Yon 13:11-29

¹¹Baing Yesu xabia gaxarea bagula ta bixuandi rimadingia, saing mana namua ba harua ba, “Ang asigixinga, ning ang longgalo te.”

¹²Sugua kidingdi laing sup, baing sau imanginoa muli saing goxoya mala yabania kabukabia. Xusungadi ba, “Axabia rangrang axa ngalibu mang?

¹³Ang gauxu nga ba ‘Lipu Tubatubaingam’ xaung ‘Toxoratamona’. Ang gaharua maringina, namua na nga naga.

¹⁴Tauna, nga Toxoratamona angia xaung Lipuxim Tubatubaingama, baing ina naga nabu ngasugua kimdi, bing asugua kimdi.

¹⁵Ngahatanga kigu babundi bu alibu mang bila ngalibu mang.

¹⁶Maxung sibuna ngabalang ba, lipu oxata olanggam yanoa dali lipuxing haringinoa yanoa te, saing uleginam yanoa dali lipua soxi mala ba yanoa te xauna.

¹⁷Axabia axadi li ba, binabu bagula ayaha nabu alibudi.

¹⁸“Ngaharua mang longgalo te. Ngaxabia lipuadi ngamogudi ba. Axa ngaharua mana ba bagula libu Urana Xuanoa aningona, harua ba, ‘Lipua xang rangua nga ba iti king tambonga ba ruha nga.’

¹⁹“Ngabaxanga nang hatata muga mana sok, bu bungina sok bagula ahatum haringina ba nga naga.

²⁰Maxung sibuna ngabalang ba, lipu gaxarea daxap lipua ngasoxi ma, bing daxap nga. Baing lipu gaxarea daxap nga, bing daxap ina soxi nga ma ba.”

²¹Yesu harua bila ba laing sup, baing gamona mauxana saing baxanga ba, “Maxung sibuna ngabalang ba, angia tela bagula ta nga bixuagudi rimadingia.”

²²Lipuxindi dinaxu mana dibagu haringina mading, dahasuxi ba harua mana gaxarea.

²³Dingia tela, Yesu lipuxindi dinaxu mana tela ina murung sibuna mana, rung rubinia.

²⁴Saimon Pita ting toxonoa na lipua ba saing harua ba, “Uxusunga harua mana gaxarea.”

²⁵Binabu lipua ba bigu mala rangua Yesu, saing xusunga ba, “Toxoratamona, gaxarea?”

²⁶Yesu haxuya ba, “Salanga hataina li ngatai mari minia ba, saing ngasina na lipua ba, bing lipua naga.” Baing ina naga, tai salanga hataina, saking sina na Yudas, Saimon Iskariot garanoa.

²⁷Yudas xap salanga, baing hata sibuna li Satan luxu mana. Yesu harua na ba, “Baraxinta ubo ba ulibu, bing ulibu sap.”

²⁸Ne adi dirung kabukabia ba, tela xabia namua mana haruanga Yesu harua na mana te.

²⁹Yudas lipua wasa mana siang tanganoa, binabu teladi dahatum ba Yesu bala ba gim axadi diraxap manadi mana Taungua, kimbo sina teladi na lipu haxugindi.