1Eme Mose e Israe kikefuŋ jaŋe ʒeŋgoma hetumaŋ‐joparâ ʒiŋuc jazawec: “Wofuŋ e wiac kecʒiŋuc eniŋte ŋaza mutâc ewec:
2Ʒoaŋ gie bapa 6 ira gie banʒepieŋ, â ʒoaŋ namba 7 ira ine Wofuŋte hombaŋ ŋenʒepieŋ. Moc e ʒoaŋ ira gie baocmu e qâhâmonʒepieŋ.
3Ŋoŋe sabata hombaŋko ficŋeŋicko ʒoc moc mi ruqenʒepieŋ.”
4Erâ Mose e Israe ŋicguru kikefuŋ qâqâhâc sâko ʒiŋuc jazawec: “Wofuŋzi wiac kecʒiŋucte dâŋ ŋaza mutâc ewec:
5Wiac foŋarekac irecnec gâcne rorâ Wofuŋte taha râenʒepieŋ; moc e maŋticnezi mutâcnecneme sâc Wofuŋte taha ʒiŋuc bafisizejec: Gol, siliwa, aeŋ bâbâroŋ,
6qoruc furi sâko keŋkeŋne â bâbâroŋ â âmuc âmucne â fâfâsâc, erâ noniŋ kanʒaŋne,
7â lama ŋicnere sahac peŋ bâbâroŋzi rikekicne, erâ noniŋ sahacne â jâmiŋjâc,
8erâ lambere wokemaŋ â rurua wokemaŋ â hosâc âsu ririke irec wiac âsu biaŋ.
9Erâ qoqonaŋ â qâ irec biŋe qânâ furi sâko bâbâroŋ erâ qânâ furi sâko gâcne mâmâc.
10“Erâ ŋoŋeraonec metâ bapare fuŋne mamana ŋic jaŋe warerâ, Wofuŋzi wiac muwec i bafârenʒepieŋ, ine ʒiŋuc: Tiri boze,
11erâ sâpe â bupu‐ticne, heheawic â katapa â babasanaŋ erâ wâtuŋ râqâc‐ticnehec mâmâc.
12Erâ qorac tapa katapa reŋ wiac‐ticnehec, katapa tapane â ââketâc qoruc,
13erâ tebo reŋnehec â râqâc wiac‐ticne erâ poroŋ furu mukicne,
14erâ lambe dodomane â wâcwiac‐ticne â lambe â lambere wokemaŋ,
15erâ hosâc âsu ririkere alata reŋticnehec, erâ rurua wokemaŋ â hosâc ririkere wiac âsu biaŋ erâ tiri boze motâcte ââketâc,
16erâ qowi bâzi ririkere alata irec sac â reŋ erâ gie bapare wiac‐ticne sasawa erâ wiac ʒuʒure râqâc kikenehec,
17erâ hae ʒoŋare sâpe irec qoruc â wâtuŋ â wâtuŋte râqâc erâ hae ʒoŋa motâcte qoruc,
18erâ tiri boze â hae ʒoŋare fâzâ â mucticne,
19erâ tirificko gie bapare ŋaqi ba akic ehuc bakicne, taha bapa Aroŋte tiri ŋaqi hâcne, erâ ŋokâfâcne jaŋere tiri giere ŋaqi mâmâc.”
20Dâŋ iŋuc jazame Israe ŋicguru kikefuŋ ʒeŋgoma jaŋe Mosere maionec ratâmirembiŋ.
21Erâ maŋjeŋiczi bufahac qajarewec jaŋe risierâ tutumaŋ qoruc boze bapa â maŋnao gie bapa â tiri ŋaqi irec wiac i Wofuŋte taha bafisi‐fârembiŋ.
22Ŋic mecne ŋokac mecne maŋjeŋiczi esoc qafeŋ ejarewec jaŋe kubu â sarasa â pâŋi warawa â megâŋ mahec, erâ maŋguc eri wiac gâcne gâcne golzi bakicne i Wofuŋte taha bafisimbiŋ hâcne.
23Erâ qoruc furi sâko keŋkeŋne â bâbâroŋ, fâfâsâc â âmuc âmucne, erâ noniŋ kanʒaŋne â lama sahacne peŋ bâbâroŋzi rikekicne â noniŋ sahacne fojarewec jaŋe sasawa wiac iŋuc bafisimbiŋ hâcne.
24Â moc e siliwa me aeŋ bâbâroŋ râeocte manasuweczi wiac i Wofuŋte taha bafisiwec, â moc e jâmiŋzi wiac bapa irec biŋe jâc focneweczi bafisiwec wâc.
25Eme ŋokac qoruc bapare fuŋne mamana jaŋe qoruc furâ bafisimbiŋ, qoruc furi sâko keŋkeŋne â bâbâroŋ â fâfâsâc â âmuc âmucne.
26Erâ maŋjeŋiczi bufahac qajarewec ŋokac i jaŋe sasawa noniŋ kanʒaŋnezi qoruc fumbiŋ.
27Eme micne jaŋe ine qânâ furi sâko bâbâroŋ â qânâ furi sâko gâcne gâcne bafisimbiŋ, qoqonaŋ ŋaqi â amecte qâ irec biŋe.
28Erâ tatamacte wokemaŋ â ruruare wokemaŋ erâ hosâc âsu irec wiac furi sâko, âsu biaŋ â wokemaŋ i mâmâc bafisimbiŋ.
29Ine hâcne, Israe ŋic ŋokac sasawa jaŋe Wofuŋzi gie baniŋte Mose âzâcnewec irec wiac i maŋjeŋiczi baafec‐jopawec sâc buafec jaha Wofuŋte taha bafisimbiŋ.
30Eme Mose e Israe ŋic ŋokac ʒiŋuc jazawec: “Manaŋgopieŋ, Wofuŋ e Juda guruonec ŋic moc ʒâŋene Bezalele, Hurure ŋokâ Urire ŋosa hâcne e ʒâŋene muhuc rowosâewec.
31Ehuc Mâro‐ticne qikiŋnecneme eki maŋ baafec ecneme ŋic meafec â maŋɋârâŋ â metâ bapare fuŋne mamana tarahec ewec.
32I wiac bâbâfuare mamanasu gie baocte, ehuc gol â siliwa â aeŋ bâbâroŋzi wiac ba akic ehuc baocte,
33erâ qânâ bâjomireocte â jâc fasaeocte â wiac sasawa ba batakire eocte iŋuc ecnewec.
34Erâ e Daŋ guruonec ŋic moc, ʒâŋene Oholiabe, Ahisamac ere ŋokâ hâcne, jahe ŋic gâcne wâc qazu‐jarenicte mamana qikiŋne‐jactewec.
35Metâ qâreŋ ba eric ehuc bapa ŋic jaŋe qoruc furi sâko keŋkeŋne â bâbâroŋ â âmuc âmucne â fâfâsâc irec faio eri wiac baeŋgopieŋ, me qoruc bapa me wiac i me i bapa jaŋe gie‐jeŋic baeŋgopieŋ, irec sâcko jâmbâŋ gie‐jekic banicte tâpiri râe‐jactewec hâcne.
