Sekan Kranakuls 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Wal wen King Salaman bin binijimap ol dislot wek langa det Serramoni Pleis, imbin pudum ol detlot ting weya im dedi Deibid bin gibit langa YAWEI deya langa detlot stowa rum, ola silba, ola gol en ola najalot ebrijing.

²Wal King Salaman bin jingat langa ol detlot lidamob brom ola klen en femili brom Isreil blanga go langa Jerusalem blanga deigim det Seikridwan Boks brom Saiyan, det taun blanga Deibid langa det Serramoni Pleis.

³Deibin ol majurrumap miselp seimtaim weya deibin abum det speshalwan serramoni gulum Hampi.

⁴Wen ola lidamob bin majurrumap miselp, detlot Libaimen bin lidimap det Seikridwan Boks,

⁵en deibin garrimap langa det Serramoni Pleis. Detlot serramonimen en detlot Libaimen bin mubum det Seikridwan Tent blanga YAWEI du, en ol detlot ebrijing blanga det Tent langa det Serramoni Pleis.

⁶Wal King Salaman en ol detlot Isreil pipul bin majurrumap miselp lida blanga det Seikridwan Boks en deibin sekrifais loda ship en buligi, deibin adli kaundimap detlot enimul.

⁷Afta, detlot serramonimen bin garrimap det Seikridwan Boks blanga YAWEI en deigim insaid langa det Serramoni Pleis en pudum langa det Brabli Seikridwan Rum andanith langa det dubala enimul garram wing.

⁸Detlot wing bin gaburrumap det Seikridwan Boks en detlot pol blanga garrimap det Seikridwan Boks.

⁹En det laswan pat blanga det dubala pol bin stikinat, bat oni detlot pipul hu jandap lida langa det Brabli Seikridwan Rum gin luk det dubala pol. Det dubala pol stil jidan deya tudei.

¹⁰Nomo enijing bin jidan insaid langa det Seikridwan Boks, oni det dubala speshalwan ston weya Mosis bin pudum wen imbin deya langa det hil gulum Sainai, langa det taim na wen YAWEI bin meigim brabli strongwan pramis garram detlot pipul blanga Isreil wen deibin kaman brom Ijip.

¹¹Ol detlot serramonimen brom ebri grup bin meigim miselp klinbala blanga serramoni. Detlot Libaimen hubin plei myusik bin neim Eisaf, Heiman en Jedathan, en detlot brom olabat femilimob bin werrimon klos brom brabli gudwan matiriyal. Detlot Libaimen bin jandap sanraiswei langa det teibul blanga ofring garram lilwan drum gulum simbul en det gita gulum hap. 120 serramonimen bin pleipleibat detlot longwan wisul garram olabat. Detlot singamob bin sing gudwei garram det myusik brom detlot longwan wisul, simbul en najalot ting. Deibin preisimbat YAWEI en sing dijan song, “Preisimbat YAWEI, dumaji im brabli gudbala, En im laigim ola pipul olagijawan.” En wen detlot serramoni men bin gowei brom det Serramoni Pleis, bigiswan klaud garram braitwan lait blanga YAWEI bin jandap deya en deibin lafta gowei brom det pleis.