Ekistos 35

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Iwe, Moses a emwichafengeni ekewe chon Israel meinisin o üreniir, “Ikkei än ewe Samol mi Lapalap allük ngenikemi pwe oupwe föri.

²Lon wonu rän oupwe föri ämi angang, nge ewe afisuen rän epwe eu ränin sapat mi pin ngenikemi, eu ränin asösö fän iten ewe Samol mi Lapalap. Eman mi föri och angang lon ei rän epwe ninnila.

³Ousap kaküw ekkei lon leniemi meinisin lon ewe ränin sapat.”

⁴Iwe, Moses a üreni ekewe chon Israel meinisin, “Ikkei än ewe Samol mi Lapalap allük ngenikemi:

⁵Oupwe uwato eu alilis fän iten ewe Samol mi Lapalap seni mine oua eäni. Eman mi fangafangöch seni lelukan epwe uwato an alilis fän iten ewe Samol mi Lapalap: kolt, silifer me piras,

⁶mangaku mi arauarau me parachol me parapar, pwal mangaku mi pwechepwech, mangaku seni ülöülen kuuch,

⁷silin ätemwänin sip mi kapar me silin man mi mürina, pwal pap seni ewe irä akasia,

⁸noppuk fän iten ekewe lamp, uän irä mi pwokus me chön fän iten löön epit, pwal fän iten apach mi pwokus,

⁹fau aüchea itan oniks me sokun fau aüchea fän iten elingen ewe üf itan efot, pwal fän iten ewe chechen leupw.”

¹⁰“Iwe, ekewe mwän meinisin mi lipwäköch le angang me leimi repwe feito o föri meinisin mine ewe Samol mi Lapalap a allük: ewe imwenfel

¹¹me eimweimwan seni mangaku, pwölüpwölün me ökkükün, papan me ömwöchün, üran me alongun,

¹²ewe pworofel fiti ämwärin me öppüngün, pwal ewe cheech mi pwölüpwöl

¹³ngeni ewe chepel fiti ämwärin me pisekin meinisin, ewe pilawa mi pin,

¹⁴pwal ewe lenien atittin epwe asarama ewe leni me pisekin meinisin, ekewe lamp me noppuk seni föün olif fän iten alölör pwe repwe tin,

¹⁵ewe rongen asoren ötüöt fiti ämwärin, ewe löön epit me ewe apach mi pwokus, pwal ewe cheech fän iten asamalapen ewe imwenfel seni mangaku,

¹⁶ewe rongen asoren kek fiti äpäwunan seni piras, ämwärin me pisekin meinisin, ewe sepien töttöl me motongan,

¹⁷ewe tit mangaku fän iten ewe leni lükün ewe imwenfel, ekewe ür me alongur, pwal ewe cheech fän iten asamalapen ewe leni lükün ewe imwenfel,

¹⁸chüfölün ewe imwenfel me chüfölün ewe leni lükün, pwal ekewe säl,

¹⁹ekewe üf mi ling fän iten ekewe souasor mi angang lon ewe leni mi pin, ikkei ekewe üf mi pin fän iten ewe souasor Aaron me nöün kewe mwän, pwe repwe üföüf le föri ar angangen souasor.”

²⁰Iwe, ekewe aramasen Israel meinisin ra feila seni fän mesen Moses.

²¹Mürin ra liwinto eman me eman fän mefien letipan, pwal fän püsin an mochen, o uwato ar alilis ren ewe Samol mi Lapalap fän iten ewe imw mangaku ia aramas ra churi Kot ie me angangan meinisin, pwal fän iten ekewe üf mi pin.

²²Iwe, ra feito mwän me fefin. Ir meinisin ra uwato mwärämwär, ierring, ringen won pau, lälä me sokopaten fout ren mochenin letiper. Iteiten eman me eman a fangala an fout seni kolt ngeni ewe Samol mi Lapalap.

²³Nge chokewe mi wor rer mangaku mi arauarau me parachol me parapar, pwal mangaku mi pwechepwech, mangaku seni ülöülen kuuch me silin ätemwänin sip mi kapar me silin man mi mürina, ra uwato.

²⁴Iteiter meinisin mi tongeni alisi ren silifer me piras ra uwato ar alilis ren ewe Samol mi Lapalap. Nge iön mi wor an pap seni ewe irä itan akasia mi öchiti ewe angang ra uwato.

²⁵Iwe, ekewe fefin mi lipwäköch le föri terech ra uwato terech mi arauarau me parachol me parapar, pwal mangaku mi pwechepwech.

²⁶Ra pwal föri terech seni ülen kuuch ren mochenin letiper.

²⁷Nge ekewe meilap ra uwato fau aüchea itan oniks me sokun fau aüchea fän iten ewe üf itan efot, pwal fän iten ewe chechen leupw.

²⁸Ra pwal uwato uän irä mi pwokus me noppuk fän iten ekewe lamp, fän iten löön epit pwal fän iten apach mi pwokus.

²⁹Iwe, ekewe aramasen Israel meinisin mwän me fefin mi mochen ra uwato ar alilis ren ewe Samol mi Lapalap seni mefien letiper fän iten ewe angang meinisin ewe Samol mi Lapalap a allük ngeni Moses pwe epwe fis.

³⁰Mürin, Moses a üreni ekewe aramasen Israel, “Iei ewe Samol mi Lapalap a filätä Pesalel nöün Uri we mwän, nge Uri nöün Hur seni ewe ainangen Juta.

³¹Iwe, Kot a fen ngeni Pesalel Ngünün o fang ngeni an tufich me tipachem me silelap, pwal tufichin föri sokopaten angang meinisin,

³²pwe a sip le ekiekietä mettoch mi fö. Iwe, a sile angang ngeni kolt, silifer me piras,

³³a pwal sile angangen nechei fau aüchea pwe repwe maseöchülong lon lenier, pwal angangen fala irä me sokopaten angang.

³⁴Iwe, Kot a pwal atufichi Pesalel me Oholiap nöün Aisamak we mwän seni ewe ainangen Tan, pwe repwe lipwäköch le aiti ngeni aramas met ra sile.

³⁵A amasoueer ren tufich le föri sokopaten angang, pun ir sousile sokopaten angangen pau me chon ekiekietä mettoch mi fö, pwal chon chü mangaku mi arauarau me parachol me parapar, pwal mangaku mi pwechepwech, pwal chon tür. Ir ätekewe mi sipeöch le angang me ekiekietä mettoch mi fö.