1Yawey nawu kawohrnan rowk yimeng, “Ngaye ngabenmarnekukbukkarrinj bedberre bininj nawu minj ngandidjawadjawayinj. Mak bininj nawu minj ngandiyawayi wanjh bedda ngandingalkeng. Ngabenmarnebukkarrinj bininj nawu minj ngandingeykayhmeninj kore kunbolkbubuyika bedberre. Ngayimeng bedberre, ‘Ngaye! Ngaye wanjh kondah ngahdi!’”
2Bu kunbarnangarrakuyeng ngabenmarnebidyirriyonginj, dja ngabengyirri bedberre bininj nawu ngandiwokwarnyakminj. Bedda wanjh kabirridjalkurduyime kunwarre. Bedda kabirridjurrkkarren kore kunmayali bedberre.
3Birrimekbe bininj wanjh bedda munguyh ngandimarnewokburriwe kore kumirrk ngardduk. Kaluk kabirrimarneboddan idols kore bedberre kunbolk, dja kabirrimarnekinje manbu manmanjmak kore altars nawu birrimarnbom brickskenh.
4Mak bedda kabirriningini kore kumihmimidj bu kabirridjalyirri molkkenh kumununkuyeng. Mak bedda kabirrikanjngun nawu bikkibikki, dja kabirridjalkanjkinje mayh nawu nawarrewarre ba kabirribongun kunkalkkid.
5Birrimekbe bininj wanjh kabirriyime, ‘Ngurridin djarreh. Yuwn bu kandimdarnhyikan. Ngad wanjh ngarrikukdjamun duninjh!’ Wanjh bedda yiman kundolng kamhbebme kukeb ngardduk, yiman kunak bu kadjalrung munguyh.
6Ngurrina! Kadjalbimbuyindi kore ngahnan bu kayime, ‘Ngaye minj ngadjalngurdme. Dja nakka ngabenmarnekarremulewan bedberre kunwarrekenh kabirrihkurduyime. Ngadjalwon rowk bedberre.
7Ngaye bun ngudberre kore kunwarre ngurrikurduyimi, dja kore nawu mawahmawah ngudberre birrikurduyimi.” Kunmekbe yimeng Yawey. Dja mak yimeng, “Bedda wanjh birrikinjeng mayh nawu bindiwoni idols kore kuwarddekimuk, dja wanjh ngandiyemikani ngaye kore kurrulumyahwurd. Wanjh ngaye yiman ngabendjalyakarrbun rowk kore ngabenbun bedberre.”
8Kuhni mak bu Yawey yimeng, “Bininj kabirrinan grapes manbu kunkalkkid kayo, dja kabirriyime, ‘Karribawo, kadjalmak nawu manrakel, dja yuwn karridjalwe. Med, walakkih wurd kunkalkkidmak kayo.’ Wanjh karohrok ngaye bu ngabendjalnahnan bininj nawu ngandimarnedurrkmirri. Ngaye minj ngabenbularrbun birridjalwern rowk.
9Ngaye ngabenmarnbun bininj nawu Jacob kabenmawahme, dja mak nawu Judah kabenmawahme, ba kabirribolkkarrme ngardduk kuwarddekimuk rowk. Birrimekbe nawu ngaye ngabendjarrngbun, wanjh kabirribolkmang. Ngaye nawu ngandimarnedurrkmirri, wanjh kabirriyo kumekbe.
10Ngabolkmarnbu kabbal kabolkngeyyo Sharon bu karralkwernmen ba sheep kabirrimirnderri kumekbe dja kabirringun. Mak ngabolkmarnbun kuwarddebarrarn kabolkngeyyo Achor, bu mayh kamirnderri kumekbe dja kamirndengehme. Bu kumekbe ngabenyolyolme ngardduk bininj.
11Dja ngaleng ngudda ngurribuyika nawu kandimunkebawong, dja ngurribengmidjdan ngaye ngardduk kubolkmak mandulum. Dja mak ngudda yiman ngurrimarneboddan idol kangeyyo Luck, dja ngurrikarrme mulil nuye idol nawu kangeyyo Fate!
12Wanjh bonj, ngaye marnbun bu ngudda ngurridowe kundjawalwi. Ngudda ngurrimankan kore ngundibun ngurridowe rowk. Bu kunmekbe ngaye kayhmeng ngudberre dja minj kandiwokmayinj. Mak bu bengyolyolmi dja nakka minj kandibekkayi. Ngudda wanjh ngurridjalkurduyimi kunwarre kore kumirrk ngardduk, dja ngurridjalyimeng kore ngaye ngawidnani.”
13Mah, bu kunmekbe kunu Yawey, nawu Kawohrnan rowk, wanjh kayime ngudberre, “Bininj nawu ngandimarnedurrkmirri, nakka kabirriworrkmen, dja ngudda nawu ngurriwarre bininj wanjh ngurrimarrwedowen. Mak bedda kabirrikomnjulme, dja ngudda wanjh ngurridjalkombukdowen. Bedda kabirridjalmarrmarr, dja ngudda wanjh kunyemi ngunmang rowk.
14Bininj nawu ngandimarnedurrkmirri wanjh kabirriwayini kunnjilngmak dorrengh dja kabirrikangemarrmarr. Ngudda nawu ngurriwarre bininj, wanjh ngurrikayhme dja ngurridjalnjilngwarremen. Mak ngurridjalnalkbun wernkih duninjh dja ngurrikangewarremen.
15Ngudda mak manbu kunngey ngudberre, wanjh bininj nawu ngabendjarrngun ngundingeywirrihme. Ngaye Yawey, ngawohrnan rowk, wanjh bun ngudberre, dja ngurriyakmen. Dja ngabenngeywon kunngeybuyika nawu ngandimarnedurrkmirri.
16Nangale bininj nawu kabenmarneyime kunwok kunmak nawu kabirrihni kumekbe kunbolk, wanjh nakka ngankayhme ngaye God nawu kawokdi kunwoybuk. Dja bininj kore kunmekbe kunbolk, bu kadjare kawokkurrmerren, wanjh kawokkurrmerren kore kunngey ngardduk, God nawu kawokdi kunwoybuk. Kaluk kuhni bu ngabengmidjdanj kunwarre bedberre bu kerrngehkenh.
17Ngurrina! Ngaye ngayawoyhbolkkerrngehme mahni kaddum dja kondah kurorre. Dja mak ngadjalbengmidjdan kunwarre nawu bininj birrikurduyimi bu kunkareni. Minj ngayawoyhburrbun.
18Bu ngaye ngabolkmarnbun rowk, wanjh ngurriwernhnjilngmarrmarrnin munguyh. Ngaye ngayawoyhbolkkerrngehme Jerusalem ba ngurridjalnjilngmakmen, dja bininj nawu kabirrihni, wanjh ngaye ngabennjilngmarnbun.
19Ngaye warridj nganjilngmak bu ngaburrbun Jerusalem, dja ngabenmarnemarrmarr bu ngabenburrbun nawu kabirrihni kumekbe. Minj nangale kayawoyhnalkbun kumekbe, dja minj nangale kanalkbun bu kunnjilngwarre dorrengh.
20Kaluk minj kabirridowe nawu birribarrken. Mak nawu bininj kabirridarrkid bu djal kunkuyeng. Minj nakohbanj duninjh karrowen bu nungka djalngudjmak. Bininj rowk wanjh kabirridjalkohbanjmen duninjh yiman kudjewk 100 bu minj kabirridow! Bininj kunubewu karrowen bu minj 100 yimerrangimeninj, wanjh kabirriyime nakka kunubewu kidni.
21Bedda nawu bininj kabirrihni wanjh kabirrirurrkname dja bedmandeleng kabirriyo. Bedda kabirridudjeng manrakel, dja bedmandeleng kabirringun manbu manbarnem ngalengngarre.
22Minj mak kuhni kabirriname kunrurrk dja kabindimarnebawon birribuyika bininj bu kabirriyo. Dja minj kabirridudjen manmekenh ba bu kabindiyibawon birribuyika bininj bu kabirringun manbu manbarnem. Minj kuhni kabenmarneyawoyhkurduyimerran. Ngaye ngardduk bininj wanjh kabirridjalmimbi kunkuyeng duninjh yiman kayime bu kundulk kadjalmimbi. Bedda nawu ngabendjarrngbun bininj, wanjh kabirrinjilngmarnburren kore kabirrikurduyime kunbidwi bedberre.
23Minj mak kabirridurrkmirri bu djal burudjang. Minj mak kabindiyawoyhyawmang wurdwurd nawu kabirriwarrewarremen. Ngaye nawu Yawey, wanjh ngabendjalmarnekurduyime kunmak bedberre dja warridj nawu bedda kabindimawahme bininj.
24Ngaye ngabenbangmebekkan bedberre bu yerre kabirridi yiwarrudj. Bu minj birribangmeyakwoyi kore birridi yiwarrudj, wanjh ngabenbekkan rowk.
25Bu kuhni kayimerran rowk, ngaye ngamarnbun mayh nabang dja nawu kelebuk wanjh kabirridjarrkngun kunmodmikenh dorrengh, yiman nawu lamb dja wolf. Dja nawu lion wanjh kadjalngun kundalk yiman bulikki. Kaluk nawu nayin nakka kahdjalngun kundjulng. Kore ngaye ngardduk kunwarddekimuk kubolkdjamun, wanjh minj nangale kabiwarrewon nabuyika bininj, dja minj nangale kayime kunwarre.” Kunmekbe rowk yimeng nawu Yawey.
