Jon 13:11-29

¹¹Iy ndratanan are lau handru kameh edeu sa-oh tan, ta idoh le ma iy eme asehek, “Bada ado ndra bele, arile jo basehek bada ado marakon bwe.”

¹²Iy sikine kati oro lau tan ano, iy eme atehei awin tan ili la-un ja, ma iy edek ili hamon manyah ili ndrahunen ja. Iy eme lelen oro lau tan, “Saba lakou jo ndramekes ndrawek tado, ado ndratanan sese deh bwe?

¹³Ado aloh jo ndramak ta leheya, ma Laban, mwasin handru ta ado aloh jo i buku doh, tasah, badeh jo amwenen.

¹⁴Jo Laban ma jo ndramak ta leheya, jo nane ndrasikine kati ado. Ado satudun nyara ado, mwasin ta ado kala kasikine kati nadu tine ado iri rayah ja.

¹⁵Jo leheya ado ta kandriyen mwasin, ta ado ari ari kamekes ki buku le jo nane ndramekes.

¹⁶Ado kanuhun kamwenen, iri lau bonyo-ou winiya basakalawi kabin tiri bwe, ma iri salibah ale winiyan bala bwena tare lau nane tiye iy eme ta amekes gok tan bwe ale.

¹⁷Idah ado ndratanan iri lakou marakon nane doh, ya Kindrei winiyan nyosowani ado i buku ado amekes iri lakou marakon doh.

¹⁸“Jo winiyan basehek ado marakon bwe, jo tanan are lau jo ndrandrei, arile sahou udu bolo buk ndrabun asehek, kameh asahan handru, tiye i buku doh, ‘Ndramak nane iy aimon nyamon hawek, iy le kameh edeu sa-oh tek.’

¹⁹“Lakou doh basahan bwe le, jo kasehek tado kere bwena ai, ano lakou barasahan hamon, i buku lakou doh asahan, idah kameh ma ado barabudon ai, jo iy ndramak nane iy udu le buku doh.

²⁰Ado kanuhun, jo tiye tado handru, are lau iy akohok ma aseben ndramak nane iy amekes lahou tek, idoh i buku none le iy akohok jo ma aseben jo ale. Ma are lau akohok jo, idoh i buku none le iy akohok Kindrei iy suni jo eme dah.”

²¹Sahou tan ano le bohon badeh, ndrinen eden ta tikisiy. Iy eme asehek sahou amwenen ili toro lau tan i buku doh, “Jo asehek sahou handru ewek tado, iy ari ereu bolo ado kede-eh kameh atehei jo ili mine iri lau ndra-in.”

²²Oro lau tan anuhun, ma mada oro ari i ta ari, tasah oro bala tanan ta are lau handru Jises asehek.

²³Lau ta Jises ari manyah udu hawen, iy lau doh Jises aso-ok iy labai.

²⁴Eme Saimon Pita ndrokonya batun ili ta iy lau nane ma iy asehek, “Kandremenya iy, are lau handru ale iy asehek iy doh?”

²⁵Iy lau tan ari nane dah sosokok ili mirihik ta Jises. Iy eme atehei batun ili batalan ma suburuk i tan, “Ndramak tinan, ou tiye tek, are lau handru?”

²⁶Jises anya, “Ou anyolom, jo kameh atehei jabi ramen ili bolo suw, ano kameh jo atehei ili nan, badeh, iy le ai.” Iy eme atehei jabi ramen ili bolo suw ano iy atehei ili na Judas Iskariyot nadu Saimon.

²⁷Judas andrei jabi ramen ano le badeh, balik ndrala bolo iri budon tan mara-ei ai. Jises anya, “Judas, ou ala. Saba lakou nane ou anya amekes, ou amekes suwi.”

²⁸Oro lau tan ado bada koyeu doh, oro anuhun Jises asehek sahou ili ta Judas, arile oro bakohok bolo sahou tan bwe.

²⁹Judas badeh, ta atondrok kohei ta luk, eme oro lau rayah anya Jises kede-eh tiye iy ta asih rayah nyamon ta len ndrabun aloh Pasoba nadeh, o, iy kili kedeu rayah lakou kili tiri lau, tiri lakou bwe nadeh.