Éxodo 35

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Moisés bela Israel-dulemarse gochad, geb degine amarga sogded: “Weyob Bab-Jehová igar uksad, weyob be imakmaloye:

²Ibanergwa (6) arbalegoed, ibagugledgindi (7), iba-islidikidid. A-ibagi, Bab-Jehováʼga obunnolegoed. Ar doa-dule a-ibagi arbaele, we-dule oburgwilegoed.

³Bemar-neg-yagine, bipisaale obunnoged-ibagi soo be ogaosurmalad.”

⁴Moisés, bela Israel-dulemar-danar-ambikunonikidga weyob sunmaksad: “Bab-Jehová sogsad: ‘Weyob be imakmaloye:

⁵Bemar ibmar-nikadi Bab-Jehováʼga be sedamaloed. Dulemar na e-gwagegi ibmar Bab-Jehováʼga ukbi-itomaladba ibmar sedagoed. We-ibmarmar sedagoed: Olo, mani, esgoro-gordikid.

⁶Nirbadub-arad, nirbadub-suir-akwagiid, nirbadub-ginnid, linoʼdub-nued, sibad-e-absarmar,

⁷sibad-wawaad-machered-e-ukamar-ginnidgi-odolegaled, ibdurgan-uka-nuegan, urgomar-acaciaʼye-nugad.

⁸Olivo-gwallu gwallu-ogaegar. Gwallu-wawad ibmar-magega guegar, degi, olivo-gwallu ina-wawadikmaladgi ebulegegar.

⁹Akwa-nuegan-óniceʼye-nugmalad, akwa-nuegan mor-efodʼye-nugad-birgi nasikegar, degi, mor-binasgargi-nasiklegedgi nasikegarbar.’ ”

¹⁰Moisés Israel-dulemarga sogdebalid: “Bela Bab-Jehová-ibmar-sogsad-sobmalaga, bela dulemar bemar-abargi nue-ibmar-wisi-sobemalad nonimalo.

¹¹Amar we-ibmarmar sobmaloed: Bab-Dummadse-goled-neg-sunna-seleged, e-neg-sunnad, e-uas-mormar, e-mor-gamalad, e-urgomar, e-suarmar, e-buarmar, e-sigmalad.

¹²”Deginbali, sobmarbaloed: Bab-Dummad-Israel-Dulemarbo-Igar-Mesisad-Ulu, e-suarmar, e-eduged, mor-dummad-Ulu-walik-naguoed.

¹³”Deginbali, sobmarbaloed: Mese, mese-suarmar, bela mesegi-ibmar-ebulemalad, degi, madu-Bab-Dummadga-ukleged.

¹⁴”Sobmarbaloed: Gwallu-sied, degi, bela eba ibmarmar-ebulegoed. E-gwallumar, degi, olivo-gwallu gwallu-ogaegar.

¹⁵”Sobmarbaloed: Ina-wawadikid-inciensoʼye-nugad-ogumakleged-aila, degi, e-suarmar. Gwallu-wawa ibmar-magega ebuleged, ina-wawadikmalad. Mormar-dummagan Neg-Sunna-Seleged-e-yawagak-dogedgi-naguoed.

¹⁶”Sobmarbaloed: Bab-Dummadga-ibmar-ogumakar-ukleged-aila, e-esgoro-gordikmalad-biir-biir-megoed, degi, e-suarmar, bela eba-ibmarmar-ebulegoed. Dii-sied-esgoro-gordikidbiid, degi, a-e-malimar.

¹⁷”Sobmarbaloed: Bab-Dummadse-goled-neg-sunna-seleged-e-galugi mormar-dummagan-ebirmaloed, e-buarmar, e-sigmalad. We-neg-sunna-seleged-e-neg-e-galu-dogedgi mor-dummad-naguoed.

¹⁸We-neg-e-bargamalad, e-galu-bargamalad, e-dubmar sobmaloed.

¹⁹Aarónʼga, degi, Aarón-masmalaga, Bab-Dummadse-goled-neggi-mormar-ebulemaloed sobmarbaloed. Bela we-ibmarmar sobmaloed.”

²⁰Degidgine, bela Israel-dulemar Moisés-asabin-bukmaladi ainiarmalad.

²¹Bela dulemala, bela na e-gwagegi-ibmar-ukbi-itosmaladi, Bab-Dummad-dulemarbo-ambikued-neg-sobmalaga, agi-bela-ibmarmar-ebulemalad-sobmalaga, degine, dule-irwa-Bab-Dummadse-goledgi mor-islidikid-yomalad-sobmalaga, Bab-Jehováʼga ibmar searmalad.

²²Bela ibmar-ukbi-itosmaladi, machergan, degi, omegan-ugakse, we-ibmarmar senonimalad: Ordub, oluamar, sakwagi-ormar-nagumalad, argangi-or-yolemalad, degi, bela ormar-galagwensuli senonimalad. Belagwable Israel-dulemala Bab-Jehováʼga or senonimalad.

²³Bela dulemar nirbadub-arad-nikamalad, nirbadub-suir-akwagiid, nirbadub-ginnid, linoʼdub-nued, sibad-e-absarmar, sibad-wawaad-machered-e-ukamar-ginnidgi-odolegaled, ibdurgan-uka-nuegan, senonimalad. Bela-dulemar we-ibmar-nikamaladi, Bab-Dummadga-ukega senonimalad.

²⁴Bab-Dummadse-goled-neg-sunna-selegedgi ebulegega, dulemar mani-nikamaladi, esgoro-gordikid-nikamaladi, Bab-Jehováʼga ukdemalad. Degine, urgomar-acaciaʼye-nugad-nikamaladi, ukdemarmogad.

²⁵Deginbali, omegan-ibmar-nue-wisimalad, e-argangi-dub-sobsamaladi, Bab-Dummadga senonimalad: Nirba-dub-aradgi-sobsamalad, nirbadub-suir-akwagiidgi-sobsamalad, nirbadub-ginnidgi-sobsamalad, degi, linoʼdub-nuedgi-sobsamalad, senonimalad.

²⁶Bela omegan ibmar-nue-imakmaladi, e-gwagegi nue-imakbi-itosmaladi, sibad-e-absarmar sobsamarmogad.

²⁷Israel-dulemar-dummaganga-gudidimaladi, akwa-nuegan-óniceʼye-nugad, degi, akwamar-nuegan, mor-efodʼye-nugadgi-nasikmalaga, degi, mor-binasgargi-nasikleged-birgi-nasikmalaga, senonimalad.

²⁸Deginbali, we-ibmarmar senonimarbalid: Ina-nuegan, olivo-gwallu gwallu-ogaegar, gwallu-wawad ibmar-magegar, degi, ina-wawadikmalad obupurmakegar.

²⁹Bela Israel-dulemar, machergan, degi, omeganse-bakale, na gwagegi-ibmar-ukbi-itosmaladi, Bab-Jehováʼga na e-itogedba-ibmar-ukega senonimalad, adi, Bab-Jehováʼga ibmarmar sobegar. Ar igi Bab-Jehová-Moisésʼga-sogsagusa, deyob imaksamalad.

³⁰Geb degine, Moisés Israel-dulemarga sogded: “Nue be an-itomalo. Bab-Jehová, Uri-machi-Bezaleel onugsasad. Bezaleelʼde, Hur-e-wagwad. E-dad-dummad-Judáʼgi danikidid.

³¹Bab-Dummad Bezaleelʼga E-Burba uksad, nue-binsaed-nikaa guegar, nue-ibmar-mag-ito guegar, nue-ibmar-wisi guegar, degi, ibmar-akar-akar-obinyegar.

³²Adi, ibmar-yeerdakle orgi-sobegar, manigi-sobegar, esgoro-gordikidgi-sobegar.

³³Deginbali, nabir akwa-nuegangi-arbaegar, akwa-nuegan ibmar-birgi siegar, nabir urgomargi-arbaegar, degi, galagwensuli ibmar-yeerdakle imakegar.

³⁴”Bab-Dummad Bezaleelʼga, degi, Aholiabʼga nabir-dulemar-odurdaked-gurgin uksad. Aholiab Ahisamac-e-machid, e-dad-dummad-Danʼgi danikidid.

³⁵Bab-Dummad Bezaleelʼga, degi, Aholiabʼga, we-gurginmar uksad: Nabir baisursunna-ibmar-imaked, nabir-ibmar-onoged, nabir nirbadub-aradgi-ibmar-sobed, nabir-nirbadub-suir-akwagiidgi-ibmar-sobed, nabir-nirbadub-ginnidgi-ibmar-sobed, nabir-linoʼdub-nuedgi-ibmar-sobed-gurgin, uksabalid. We-dulemala, ibmar-yeerdakle sobmaladid, mormargi arbamaladid, degi, nabir na-e-itolegedba sunna ibmar-akar-akar onomaladid.”