1Le Šalamunoske ľikerelas biš berš, medik na dokerďa o Chramos le RAJESKERO the peskero palacis.
2Paloda oprikerďa o fori, so leske diňa o Chiram, a bičhaďa le Izraeliten andre te bešel.
3Paľis o Šalamun geľa pro mariben andro foros Chamat-Coba a zaiľa les.
4Ačhaďa o foros Tadmor pre pušťa a andro Chamat savore fori, kaj odthovkerenas o chaben.
5Paľis oprikerďa o foroskere muri, brani the zavori andro fori Upruno Bet-Choron the Teluno Bet-Choron,
6Baalat the savore fori, kaj odthovkerenas o chaben, the savore fori, kaj ľikerelas peskere grajen the o verdana. Ačhaďa savoro, so kamľa andro Jeruzalem, Libanon the všadzik andre peskero kraľišagos.
7O Šalamun ispidňa andre buči savore Kanaančanengere potomken, saven o Izraeliti na murdarde, sar zaile lengeri phuv. Sas oda o Chetitana, o Amoreja, o Perizeja, o Chivija the o Jebuseja, save hine dži adadžives lengere otroka.
9Ale le Izraeliten na ispidelas andre odi buči, bo on leske služinenas sar slugaďa, veľiťeľa upral e armada, upral o verdana the sar murša pro graja.
10Le Šalamun mek sas 250 veľiťeľa, save dodikhenas pro robotňika.
11La Faraonoskera čha o Šalamun odľigenďa andral o Foros le Davidoskero andro palacis, so prekal late ačhaďa. Phenďa peske: “Miri romňi našťi bešel andro palacis le Izraelike kraľiskero le Davidoskero, bo oda hine sentne thana, kaj sas le RAJESKERI Archa.”
12Akor o Šalamun obetinelas le RAJESKE o labarde obeti pro oltaris, so ačhaďa avri pre dvora anglo Chramos.
13Obetinelas avke, sar o Mojžiš prikazinďa: pro Šabbat, pro Inepos le Neve Čhoneskero, the pro trin bare beršeskere inepi – o Inepos pal o Mare Bi o Drožďi, o Inepos le Kurkengero the o Inepos le Stankengero.
14O Šalamun kerďa avke, sar phenďa leskero dad o David. Ačhaďa andre služba partiji rašajen, hoj te keren e služba andro Chramos the le Leviten, hoj te ľidžan o chvali a te pomožinen le rašajenge andre lengeri sakodživeseskeri buči. A mek ačhaďa the stražňiken andro partiji paš dojekh brana, bo avke oda prikazinďa le Devleskero služobňikos o David.
15On sa doľikerde avke, sar prikazinďa o kraľis pal o rašaja, Leviti the skladi.
16O Šalamun dokerďa caľi buči pro Chramos akorestar, sar chudľa te kerel o zakladi. Avke le RAJESKERO Chramos sas dokerdo.
17Paľis o Šalamun geľa andro Ecjon-Geber the Elat paš o moroskero brehos, andro Edom.
18O Chiram leske bičhaďa loďi, so ľidžanas leskere veľiťeľa the namorňika, save mištes prindžarenas o moros. On jekhetane le Šalamunoskere muršenca gele andro Ofir a ande odarik le Šalamunoske dešupandž (15) toni somnakaj.
