1Yinni Gusunɔ u nɛɛ, bɛɛ bèn tem mu tomɑ, i swɑɑ dɑkio i nɔ. I hɑniɑ koowo i tii dɑm kɛ̃. I susimɑ i kɑ ɡɑri ɡere, kpɑ su mɛnnɑ su wesiɑnɑ su ɡem kɑsu.
2Wɑrɑ u tɑbu durɔ ɡoo seeyɑmɑ sɔ̃ɔ yɑri yerun di mɑ u derɑ mi u duɑ kpuro u nɑsɑrɑ wɑ. Wɑrɑ u nùn bwesenu kpuro kɑ nin sinɑmbu nɔmu sɔndiɑ, mɑ u derɑ win tɑkobi yɑ bu munkɑ nɡe tuɑ, mɑ win tɛmɑ yɑ bu yɑrinɑsiɑ nɡe yɑkɑ si woo ɡɑ kɑ doonɑ.
3U bu nɑɑ ɡirɑ u ǹ wɑhɑlɑ wɑ. U dɑ sere mi win nɑɑsu kun yɛ̃.
4Wɑrɑ u derɑ yeni kpuro yɑ koorɑ. Nɛnɑ. Nɛ, Yinni Gusunɔ, nɛ, wi nɑ bwesenu kpuro seeyɑ sɑɑ toren di. Nɛnɑ nɑ ɡbiikoo, mɛyɑ nɑ kon mɑɑ wɑ̃ɑ sere kɑ bɑɑdommɑɔ.
5Be bɑ wɑ̃ɑ mi n tomɑ bɑ wɑ ye nɑ kuɑ mɑ bɑ nɑndɑ bɑ diirimɔ. Be wee bɑ mɛnnɑ bɑ susimɑmɔ.
6Bɑ sominɑmɔ. Ben bɑɑwure u win winsim sɔ̃ɔmɔ u mɔ̀, u hɑniɑ koowo.
7Dɑ̃ɑ dɑ̃ko u seko dɑm kɛ̃mɔ. Wi u dɑ̃ɑ wɔriɑsiɑmɔ u mɑtɑlɑkɑɡii dɑm kɛ̃mɔ. Bɑ mɔ̀, sii swɛɛbu bu wɑ̃. Mɑ bɑ bwɑ̃ɑroku ɡirɑmɔ bɑ kulum kpɑremɔ, ɡu ku kɑ wɔrumɑ.
8Adɑmɑ bɛɛ Isirelibɑ, bɛɛ be i sɑ̃ɑ Yɑkɔbun bibu, nɛn bɔrɔ Aburɑhɑmun bweseru sɔɔ, bɛɛyɑ nɑ ɡɔsɑ i n kɑ sɑ̃ɑ nɛn sɔm kowobu.
9Bɛɛyɑ nɑ sokɑ nɑ yɑrɑmɑ sɑɑ tontonden di. Nɑ ǹ bɛɛ biru kisi. Nɑ bɛɛ ɡɔsɑwɑ i n kɑ sɑ̃ɑ nɛn sɔm kowobu.
10Yen sɔ̃, i ku nɑndɑ, domi nɑ wɑ̃ɑ kɑ bɛɛ. I ku wururɑ i n yɑm mɛɛrɑ nɡe wɔnwɔndobu, domi nɛnɑ nɑ sɑ̃ɑ bɛɛn Yinni. Kon mɑɑ bɛɛ dɑm kɛ̃. Wee nɑ wee n bɛɛ somi, kpɑ n bɛɛ kɔ̃su kɑ nɛn dɑm.
11Be bɑ kɑ bɛɛ mɔru mɔ̀, bɑ koo burisinɑ bu sekuru wɑ. Be bɑ kɑ bɛɛ sɑnnɑmɔ mi, bɑ koo kɑm ko bu ɡbi.
12Bɑɑ ì n bu kɑsu, i ǹ bu wɑsi. Mɛyɑ be bɑ kɑ bɛɛ tɑbu mɔ̀, bɑ koo kɑm ko bu ɡbisuku.
13Domi nɛnɑ nɑ Gusunɔ bɛɛn Yinni wi u bɛɛ dɑm wɛ̃ɛmɔ. I ku bɛrum ko, nɑ bɛɛ somiru wee.
14Yɑkɔbun bweseru, bɛɛ be i tie i ǹ dɑm mɔ mɑ bɑ bɛɛ ɡɑrisi nɡe kɔkɔminu, i ku nɑndɑ. Nɛ, Gusunɔ Isirelibɑn Yinni Dɛɛro, nɑ bɛɛ somiru wee. Nɑ sɑ̃ɑwɑ bɛɛn fɑɑbɑ kowo.
15Wee, kon bɛɛ dɑm wɛ̃ nɡe nɑɑ tebo kpɔɔ ɡe ɡɑ sɔkiɑ mɔ, kpɑ i ɡuunu kɔsuku, i ɡunɡunu muniɑ muku muku nu ko nɡe yɑkɑ bii.
16I ko nu sɑrɑwɑ nɡe dobi, woo ɡu kɑ nu doonɑ, kpɑ woo ɡunɑ yu nu yɑrinɑsiɑ, kpɑ i nuku dobu wɑ nɛn min di, nɛ, wi nɑ sɑ̃ɑ bɛɛn Yinni Dɛɛro, kpɑ i mɑn bɛɛrɛ wɛ̃.
17Sɑnɑm mɛ bɛɛ nɛn tɔmbu i wɔnwɔndu soore i nim kɑsu i ǹ wɑ, mɑ bɛɛn yɑri yi ɡbere nim nɔrun sɔ̃, nɛ, Gusunɔ bɛɛn Yinni, kon bɛɛ nɔɔri. Nɑ ǹ bɛɛ derimɔ.
18Kon de dɑɑnu nu yɑri sɑɑ ɡuunun di, kpɑ bwii yi yɑri wɔwi sɔɔ, kpɑ nim bwenu kɑ dɑɑ koki yi koorɑ mi tem mu ɡbere, ɡɑ̃ɑnu ku rɑ kpi.
19Kpɑ dɑ̃ɑ ye bɑ mɔ̀ sɛduru kɑ ɑkɑsiɑ yu kpi mi, kɑ sere mɑɑ dɑ̃ɑ kikisu ɡɑsu kɑ dɑ̃ɑ ye bɑ mɔ̀ olifi, kɑ mɑɑ dɑ̃ɑ bɑkɑnu ɡɑnu,
20kpɑ tɔmbu bu wɑ kɑ nɔni, bu ɡiɑ mɑ nɛ, Gusunɔ Isirelibɑn Yinni Dɛɛrowɑ nɑ yeni kuɑ.
21Gusunɔ Isirelibɑn Yinni u nɛɛ, bɛɛ bũnu i kɑsuo nɡe mɛ i ko kɑ tii yinɑ. I sɔ̃ɔsimɑ nɡe mɛ i ko kɑ tii wɔrɑ.
22I nɑ i sun sɔ̃ ɡɑri yi i rɑɑ ɡeruɑ yellu, kpɑ sɑ n yɛ̃ yì n koorɑ, kpɑ su yin lɑɑkɑri ko. Ǹ kun mɛ, i sun sɔ̃ɔwɔ ye yɑ koo nɑ siɑ, kpɑ su ɡiɑ ì n dɑm mɔn nɑ nɡe nɛ Gusunɔ. I ɡeɑ ɡɑɑ koowo ǹ kun mɛ kɔ̃sɑ ɡɑɑ, kpɑ su wɑ su nɑndɑ.
24Adɑmɑ i ǹ kpɛ̃ i ɡɑ̃ɑnu ko. Bɛɛ kɑ bɛɛn sɔmɑ kpuro i sɑ̃ɑwɑ kɑm dirum. Wi u mɑɑ bɛɛ sɑ̃ɑmɔ ɡoo kun win mɛm kĩ.
25Wee nɑ ɡoo seeyɑ sɑɑ sɔ̃ɔ yɛ̃sɑn nɔm ɡeun di, mɑ u nɑ sɑɑ sɔ̃ɔ yɑri yerun di u sĩimɔ kɑ nɛn yĩsiru. U wiruɡibu tɑɑkumɔ nɡe pɔtɔkɔ, nɡe mɛ weke kowo u rɑ sɔndu suni.
26Wɑrɑ u yenin ɡɑri ɡeruɑ sɑɑ yellun di, su kɑ ɡere mɑ ɡɑri ɡeeyɑ. Goo kun yen ɡɑri ɡerure su sere nɔ.
27Nɛ, Yinni Gusunɔ, nɛnɑ nɑ ɡbiɑ nɑ sɔmɔ ɡɔrɑ u Yerusɑlɛmuɡibu lɑbɑɑri ɡeɑ sɔ̃.
28Nɑ mɛɛrɑ bũu ni sɔɔ, nɑ ǹ bũu ɡoo wɑ wi u nɛn ɡɑri ɡerumɔ. Nɑ̀ n ɡɑri bikiɑ, bũu ɡoo sɑri wi u koo kpĩ u mɑn wisi.
29Domi ni kɑ nin sɔmɑ nu sɑ̃ɑwɑ kɑm dirum. Nin bwɑ̃ɑrokunu nu mɑɑ sɑ̃ɑwɑ wom dirum.
