Juan 13:11-29

¹¹Netegahan i Jesus aw sinu se megtolok kandin, aw yan se doun te peg-ikagi din te kenà melinis se kedita dan.

¹²Penga te peg-onaw din te benis dan, nenaol sikandin aw limikò kidoen te lemisa. Penga niyan, minikagi sikandin, “Wedà niyo besi kelebeti aw eden se ininang ko gina diyà kenyo.

¹³Eg-ikagi kaw te siak se Menenoladà, aw egtewalen a niyo Pengolo. Neketotok iyan, so ontò a Pengolo niyo, aw egtoladà a kenyo.

¹⁴Nayan, pengkey siak se Menenoladà aw Pengolo niyo, meneng migpedanà a te kanak pegkeotawun aw mig-onaw a te kenyo benis. Yan keilangan megpedanà kaw heman te kenyo pegkeotawun aw megpeonaway kaw te benis niyo.

¹⁵Yan se ininang ko amon meg-iling kaw kanak.

¹⁶Eneng-enengi niyo se kagi ko kenyo. Se sineligan, kenà melangkaw diyà te amo din. Se sogounun, kenà heman melangkaw diyà te otaw simogò kandin.

¹⁷Aw kelebetan niyo se kebenalan intoladà ko den kenyo seini, yan ontò kaw meluba aw tomolò kaw kenyan.

¹⁸Meneng kenà kedita niyo se pinunuan ko kani. Netegahan ko aw eden se awop te pedowan te kedita niyo pinemallì ko, aw keilangan metoman se kagi te Timanem insolat, ‘Pengkey tomogen se sebad otaw kanak, meneng peelegen a din pa.’

¹⁹Mig-indan a den kenyo tepad kani te eked pa iyan ketoman, amon aw kitaen niyo se pegketoman niyan, memenal kaw te benal se inikagi ko tepad te pegkeotawun ko.

²⁰Eneng-enengi niyo se kagi ko kenyo. Aw megsagman se otaw te menge sogounun ko, segmanen a din heman. Aw megsagman se otaw kanak, segmanen din heman se Amay ko simogò kanak.”

²¹Penga te peg-ikagi i Jesus kenyan, ontò nelidò se pedowan din, aw minikagi, “Eneng-enengi niyo se kagi ko kenyo. Doen sebad kenyo megtolok kanak.”

²²Pegdineg te menge tinoledaan din kenyan, nepela dan aw migpetengtengay dan, so wedà dan ketegahi aw sinu se nepeselowan te inikagi din sìyan.

²³Se timangkil ki Jesus, yan se tinoledaan ontò nedekelan i Jesus te pedowan.

²⁴Kimapay si Pedro kandin, aw minikagi, “Insai si Jesus aw sinu otawi se nepeselowan te inikagi din.”

²⁵Yan minonsalig sikandin ki Jesus aw mig-insà, “Pengolo, sinu lay otawi diyà kenami se megtolok kamno?”

²⁶Timaba si Jesus, “Yan se otaw begayan ko te pan tapay imbawog diyà te lipong.” Penga niyan, migbawog si Jesus te pan, aw imbegay din ki Judas, batà i Simon Iscariote.

²⁷Penga te pegkinawà i Judas te pan, dimateng si Satanas diyà kandin. Minikagi si Jesus, “Eyasi se inangen nikaw.”

²⁸Meneng se menge doma tinoledaan kidoen te lemisa, wedà dan ketegahi aw eden se tod te inikagi i Jesus diyà ki Judas.

²⁹Si Judas se egtonggò te kwarta te kedita dan, aw yan se doun te mig-aneng-aneng dan te insogò sikandin amon mayad te menge kelidoan dan tepad te pista. Mig-aneng-aneng se doma te insogò sikandin amon memegay te kwarta diyà te menge otaw sagkep.