1परमप्रभु यावेमी “गो आं कली मतुइक्ब आन कली माल्ब सेल्तामी। आं कली ममाल्बमी आं कली थित्तीमी। आं नें मथीब रागी ङा मुर आन कली गो ‘गो एके बाक्ती। गो एके बाक्ती’ दे माइक्तामी। रोमी १०:२०
2गो काइ मटीब मुर आन कली नाक्त रे आं गुइ हाम्शा वारच पाइक्चा माल्ता। मेकोपुकी आंम आन दला दाक्स पा मरिम्शो लां ला खोइक्तेक्म। रोमी १०:२१
3मेको मुरपुकीमी आं कली गेना हना यो गाइक्पाइक्स ङा गाइक्पाइक्स पा फू बारीम चढ़ेनीम। इंटा तारी धूप चोइनीम।
4मेकोपुकी तुरस आगाम बाक्शा, ख्रुंइसीशा नां सोंइताम। मेकोपुकीमी पोव़ श्ये ब्वाइनीम। आन ग्योंबुम ग्रांग्रा दिशो श्ये क्येनीम। यसैया ६६:१७; लेवी १:७
5मेकोपुकीमी ‘गे मेके उइ बाक्कीन। आंइ नेक्था मपिने। मारदे हना इन थिशो मजाइनुङ’ देंनीम। मेकोपुकी आं कली मरिम्शो रिना पाइश्शो कुन खोदेंशो दुम्शा, गेना हना यो ब्रशो मी बाक्नीमी।
6कोव़ङीन, आं ङोंइती मार ब्रेक्शो बाक्त देंशा हना ‘गो सिक्सी पा मबाक्नुङ। तन्न गो क्येक्क लेत्नुङ। गो थमा पा क्येक्क लेत्नुङ’।
7गो इन मरिम्शो पशो नु इन किकी पिपी आन मरिम्शो पशो कालेमी क्येक्क लेत्नुङ। मेकोपुकीमी डांडा तार धूप चोशा, आं कली शुक्शी पाइक्तीमी। मिनु गो इन पशो आ क्येक्क लेत्नन्नी” दे परमप्रभु यावेमी देंत। मारदे हना मेकोपुकीमी डांडाम धूप चोशा, पहाड मेर आं पर्बम शुक्शी लोव़ पाम्तेक्म। मेको आन पशो पाप आन थुकुम प्रिंशा क्येक्क लेत्नुङमी।
8मिनु परमप्रभु यावेमी “दोपा अङगुर आगाम रस बाक्बा, मिनु ‘मेको कली मताइक्चा, रस बाक्ब’ देंनीमी, मोपा मबिग्रेचा कली आ आगाम आसीक बाक्ब। गो मेको आं गेय पाइब आन पर्बम मोदेंशो पाइनुङ। यसैया ६:१३; उत्पत्ती १८:२६-३२
9मिनु गो याकूब आ चच युइ रे जाक्पाइक्नुङ। मिनु यहूदा आ थर ङा आं डांडा ताइब मुर ग्रुंइनुङ। मेको आं योव़शो मुर आन के दुम्शा, आं गेय पाइब आन बाक्तीके दुम्ब।
10मिनु शारोन आं मुर आन क्यारश भेडा योव़तीके नु आकोर माइश्शो दिंमम बी ब्यफ जोपाइक्तीके दुम्ब। मेको आं कली माल्ब आन कली दुम्ब। यसैया ३३:९; यहोसु ७:२६
11तन्न गे परमप्रभु यावे कली प्रोंइबपुकी, आं योव़शो डांडा प्रेंबपुकी गाद देवता कली चढ़ेतीके सेल्नीनी। मिनु गे मेनी देवी कली ब्वाइश्शो तूतीके चढ़ेनीनी।
12गो इन कली तरवारम साइक्पाइक्चा कली जिम्मा गेनन्नी। गे क्योरपांइसीचा कली गुर ब्वेनीनी। मारदे हना गो इन कली ब्रेत्तुनु, गे आं लोव़ मलेत्तीनी। गो लोव़ पङानु, गे मनेंनी। गो आं ङोंइती मरिम्शो नु आं मदाक्शो गेय ला योव़शा, पाइतीनी” देंत। यसैया ६६:४; येरमीया ७:१३
13मोपतीके परमप्रभु यावेमी “आं गेय पाइबपुकी जचा ताइनीम। गे चहिं शोव़लु बेक्नीनी। आं गेय पाइब तूचा ताइनीम। गे चहिं तूतू दाक्शा बाक्नीनी। आं गेय पाइबपुकी ग्येरनीमी, गे चहिं मुने दोक्नीनी। यसैया ५५:१
14आं गेय पाइबपुकी थुंम ग्येरसीशा, कुम्सो पाइनीमी। गेपुकी चहिं श्येत जशा, इन थुं लुक्च लशा खाइश्शा, वाइ ब्रेश्शा ङाक्नीनी।
15आं योव़शोपुकीमी सराप पची ना इन नें थीनीम। मिनु नोले गो परमप्रभु, परमप्रभु यावेमी इन कली साइक्नन्नी। तन्न आं गेय पाइब आन कली नक नें वोइक्नुङमी। यसैया ६२:२
16मिनु सु सुम रागीमी आसीक पुंइनीमी, मेकोपुकी थमा सुइक्चा पुंइसीब परमप्रभु आ नेंमी आसीक ताइनीम। मिनु रागीमी सु सुमी कसम जाइनीमी, मेकोपुकीमी थमा सुइक्चा पुंइसीब परमप्रभु आ नेंमी कसम जाइनीमी। मारदे हना ङोंइती ङा श्येत नुप्शा, प्रेंने थुम्शो बाक्नीम। मिनु आं ङोंइती रे ख्रुंइसीशो बाक्नीम। यसैया १९:१८; येरमीया ४:२
17मिनु गो नक सरीङ नु नक रागी सेल्नुङ। ङोंइती ङा नेल्ल प्रेंशा, लेंशा मारेइ ममिम्सीब। यसैया ६६:२२; २पत्रुस ३:१३; प्रकाश २१:१
18गेपुकी आं सेल्शोमी शुश ग्येरसीने। मारदे हना गो यरूसलेम कली कुम्सो पपाइश्शा, आ मुर नेल्ल आन कली ग्येरपाइक्नुङमी। यसैया ६६:२२; यसैया ३५:१०; यसैया २५:८; प्रकाश २१:४
19गो यरूसलेम तशा ग्येरसीनुङ, आं मुर आन कली तशा, आं थुं ग्येरशा प्रेक्ब। मेना मेकेर ङाक्शो नु श्येत जशा ङाक्शो मनेंसीब।
20का निक्शी नाक्त ला ब्रोंइब आल मेकेर मबाक्नीम। मिनु मेकेर सुइ यो खूशो दुम्चा क्येङा ङोंइती मबेक्नीम। सहे का बर्स ब्रोंइशा बेक्ब कली ठिटा देंनीम। मिनु सहे का बर्स मगाप्थु, बेक्ब मुर कली ‘सराप रशो मुर का बाक्त’ देंनीम। जकरिया ८:४
21मेकोपुकी खिं सेल्शा, बाक्नीम। मिनु मेकेर अङगुर ख्रुम्शा, ग्येरशा ब्वाइनीम। यसैया ६२:८
22आंम आन सेल्शो खिंमी अरु मबाक्नीम। आन ख्रुम्शो अङगुर अरुम मब्वाइनीम। आं मुरपुकी रवा खोदेंशो पा शुश बर्स ब्रोंइनीम। आं योव़शो मुरपुकीम आंम आन गुइ ङा गेय ग्येरशा जाइनीम। ब्यवस्था २८:३०; अय्युब १४:७
23मेकोपुकीमी मोशा गेय मपाइनीम। श्येत जपाइक्चा कली आल मथीनीम। मारदे हना मेकोपुकी परमप्रभु यावे आ आसीक ताइब आन आल बाक्नीम। मिनु आन आल मेको नु बाक्नीम।
24मिनु गो मेको आन पुंइचा क्येङा ङोंइती, लोव़ लेत्नुङमी। आन लोव़ पन पना नेंनुङ। यसैया ३०:१९; यसैया ५८:९
25मेना फर नु पाठा काथ काथा जोइनीसी। गुप्सम चहिं ब्यफोम खोदेंशो पा पराल ब्वाइब। बुस्सुम खप जाइब। आं योव़शो डांडामी मारेइमी मरिम्शो मपाइनीम” दे परमप्रभु यावेमी देंत। यसैया ११:६-९; उत्पत्ती ३:१४
