Gwa 13:11-29

¹¹Gi rixanu rumatlu samyokjerupa. Giyagni wane china, “Gi wa pejnurunekgi powra.”

¹²Giyagni rali gerkajixitletinitkana, wa rawamkatinitka, tuplatatnaka nikikowakaya. Wane chinna, “¿Gi ge gimatlu wa nixyawakgi?

¹³Gixa wane chinjetno, ‘Yimaklewatachri ga wa Gitsrukaachi.’ Wanepotuko nchina, gi rixanu Gitakni.

¹⁴Maka Gita wa Gitsrukaachino ga wa Yimaklewatachrino nerkajixitgi, gixa koxa gimkata gerkajixkakleta.

¹⁵Gi rixanu gyimanrupa nekakgitgi, gixa koxa kamrutyaplu nkamrutyagi.

¹⁶Galikakni, galikakni wane nchingi, wa wayegrechri gi wa rutsrukate pnute tsruni wale. Wa yokanatkaluru gi wa yokanatjeru pnute tsruni wale.

¹⁷Tyekaka gimatini, giglenshinikanyegitkalunepgi wa wane gixinipa.

¹⁸“Gi wa pejnurunekgi gixapirana wane nchina. Gita gimatna ginnanwa ntsomitanune, seyni poyagkaakalurupa satu tokanchi yonatkaluru, wane chinachri: Wa Gitayma jimapro nikachri rumtukno yokwireya.

¹⁹“Xanigognenanu nunkakgi ma mapookanuwa, wa rapokinipa galixanno Gita nixinri.

²⁰Galikakni, galikakni wane nchingi, wa nyokanatanru yoptotachri Gita yoptota. Ga wa Gita yoptotachri nyokanatjeru yoptota.”

²¹Wane chininitka Geso, kojwakanshinikanuta. Rupgujtalewata. Wane china, “Galikakni, galikakni wane nchingi, satu gixa nchininri wale samyokanno.”

²²Giyagni yimaklene getjekaka. Gi rumatanshinikanutna katupiranni wane china.

²³Waneru satu yimakleru Geso gishinikanru, Geso gitspanostatachri.

²⁴Giyagni Simo Petro gitnoyegitlu tye, wa repomgiyaplu katupiranni wane china.

²⁵Geso gitspanostatachri wane chinru, “Gitsrukaachi, ¿katni wale?”

²⁶Giyagni rugita Geso, “Waleni Gita genekanrupa psoji gigakachri.” Wale gigaklu psoji. Reneklu Gota Giskaryote, wa Simo wgene.

²⁷Psoji niklokinitka, Satanasyo jiglokatkalu. Giyagni Geso wane chinru, “Pkamrutanru giyampotu pkamrutanru.”

²⁸Gi satuna nikikowakaya tuplanatachine gimata klu chinanu wane chinru.

²⁹Gi rixanu pimrine kagwaklu wa Gota ktsapane rixinri, Geso wane chinru, “Pagjitanru wa walukanru meyiwlu chinanu, waka kwamonurune renekanu pagixanu.”