1Paľis o Chizkija vičinďa calo Izrael the Judsko a pisinďa ľila the le kmeňoske Efrajim the Menašše, hoj te aven andro Chramos andro Jeruzalem te oslavinel e Patraďi pre pačiv le RAJESKE, le Izraelike Devleske.
2O kraľis pes dothoďa le vodcenca the savore manušenca andro Jeruzalem, hoj andro dujto čhon oslavinena e Patraďi.
3On la našťi oslavinenas andro dino časos, bo na sentňarde pes but rašaja a o manuša pes na zgele andro Jeruzalem.
4Priačhile pre ada o kraľis the savore manuša, save ode sas.
5Avke pes dothode a bičhade ľil pal calo Izrael, la Beer-Šebatar dži ko Dan, a vičinenas savoren, hoj te aven andro Jeruzalem te oslavinel e Patraďi pre pačiv le RAJESKE, le Izraelike Devleske. Bo but džene la na oslavinenas avke, sar hin pisimen andro Zakonos.
6O murša gele le ľilenca, so sas le kraľistar the vodcendar, pal calo Izrael the Judsko a phenenas avke, sar lenge o kraľis prikazinďa: “Visaren tumen pale ko RAJ, ko Del le Abrahamoskero, Izakoskero the Jakoboskero, hoj pes ov te visarel pale ke tumende, ke ola, save sas zachraňimen andral le Asirike kraľengere vasta.
7Ma aven ajse sar tumare dada the pašutne, bo on na sas pačivale le RAJESKE, peskere Devleske. Se šaj dikhen korkore, sar len igen zorales potrestinel.
8Akana den peske te phenel! Ma aven ajse sar tumare dada, bo na kamenas te šunel! Podden pes le RAJESKE! Aven andro Chramos, so o RAJ, tumaro Del, sentňarďa pro furt. Služinen le RAJESKE, peskere Devleske, hoj pes te odvisarel tumendar leskeri choľi!
9Te pes visarena ko RAJ, akor ole, save zaile tumare pašutnen the čhaven, presikavena lenge o jileskeriben a premukena len pale khere, bo o RAJ, tumaro Del, hino lačhejileskero the milosťivo a na odvisarela pes tumendar, te pes tumen visarena ke leste.”
10O murša, saven o kraľis the o vodci bičhade, džanas foros forostar andro phuva le kmeňengere Efrajim the Menašše dži ko Zebulun. Ale o manuša len anenas pro asaben a asanas lendar.
11Ale varesave murša andral o kmeňi Ašer, Menašše the Zebulun pes pokorinde a avle andro Jeruzalem.
12O Del avke kerďa, hoj diňa le manušen the andre Judsko jekh gondoľišagos, hoj te keren oda, so prikazinďa o kraľis the o uradňika pal le RAJESKERO lav.
13Avke andro dujto čhon igen but manuša pes zgele andro Jeruzalem, hoj te oslavinen o Inepos pal o Mare Bi o Drožďi.
14Ile a zňičinde savore oltara, so sas andro Jeruzalem, the o kaďidloskere oltara a čhide len andre dolina Kidron.
15Andro dešuštarto (14.) džives andro dujto čhon murdarde le Patraďakere bakrores. O rašaja the o Leviti, save mek na sas obžužarde, andre ladž pes sentňarde. Paľis ande o labarde obeti andro Chramos.
16On ačhenas pre peskere thana andro Chramos, sar pisinďa andro zakonos le Devleskero murš o Mojžiš, a o rašaja kropinenas pro oltaris o rat, so lenge podine o Leviti.
17Vašoda, hoj sas ode zgele but ajse džene, save na sas sentňarde, on našťi murdarenas le Patraďakere bakroren. Avke vaš lende o Leviti murdarenas le bakroren, hoj len te sentňaren le RAJESKE.
18But manuša, save ode avle andral o kmeňos Efrajim, Menašše, Jissachar the Zebulun, pes na sentňarde a oleha, hoj chanas le Patraďakere bakrores, na doľikerde le Devleskero zakonos. Vašoda pes modľinelas vaš lende o Chizkija:
19“RAJEJA, Devla amare dadengero, kala manuša hine nažuže angle tiro zakonos. Ale on tut lašaren jilestar, vašoda mangav tut, av ke lende jileskero a odmuk lenge.”
20A o RAJ leskeri modľitba šunďa avri a sasťarďa le manušen.
21Paľis o Izraeliti, save sas andro Jeruzalem, oslavinenas o Inepos pal o Mare Bi o Drožďi efta džives bare radišagoha. A o Leviti the o rašaja lašarenas le RAJES sako džives caľa zoraha.
22Paľis o Chizkija šukares prevakerďa ke savore Leviti, bo sikade hoj džanen mištes te služinel le RAJESKE. Efta džives oslavinenas a anenas ode smiromoskere obeti a paľikerenas le RAJESKE, peskere dadengere Devleske.
23Ale savore manuša, save sas ode zgele phende, hoj oslavinena mek efta džives o inepos. Avke radišagoha oslavinenas mek aver efta džives.
24O Chizkija diňa le manušenge pre obeta, 1 000 biken the efta ezera 7 000 bakren a o uradňika dine 1 000 biken the 10 000 bakren. A sentňarde pes but rašaja.
25Savore manuša andral e Judsko radisaľonas le rašajenca the Levitenca, the le manušenca, save avle le severostar, the le cudzincenca, save bešenas andro Izrael the Judsko.
26Andro Jeruzalem sas ajso baro radišagos, savo na sas akorestar, sar sas kraľis andro Izrael le Davidoskero čhavo, o Šalamun.
27Paľis o rašaja the o Leviti ačhenas, hoj te žehňinen le manušen a o RAJ len šunďa avri andral peskero sentno than, andral o ňebos.
