1Le Amacijoske sas bišupandž (25) berš, sar ačhiľa kraľis, a kraľinelas bišueňa (29) berš andro Jeruzalem. Leskeri daj sas e Joaddan andral o Jeruzalem.
2O Amacijah kerelas oda, so sas le RAJESKE pre dzeka, ale na cale jileha.
3Sar imar o kraľišagos sas zorales andre leskere vasta, diňa te murdarel peskere služobňiken, save murdarde leskere dades.
4Ale lengere čhaven na diňa te murdarel, bo o RAJ prikazinďa andro Mojžišoskero zakonos: “O dada našťi meren vaš o binos, so kerde lengere čhave, aňi o čhave vaš le dadengere, ale dojekh mi merel vaš peskero binos.”
5O Amacijah vičinďa savore muršen andral o kmeňos Juda the Benjamin a ačhaďa andre lengere fajti veľiťeľen upral o ezeros the upral o šel slugaďa. Paľis zgenďa 300 000 muršen phureder sar biš (20) berš pririchtimen te džal andro mariben le šťitoha the kopijaha.
6Počinďa 3,4 toni rup vaš o 100 000 zorale maribnaskere muršen andral o Izrael, hoj te maren pes vaš leste.
7Ale avľa ke leste jekh murš le Devleskero a phenďa: “Kraľina, ma le tuha le Izraeliten, bo o RAJ nane ole manušenca andral o Efrajim!
8Choc te džas šmelones andro mariben, o Del kerela, hoj te prekheles (prehrajines) o mariben le ňeprijaťeľiha, bo le Devles hin zor te pomožinel abo te čhivel tele!”
9Pre oda lestar o Amacijah phučľa: “Ale so ela ole rupoha, so počinďom vaš lende?” Le Devleskero murš leske odphenďa: “O RAJ tuke šaj del mek buter sar oda.”
10Avke o Amacijah bičhaďa pale khere le muršen, save avle ke leste andral o Efrajim. On igen choľisaľile pro manuša andral e Judsko a choľaha pes visarde khere.
11O Amacijah bi e dar džalas peskere muršenca andre Lonďi Dolina. Ode murdarďa 10 000 Edomčanen
12a zaile the avre 10 000 muršen. Ľigende len upre dži pro agor pre skala Sela a odarik len čhivkerenas tele pro skali a sas rozmarde.
13Ale ola murša, saven o Amacijah bičhaďa khere, džanas pro Judske fori la Samarijatar dži paš o Bet-Choron. Ode murdarde 3 000 muršen a zaile odarik but veci.
14Sar o Amacijah ňerinďa (zviťazinďa) upral o Edomčana, visaľiľa pale andro Jeruzalem. Anďa peha le Edomike devloren a banďolas angle lende the labarelas o kaďidlos.
15Akor o RAJ igen choľisaľiľa pro Amacijah a bičhaďa ke leste prorokos, savo leske dovakerelas: “Soske lašares avre narodengere devlen, save našťi zachraňinde peskere manušen andral tire vasta?”
16Medik o prorokos vakerelas, o Amacijah leske phenďa: “So, ačhaďam tut, hoj te aves le kraľiskero radcas? Preačh! So majinav tut te murdarel?” Avke o prorokos preačhiľa, ale mek phenďa: “Džanav, hoj o Del tut zňičinela, bo kerďal oda a na šunďal mire lava.”
17Paľis o Judsko kraľis Amacijah pes dothoďa peskere radcenca pro Izrael. Bičhaďa le muršen, hoj te phenen le Izraelike kraľiske, le Jehoašoske, savo hin o čhavo le Joachazoskero, o čhavo le Jehuoskero: “Av! Mar pes manca!”
18Ale o Jehoaš leske odphenďa: “Andro Libanoňiko verchos o kandro phenďa le zorale cedroske: ‘De tira čha mire čhaske romňake.’ A ipen akor e dzivo džvirina predžalas a uštarďa pro kandro!
19Ašares tut a gondoľines tuke, hoj sal zoralo, bo ňerinďal (zviťazinďal) upral o Edom. Oslavin tiro ňerinďipen, ale ačh khere! Soske rodes o nalačhipen? Se pereha the tu the e Judsko.”
20Ale o Amacijah les na šunďa. Kada kerďa o Del, hoj les te del andre le Joašoskere vasta, bo chudle te lašarel le Edomike devlen.
21Avke o Izraeliko kraľis Jehoaš geľa pro mariben pro Amacijah paš o Bet-Šemeš andre Judsko.
22O Izrael ňerinďa upral e Judsko a dojekh lengero slugaďis denašelas pale khere.
23O Jehoaš zaiľa paš o Bet-Šemeš le Amacijah, le Judske kraľis, a odľigenďa les andro Jeruzalem. A čhiďa tele o foroskere muri la Efrajimika Branatar dži paš e Rohoskeri Brana, vaj duj šel (200) metri.
24Iľa odarik savoro rup, somnakaj the dragane veci, so arakhle andre le RAJESKERO Chramos, kaj merkinenas o potomki le Obed-Edomoskere. Iľa the o barvaľipen andral o palaciskere pokladňi a odľigenďa le manušen, saven zaiľa, ole vecenca andre Samarija.
25O Judsko kraľis Amacijah, le Joašoskero čhavo, dživelas mek dešupandž (15) berš, sar muľa o Izraeliko kraľis Jehoaš, le Joachazoskero čhavo.
26Savore aver veci, so kerďa o Amacijah, ešebnovarestar (peršovarestar), medik na muľa, hin pisimen andro Zvitkos le Judske the Izraelike Kraľengero.
27Akorestar, sar o Amacijah pes odvisarďa le RAJESTAR, varesave manuša andro Jeruzalem pes pre leste dothode, ale ov denašľa andro Lachiš. Paľis pal leste bičhade muršen a ode les murdarde.
28Avke les odarik preľigende pale andro Jeruzalem pro graj a parunde les andro Foros le Davidoskero, paš leskere phure dada.
