Kessaabaa 35

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Muusee Israa7eela asaa yaa7aa muliyaa shiishshidi hagaadan yaagiis; “Intte oottana mala, GODAI azazidobai hagaa:

²Saaminttaa giddon usuppun gallassa xalaalan oosuwaa oottite; shin laappuntta gallassai intteyyo geeshsha gallassa; GODAAYYOOKKA shemppo Sambbata. He gallassi ai oosonne oottiya uri ooninne haiqqanau bessees.

³Sambbata gallassan intte son son tama eettoppite” yaagiis.

⁴Muusee Israa7eela maabarau muliyau hagaadan yaagiis; “GODAI hagaadan yaagidi azaziis:

⁵Intteyyo de7iyaabaappe GODAAYYO immiyoobaa ehiite; GODAAYYO immiyoobaa ehaanau koyiya ooninne worqqaa, biraa, nahaasiyaa,

⁶salo milatiya qacinaa, ochchaa teeraa milatiya qacinaa, shololla zo7o qacinaanne liiqo liinuwaa, deeshshaa agoziyaa,

⁷dorssa orggiyaa calaa zo7o qalamiyan yeggi kessidoogaa, irppaniyaa, guuganttaa,

⁸xomppiyaassi wogaraa zaitiyaa, tiyettiyo zaitiyaanne ixaanaa sawettiya qimamiyaa;

⁹eefuudiyaaninne tiran wottiyoogan yeggiyo maragidiyaa geetettiya shuchchatanne hara phooliya al77o shuchchata eho.

¹⁰“Intte giddon de7iya kushe hiilla eranchcha ubbati yiidi, GODAI azazido ubbaa oottona:

¹¹Xoossaa Dunkkaaniyaa, a kammiyo dunkkaaniyaanne a kammiyoogaa, qapheta, xagaageta, hiraqota, tuussatanne eti eqqiyo gedeta,

¹²Taabootaanne a tookkiyo kasota, atto giyo sohuwaa qum77uwaanne Taabootaa genttiyo magalashuwaa;

¹³xaraphpheezaanne a tookkiyo kasota, a miishshata ubbaanne GODAA sinttan wottiyo geeshsha oittaa;

¹⁴xomppiyaa wottiyo ballaanne an maaraara de7iya xomppeta, miishshata, xomppiyaa zaitiyaa,

¹⁵ixaanaa cuwayiyo saaxiniyaanne a tookkiyo kasota, tiyettiyo zaitiyaanne sawiya ixaanaa, Xoossaa Dunkkaaniyaa penggiyaa magalashuwaa;

¹⁶xuuggiyo yarshshuwaa yarshshiyoosaanne a nahaasiyaa zazzariyaa, a tookkiyo kasotanne a miishshata ubbaa, nahaasiyaappe oosettida meechcha keriyaanne a wottiyoogaa;

¹⁷so dabaabaa godaa magalashota, tuussatanne eta gedeta, dabaabaa soo giddo geliyo penggiyaa magalashuwaa;

¹⁸Xoossaa Dunkkaaniyaa toliyo xisheta, dabaabaa giddo xishetanne eta wodorota;

¹⁹qeeseti Geeshsha Sohuwan oottiiddi maayanau dadettida maayota, qeesee Aarooninne a naati qeesetettaa oosuwaa oottiiddi maayiyo maayota oottona” yaagiis.

²⁰Hegaappe guyyiyan Israa7eela maabarai ubbai Muuse sinttappe kiyiis.

²¹Kiyidi immanau koyidaageetinne eta wozanai eta imma imma giidoogeeti ubbai yiidosona; yiidi Xoossaa Dunkkaaniyaassi, a giddon oottiyo ooso ubbaunne geeshsha maayuwau koshshiyaabaa ubbaa ehiidosona.

²²Immana koyida attuma ubbainne macca ubbai yiidi, worqqaappe medhdhido alleeqota, haittaa gutuchchata, migidota, qooriyan aattiyo gujjumatanne worqqaa alleeqota ehiidosona; ehiidi GODAASSI imo oottidi immidosona.

²³Salo milatiya qacinai, ochcha teera milatiya qacinai, shololla zo7o qacinai, woikko liinuwaa giyo liiqo qacinai, woikko deeshshaa agozee, dorssa orggiyaa calaa zo7o qalamiyan yeggi kessidoogee, woikko irppanee de7iyo asai ubbai ekkidi ehiis.

²⁴Biraa woikko nahaasiyaa immanau danddayiya ubbai bantta imuwaa GODAAYYO immidosona; qassi guuganttai de7iyo asai ubbai dumma dumma oosuwau guuganttaa ehiis.

²⁵Kushe hiillaa eriya maccaasai ubbai bantta kushiyan suqqido salo milatiya qacinaa, ochchaa teeraa milatiya qacinaa, shololla zo7o qacinaanne liiqo liinuwaa ehiidosona.

²⁶Qassikka imuwaa immanau koyida maccaasai ubbai deeshshaa agoziyaa daddidosona.

²⁷Halaqati eefuudiyaaninne tiran wottiyoogan wottiyo maragidiyaanne hara bonchchettida shuchchata ehiidosona.

²⁸Eti qassikka xomppiyaayyo, sawiya ixaanaayyoonne tishshaassi haniya wogaraa zaitiyaanne qimamiyaa ehiidosona.

²⁹Israa7eelati asai ubbai, attumainne maccai, eti oottanaadan GODAI Muuse baggaara azazido oosuwau haniya imuwaa ubbaa bantta dosan GODAYYO ehiidosona.

³⁰Muusee Israa7eela asaa hagaadan yaagiis; “Be7ite; GODAI Yihudaa zariyaappe Huura na7aa na7aa, Uura na7aa, Baxaali7eela dooriis.

³¹Dooridi GODAI a Xoossaa Ayyaanan, hiillan, akeekaaninne ooso ubbaa oottiyo eran kunttiis.

³²Hegeekka hiillan oosuwaa halchchuwaa kessidi, worqqaappe, biraappenne nahaasiyaappe dumma dummabaa i oottanaassa.

³³Hegaadankka, al77o shuchchaa massidi giigissanaassa; mittaa massanaassanne ubba qommo oosuwaa hiillan oottanaassa.

³⁴Hegaa bollikka qassi ayyoonne Daana zariyaa Ahisamaaka na7aa Oholi7aabayyo, hara asaa tamaarissiyo eratettaa immiis.

³⁵Eti ubba qommo ooso oottanaadan, hiillan oottiyaageeta, oosuwaa halchchuwaa kessiyaageeta, salo milatiya qacinan, ochchaa teeraa milatiya qacinan, shololla zo7o qacinaaninne liinuwaa qacinan alleequwaa daddiyaageetanne shimainneta gidanaadan, GODAI eta eratettan kunttiis. Eti ubbaikka ubba qommo oosuwaa luxidi eriya eranchcha gididosona.