Xoão 13:11-29

¹¹Xesosi imarotapekari iua mĩkapiritakari, ininiã itxa: “Himakinika poirepeka. Ãtinokara kona poireri,” itxana.

¹²Ninoa kiti arokaãka atoko, ieretakari imãka inopinikiri. Ikanapiriã amesamoni. Ipimaãna: —Kinirepa narokatari hĩkiti?

¹³Hĩte akiriuãkatano nota “koerekareri.” Apaka hãkiriuãkatano “Apiananiri.” Atãopitikara hĩsãkire, kotxi ikara inakari nitxaua.

¹⁴Hĩauĩte, hõereẽkiri nitxaua. Iuaritika narokari hĩkiti. Hinitiri atoko niparĩkauata. Ininiã hãrokakititakakauako, kãkiti nitiri atoko hininiua.

¹⁵Noerekapekai hĩte erekari hĩkamini. Uatxa hĩkamariko nota kamakiti atokokana.

¹⁶Atão inakari nitxai. Nitiritxi iamotakori poiãori. Iauĩte apiari. Apaka kãkiti iokanatakari apiata. Iokanatakiti poiãori.

¹⁷Uatxa hĩte imarotari atão inakari hĩkamini. Hĩkaminiãri, hĩpoxokoniuata.

¹⁸—Kona himakinikani ikara atoko nitxai. Nimarotari nimereẽkini, txamari ia Teoso sãkire iõkatsopatakori iaõka apokapitikako. Itxari: Notakata komiri nikakari, iuakarako kamari maerekati notamoni.

¹⁹Uatxa iua himarotini apisapanika nisãpiretai hĩte. Ininiã nisãkire iaõka apokasaaki, himarotariko Teoso ãkiri nininiua nota.

²⁰Atão inakari nisãpiretai. Kãkiti nota iokanatakiti hĩtemoni hãpakapiniã, nota apaka hãpakapa. Hãpakapiniãno nota, hãpakapari apaka nota iokanatakari hĩtemoni —itxa Xesosi.

²¹Xesosi ikara isãpiretaãka atoko, ãkixinireẽ imatinaniuata. Itxana: —Ari, ãtikara hĩte sauaki mĩkapiritano nota.

²²Ininiã imoianariakori atamatakakaua. —Kiripa ikara atoko txatako? —itxana.

²³Iuasaaki Xesosi moianari itiretakiti papĩkaĩtota iuamoni.

²⁴Ininiã iuasaaki Simão Petro ieki itxa isona iuamoni. Ininiã Petro: —Pipimaãri iua: “Ĩkiripa ikara atoko txatariko iua?” —itxari.

²⁵Ininiã Xesosi tiretakiti pimaãri Xesosi: —Kiripa ikara atoko txatai? —itxari.

²⁶Ininiã Xesosi: —Komiri niãkakiti nisikakitikarako ikara atoko txanoko. Ininiã iuasaaki iãkari komiri. Eereka isikari Xotasi Isikariotximoni. Iua Xotasi Simão ãkiri.

²⁷Xotasi komiri inikasaaki, Satanasi ĩroã ixiniremoni. Ininiã Xesosi txari Xotasi: —Kinirão kamaka pinakiti pikamapoka —itxari.

²⁸Iuaã auakani ãkixinireẽ: —Kinirepa ikara atoko itxatari Xotasi?

²⁹Xotasi nĩkataro ninoa txineirote. Ininiã ninoa ãkixinireẽ: —Atxiĩti iokanatari iua komiri iamotini ĩkapani. Ãtipekana: —Atxiĩti iokanatari iua matiinimoni txineiro isikini ĩkapani —itxanãtana ãkixinireẽna.