acä cherbetla?

¹³Anela a wälbenonla cache' Maestrojon y Ajnojalon. Utz chich cua' a wäle'la, uc'a jinon chich.

¹⁴Si no'on a Maestrojon y a Wajnojalon acä pocbet a wocla, che' chich c'änä a chenla täcä, a maläc poque' a wocla.

¹⁵Jin uc'a cä ye'betla ca' jini, uc'a ca' chich acä cherbetla, che' chich a chenla täcä.

¹⁶Totojtoj cälbenetla, ajpatan mach jin más ajnoja que u yum; ajtäsquinte mach jin más ajnoja que machca u täsqui.

¹⁷Ya'an ch'a'aljin ta'ala si a wila jinda y si a chenla.

¹⁸’Mach cälä jinda tuba apetela. No'on cuwi machcatac acä yaqui. C'änä pasic toj ca' chich tz'ibi tä jun ni u yäle' ca'daba: “Machca u mul c'uxe' waj t'oc no'on ca' a wälä u t'äbsi u tun'oc u juli täjcac'o”.

¹⁹Bada cä worin älbenetla cua' u xe u chen pasa, uc'a jinq'uin u xe u chen pasa, a tz'onänla cache' no'on chich ni aj Cristojon.

²⁰Totojtoj cälbenetla, machca u sapän ni cä täscunba, no'on une ni u sapänon, y machca no'on u sapänon u sapän täcä machca u täscon.

²¹Jinq'uin aj Jesús u yäli ca'da, ch'ocomi u pixan, u yäli: ―Totojtoj cälbenetla, untu de anelaba a xe a wäq'ue'on tä c'äbä.

²²De ya'i u yajcänt'anob u maläc chänen u jutob, uc'a mach yuwijob caxcone u yälbinte.

²³Untu u yajcänt'an aj Jesús ni tä' u yajna'tanba ya' t'ele an tu ch'ejpa aj Jesús.

²⁴Aj Simón Pedro u cherbi u c'äb najcänt'an ya'an tu ch'ejpa aj Jesúsba tuba u c'atben aj Jesús caxca une ni mu' u yälben.

²⁵Jinq'uin ni ya' t'ele tu ch'ejpaba u c'atbi ca'da: ―Cajnoja, ¿caxca une?

²⁶Aj Jesús u p'ali: ―Jin une, machca cä xe cä'ben maja' waj. De ya'i u maji waj, u yäc'bi aj Judas ajlo' taj Simón Iscariote.

²⁷Cuanta u c'uxi jini waj, ochi aj Satanás tuyac'o. Jinq'uin aj Jesús u yälbi: ―Ni a xe a chenba, seb a nonoj chen.

²⁸Niuntu ni ya'an tä mesaba mach yuwijob cua' uc'a u yälbi ca' jini.

²⁹U tulaj äli tu c'ajalinob cache' aj Jesús u yälbi que u mäne' cuaxca c'änä ta q'uin ch'uje o u yäc'ben cua' chichca pobrejilba, uc'a une u cänäntan ni ch'uji' taq'uin.