1Sar imar dokerďa o Šalamun savore buča pre le RAJESKERO Chramos, ľigenďa andre o sentne dari peskere dadeskere le Davidoskere. O rup, o somnakaj the savore veci thoďa paš o barvaľipen andre le Devleskero Chramos.
2Paľis o Šalamun zvičinďa andro Jeruzalem savoren kmeňoskere the fajtakere vodcen, hoj te preľidžan le RAJESKERI Zmluvakeri Archa andral o Foros le Davidoskero, andral o Sion.
3Avke pes zgele savore murša andral o Izrael paš o kraľis, sar sas o inepos andro eftato čhon.
4Sar sas imar zgele savore Izraelike vodci, o Leviti hazdle upre e Archa
5a ľidžanas la andro Chramos. O rašaja the o Leviti ľidžanas o Sentno Stanos the savore sentne veci, so sas andro Stanos.
6O kraľis Šalamun the savore Izraelike manuša, save pes zgele ke leste angle Archa, dine ajci but bakren the dobitkos, hoj pes aňi na delas te zgenel.
7Paľis o rašaja ľigende le RAJESKERI Zmluvakeri Archa pre lakero than andro Chramos, andro Neksentneder Than a thode la tel o kridli le cherubengere.
8Lengere kridli sas rozcirdle upral oda than kaj sas thoďi e Archa a garuvenas la the lakere dručki.
9O dručki sas ajse džinďarde, hoj lengere agora dičholas andral o Sentno Than, ale avral len na dičholas. Ode hine dži adadžives.
10Andre Archa sas ča o duj barune tabli, so ode thoďa o Mojžiš akor, sar o RAJ phandľa e zmluva le Izraelitenca pro verchos Choreb, sar avle avri andral o Egipt.
11Paľis o rašaja gele avri andral o Sentno Than. Savore rašaj, save ode sas, pes obžužarde andre služba, či sas pre lende o šoros abo na.
12Savore Leviti, save giľavenas – o Asaf, Heman the Jedutun lengere čhavenca the pašutnenca – ačhenas pre vichodno sera le oltaristar. Sas urde andro loko pochtan a bašavenas pro cimbali, harfi the citari a šel the biš (120) rašaja trubinenas.
13Ola, save trubinenas the ola, save giľavenas, jekhetane lašarenas le RAJES sar jekh jilo le bašavibnaha the giľavipnaha: “Ov hino lačho; leskero kamiben ľikerel pro furt.” Andre oda e chmara pherarďa calo Chramos le RAJESKERO.
14Prekal odi chmara o rašaja našťi kerde peskeri buči, bo le RAJESKERI slava pherarďa calo Chramos le Devleskero.
