Yohanes 13:11-29

¹¹Yesus taki so bika A ben sabi kba suma bo seri En. Dat' meki A taigi den taki den alamala no krin.

¹²Di A kba wasi den futu, A weri En tap'sei krosi, dan A go sidon na En presi baka. Dan A taigi den taki: “Un ferstan san Mi du gi unu?

¹³Unu e kari Mi Meister nanga Masra, èn un abi leti, bika na dati Mi de tu.

¹⁴Efu Mi leki un Masra nanga un Meister, wasi un futu, dan un mus wasi makandra futu tu.

¹⁵Bika Mi gi un wan eksempre, fu un kan du leki fa Mi ben du gi unu.

¹⁶Fu tru Mi e taigi un taki: Wan knekti no hei moro en masra, èn wan boskopuman no hei moro a wan di seni en.

¹⁷Now di un sabi den sani disi, Gado sa blesi unu efu un du den.

¹⁸San Mi e taki no de gi un alamala. Mi sabi den sma di Mi ben teki. Ma a musu psa leki fa a skrifi ini a Santa Buku. A skrifi taki: ‘A wan di nyan Mi brede, opo en bakafutu fu trapu Mi.’

¹⁹Mi e taigi un a sani disi na fesi, fu te a psa un kan bribi tak' Mi de suma Mi de.

²⁰Fu tru Mi e taigi un taki: A sma di opo en doro gi a wan di Mi seni, e opo en gi Mi. Èn a sma di opo en doro gi Mi, e opo en gi a Wan di seni Mi.”

²¹Baka di Yesus taki den sani disi, A firi wan dipi sari, dan A taigi den taki: “Fu tru Mi e taigi unu: Wan fu unu o seri Mi.”

²²Den man fu En luku makandra ferwondru. Den no ben sabi suma A e taki.

²³Wan fu den man fu Yesus, a wan di Yesus ben lobi, ben de let' na En sei.

²⁴Dan Simon Petrus sori en fu a aksi Yesus suma A e taki.

²⁵So a man disi dribi go moro krosbei, dan a aksi Yesus taki: “Masra, suma na en?”

²⁶Yesus piki en taki: “Mi o dopu a pisi brede disi ini a komki, dan Mi o langa en gi a sma dati.” So Yesus dopu a pisi brede ini a komki, dan A langa en gi Yudas, a manpikin fu Simon Iskariot.

²⁷Di Yudas teki a pisi brede, Satan kon ini en ati. Dan Yesus taigi en taki: “Opo, go du es'esi san yu wani du.”

²⁸Ma no wan fu den trawan drape ben ferstan fu sanede Yesus taigi en a sani disi.

²⁹Yudas ben de a man di ben e hori a moni gi den. Dat' meki sonwan fu den ben prakseri tak' Yesus seni en fu go bai den sani di ben de fanowdu fu hori a Paskafesa. Trawan fu den ben prakseri tak' Yesus seni en go fu gi den pôtisma wan sani.