1O Šalamun, le Davidoskero čhavo, imar zorales ľikerelas o kraľišagos andro vasta. O RAJ, leskero Del, les igen hazdňa upre a sas leha.
2O Šalamun vičinďa calo Izrael: le veľiťeľen upral o ezera the upral o šel slugaďa, le sudcen, savore vodcen andral calo Izrael the le fajtakere vodcen
3a geľa savorenca pro učo than andro Gibeon. Bo ode sas le Devleskero Sentno Stanos, so kerďa pre pušťa o Mojžiš, o služobňikos le RAJESKERO.
4Ale o David imar diňa le Devleskeri Zmluvakeri Archa te preľidžal andral o Kirjat-Jearim andro Jeruzalem, bo ode prekal late kerďa o stanos.
5O brondzuno oltaris, so kerďa o Becaleel, le Urihoskero čhavo, saveske sas papus o Chur, sas angle RAJESKERO Sentno Stanos paš o Gibeon. Ode o Šalamun the savore manuša lašarenas le RAJES
6a obetinďa pro brondzuno oltaris ezeros džvirinen anglo RAJ. O oltaris sas anglo Sentno Stanos.
7Odi rat o Del pes sikaďa le Šalamunoske andro suno a phenďa: “Phen, so tut majinav te del!”
8Ov odphenďa le Devleske: “Mire dadeske le Davidoske presikaďal baro jileskeriben a ačhaďal man vaš o kraľis pal leste.
9RAJEJA, Devla, akana mi ačhel pes oda, so phenďal mire dadeske le Davidoske. Tu man thoďal kraľiske upral kala manuša, save hine ajci but sar o prachos pre phuv.
10Vašoda de man goďaveripen the prindžaripen, hoj te džanav, sar te ľidžal kale manušen. Bo ko šaj ľidžal kada tiro baro narodos?”
11Pre oda leske o Del odphenďa: “Vašoda, hoj kada kames a na mangľal tuke o barvaľipen, aňi o pokladi, aňi e pačiv, aňi baro dživipen, aňi o meriben tire ňeprijaťeľengero, ale o goďaveripen the prindžaripen, hoj te ľidžas mire manušen, upral save tut ačhaďom kraľiske,
12dava tut o goďaveripen the prindžaripen, hoj te ľidžas le manušen. Dava tut mek o barvaľipen, the pokladi the ajsi pačiv, so na sas le kraľen angle tu a na ela aňi olen, save ena pal tu.”
13Paľis o Šalamun pes visarďa pale andro Jeruzalem pal oda učo than, kaj sas o Sentno Stanos paš o Gibeon a kraľinelas andro Izrael.
14Paľis o kraľis diňa te anel o maribnaskere verdana the le muršen pro graja. Sas les 1 400 maribnaskere verdana a 12 000 graja, saven ľikerelas andro Jeruzalem the aver fori.
15Sar sas kraľis o Šalamun, o rup the o somnakaj andro Jeruzalem sas ajci but sar o bara a cedroskere kašta sar o dzive figovňiki, so baron pro brehi.
16O graja prekal o Šalamun pes anelas andral o Egipt the andral e phuv Kuj, kaj le kraľiskere manuša len cinenas vaš ajci, keci monas.
17Andral o Egipt cinenas o maribnaskero verdan vaš šov šel (600) rupune a o graj vaš šel the penda (150) rupune. Avke on odarik len anenas the prekal savore Chetitanengere the Aramejike kraľa.
18O Šalamun prikazinďa, hoj te ačhaven o Chramos, kaj te lašaren le RAJES, a peske o palacis.
