Ioanes 13:11-29

¹¹E Isu i ta maea, a vuhuna i lohoka vona a viri bara i habi ia na limane huriki a bakovi hale, ra i mavonga i taki i uka ma e huriki lobo ri matapado.

¹²Na tahuna i vahilolo lobo a vahane ria, i rodo mulea a varakia vona, i hamule mai a murina. Lakea e Isu i nana ria, i ta maea, “A naro a ratea ne mua, mu matakilalea, o i uka?

¹³I kamumu mu gale iau ‘E Bakovi Dagi’, ‘A mari ni tovo’ a vuhuna i muholi a ngava ngi.

¹⁴Iau a Bakovi Dagi ne mua, a mari ni tovo ne mua, a vahilolo pali a vahane mua. Mua ranga, ngane a ngaru mu gu made palupu, mu vahilolo a vahane mua.

¹⁵A vakasiri mua pali, mu rata manga a hini a rata ne mua.

¹⁶A taki muholi mua, a vora i uka ma ge muga na matakari vona. A vinuru tara i uka ma ge matakari a viri i rudua.

¹⁷Ngane mu lohoka vona a ngava nga. Mua bara mu longo mai, bara mu vivi.

¹⁸“Iau i uka ma a taki mua lobo. A lohoka vona e huriki a bakovi a vulaki. Pali a maki ta ge bele, ge bele muholi a Hinere, i ta maea, ‘A viri miri vakani a bret, ia kunana a viri bara i rata hale iau.’

¹⁹“A taki mua vona muga, lakea na tahuna ge bele a maki iea, bara mu luhoi tora iau, ‘Iau kunana, ra Iau.’

²⁰A taki muholi mua, e rei a viri i tagui e huriki a rudu, i manga i tagui iau. E rei a viri i tagui iau, i manga i tagui a viri i rudu iau a valai.”

²¹Na tahuna e Isu i taki lobo a ngava nga, i lege a lohona, lakea i vakalongo ria, i ta maea, “A taki muholi mua, a viri tara ne mua bara i habi iau na limane huriki a pile.”

²²Lakea e huriki a murimuri ri vamatanono. Ri ngapa vona a ngava iea, e rei muholi a viri i takia?

²³A viri tara ne ria, ra murimuri e Isu i ngaru hatekea, i made tabukoi vona.

²⁴Lakea e Simon Petrus i longo rike lokovonga, i takia, “O nanea. E rei muholi a viri i takia?”

²⁵Lakea i doga rike ne Isu, i nanea, “Bakovi Dagi, e rei ge rata mavonga?”

²⁶Lakea e Isu i koli, i ta maea, “Ra viri ga lutua a bret, ga habia vona. Ia kunana.” Muri i lutua a bret i habia ne Iudas Iskariot, e tune Simon.

²⁷Na tahuna e Iudas i bolea a bret, lakea e Satan i dili vona. Lakea e Isu i takia, “A ra maki ta go ratea, o vano o rata malaviriria.”

²⁸Pali e huriki ri kakani i uka ma ri lohoka vona a ngava e Isu i taki virihia e Iudas vona.

²⁹I ranga e huriki ri luhoi e Isu i takia e Iudas ge kona a maki na habu, o ge habi a maki ranga ne huriki a matasia, a vuhuna i matakari a tava ne ria.