Binaŋ Qâhâc II 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Eme Salomo e Wofuŋte ufuŋ bawec i iŋuc hâcne baku bafârewec. Bafârerâ Salomo e mamac‐ticne Dawidizi wiac sasawa, siliwa, gol â kuʒi râqâc wiac bâtiriwec i Anuture ufuŋko ʒeŋaŋ râewec.

²Eme Salomo e Israe ŋic jaŋere soŋaŋ micne, gurune gurune jaŋere femicnefâc â garikiŋ sâc jaŋere fekicnefâc Jerusalem haeo hetumaŋ‐jopawec, i Wofuŋte ʒâʒâfic katapa Dawidire hae, Zioŋ hâcne, irecnec miti ufuŋko bafeniŋte hefârec‐jopawec.

³Mosa 7 ere dameŋ maickeme Israe ŋic sasawa jaŋe hombaŋ sâko ŋeniŋte ŋicwofuŋ Salomorao fisirâ tumaŋnembiŋ.

⁴Israe ŋic jaŋere soŋaŋ micne fisi‐fârepie tarame Lewiŋic jaŋe ʒâʒâfic katapa bafaharerâ

⁵reŋkehuc bafembiŋ, erâ tutumaŋ qoruc boze â irec maŋnao wiac fowec i mâmâc rombiŋ. Taha bapa â Lewiŋic jaŋe reŋkembiŋ hâcne.

⁶Eme ŋicwofuŋ Salomo â Israe kikefuŋ erao tumaŋne‐fârembiŋ jaŋe sasawa ʒâʒâfic katapa bâniecnehuc lama â bulimakao bocjaha jâmbâŋ hezuc‐joparâ tahare biŋe râepie jaŋere ʒare wowosene me mamana‐fârene mi ewec.

⁷Eme taha bapa jaŋe Wofuŋte ʒâʒâfic katapa bafisirâ ficmaŋne ʒâŋene furu dindiŋ ira kerubim jahere fakec rurumaŋko ŋeŋe‐ticnao hepie ŋewec.

⁸Ehame kerubim jahe fafakec‐jekic ʒâʒâfic katapa ŋewec irec fainao qaratiepic. Ehuc ʒâʒâfic katapa â reŋ wiac‐ticne i sâokepic hâcne.

⁹Reŋ jahec‐ticne ʒoricnere tofa‐jekic i ficmaŋne ʒâŋe furu dindiŋ irecnec fotâcnerâ ficmaŋne mamai ira ŋiczi hohonere sâc epic. Fic sahacnao hohonene i mi epic.

¹⁰Eme katapa irec maŋnao qorac tapa jajahec sawa fopic, wiac gâcne aricne. Jahe Mosezi Horebe tikio ira katapao raec‐jofawec. Israe ŋic jaŋe Aigita mâreŋ beherâ wahapie Wofuŋzi jaŋehec ʒâʒâfic ewec irec qorac tapa hâcne. Eme jahe ira fopiczi fokopirec jaha.

¹¹Eme taha bapa ira jumbiŋ jaŋe guru‐jeŋicko mi juhuc sowa â pectâc juku maŋne furu mukicne irecnec wahambiŋ.

¹²Ehame Lewi guruonec gae hehe ŋic, Asafa, Hemaŋ â Jedutuŋ, erâ ŋokâfâc‐jeŋic â soctofafâc‐jeŋic jaŋe ŋaqi qoruc qaŋqaŋ hefârerâ taha bapa 120 qeŋ qaqa jumbiŋ i jaŋehec kaŋkuc â gita kulele wiac rorâ alata ʒoaŋ wewefunaopec domambiŋ.

¹³Wofuŋ daŋge mumuteŋ eecne gie i qeŋ qaqa â gae hehe ŋic jaŋe serec jaha eniŋte mukicne. Irec jaŋe qeŋ â kaŋkuc â wiac gâcnehec gae ʒiŋuc hehuc Wofuŋ ʒeri mumuteŋ ecnembiŋ: “Wofuŋ e uruc jauŋ‐ticnehec, â aki anonoc‐ticne i fofo sanaŋ foekac.” Iŋuc muhapie karoraczi Wofuŋte ufuŋ fusucma‐fârewec.

¹⁴Irec taha bapa jaŋe karoracte quŋkerâ domahuc gie baniŋte eipiembiŋ. Wofuŋte huriri qâreŋzi Anuture ufuŋ fusucma‐fârewec hâcne.