1O Asa kerelas oda, so sas le RAJESKE, leskere Devleske, pre dzeka.
2Zňičinďa o oltara the o thana pro lašariben le modlenge, phagerďa o sentne slupi a čhingerďa tele la Ašerakere slupi.
3Le manušenge andral e Judsko prikazinďa, hoj te lašaren le RAJES, peskere dadengere Devles, a te doľikeren leskero zakonos the prikazaňja.
4Ov andre caľi Judsko phuv zňičinďa o modlengere thana the o kaďidloskere oltara. Medik ov kraľinelas, sas smirom andre oda kraľišagos.
5Andre Judsko o Asa ačhavelas o zorale fori, bo andre odi phuv sas smirom. Andre ola berša ňiko na avľa pre leste pro mariben, bo o RAJ leske diňa o smirom.
6Phenďa le manušenge andral e Judsko: “Zoraľaras kala fori oleha, hoj ačhavaha pašal lende o muri, o veži, brani the zavori. Kadi phuv hiňi furt amari, bo kerahas oda, so amendar kamelas o RAJ amaro Del. Rodahas le RAJES a diňa amenge o smirom pal dojekh sera.” Avke ačhavenas o fori a sas len bach.
7Le Asa sas le kmeňostar Juda 300 000 murša, savende sas o kopiji the bare šťiti, a le Benjaminendar les sas 280 000 murša, savende sas o cikneder šťiti the luki. Kala savore sas zorale maribnaskere murša.
8O Zerach andral o Kuš geľa pre lende pro mariben la milionoskera armadaha le kmeňostar Juda the trin šel (300) maribnaskere verdanenca a dogeľa dži paš e Mareša.
9O Asa džalas pre leste peskere muršenca a pririchtinde pes pro mariben andre dolina Cefata paš e Mareša.
10O Asa mangelas le RAJES, peskere Devles: “RAJEJA, ča tu jekh šaj pomožines le slabenge andro mariben pro zorale. Pomožin amenge, RAJEJA, Devla amaro, bo pre tute pes zmukas. Andre tiro nav amen džas pre kadi bari armada. RAJEJA, tu sal amaro Del a ňiko angle tu na obačhola.”
11Avke o RAJ pomožinďa le Asaoske the leskera armadake te ňerinel (zviťazinel) upral o Kušijci. On chudle odarik te denašel
12a o Asa pal lende džalas peskera armadaha dži ko Gerar. Ode o RAJ peskera armadaha murdarde ajci Kušijcen, hoj ča vajkeci lendar ačhile džide. A odľigende odarik igen but veci.
13On paľis lokes domarde the savore gava pašal o foros Gerar vašoda, bo avľa pre kale manuša bari dar le RAJESTAR. A odľigende odarik savore lačhe veci, save ča kamenas.
14Džanas the pre le pasťjerengere tabora a odľigende odarik igen but bakren the ťaven. Avke gele pale andro Jeruzalem.
