1Sar andro Izrael kraľinelas o Jeroboam dešuochtoto (18.) berš, o Abijah ačhiľa andre Judsko kraľis
2a kraľinelas andro Jeruzalem trin berš. Leskeri daj sas e Michaja, le Urieloskeri čhaj andral e Gibeja. Sar sas o mariben maškar o Abijah the Jeroboam
3o Abijah džalas pre leste le 400 000 slugaďenca, ale o Jeroboam džalas pre leste le 800 000 slugaďenca.
4Akor o Abijah ačhiľa pro verchos Cemarajim andre Efrajimiko phuv a phenďa: “Šun man, Jeroboam the calo Izrael!
5Či tumen na džanen, hoj o RAJ, o Del le Izraeloskero, kerďa le Davidoha zmluva, so pes na del the prephagel, hoj dela les the leskere potomken o kraľišagos upral o Izrael pro furt?
6Ale o Jeroboam le Nebatoskero čhavo, savo sas sluhas le Šalamunoske, pes vzburinďa pre peskero raj.
7Akor pes pašal leste zgele nalačhe manuša the zbujňika a ačhade pes pro Rechabeam, pre le Šalamunoskero čhavo. Ov sas mek terno a na sas les goďi, hoj te obačhol angle lende.
8Gondoľinen tumenge, hoj šaj ňerinen (zviťazinen) upral le RAJESKERO kraľišagos, so hino andro vasta le Davidoskere čhavenge? Ňerinena, bo san but džene? Bo hin tumenca the o somnakune gurumňora, so tumenge kerďa o Jeroboam sar devlen?
9Či na tradľan avri le RAJESKERE rašajen, le Aronoskere potomken the le Leviten? Či na ačhaďan peske le rašajen, avke sar aver narodi? Se dojekh dženo, ko kamel te el rašaj, anel terne bikos the efta bakren a avke ačhel rašaj tumare devlenge, so nane ňič.
10Ale amaro Del hino o RAJ, a amen les na omukľam. Amare rašaja, save služinen le RAJESKE, hine le Aronoskere potomki a o Leviti lenca služinen.
11Sako tosara the rači anen le RAJESKE o labarde the voňava obeti a thoven o mare pro žužo skamind. Sako rat labaren o lampi pro somnakuno momeľaris. Amen doľikeras o prikazaňja le RAJESKERE amare Devleskere, ale tumen les omukľan!
12Vašoda o Del hino amaro vodcas a sar leskere rašaja trubinena, hoj te den znameňje pro mariben, ov amen ľidžala pre tumende! Muršale andral o Izrael, ma džan pes te marel le RAJEHA, savo hino Del tumare dadeskero! Na ela tumen bach!”
13Medik o Abijah vakerelas, o Jeroboam bičhaďa jekh partija muršen pre Judsko armada palunestar. Avke on ačhenas anglo Judejci, ale okla murša sas pal lende.
14Sar pes o Judejci visarde a dikhle, hoj aven pre lende the palunestar, chudle te vičinel pro RAJ, hoj lenge te pomožinel. O rašaja trubinenas pro trubi
15a o Judejci chudle te vriskinel maribnaskere hangoha. O Abijah len ľidžalas andro mariben a o Del zňičinďa le Jeroboam the leskera armada angle lende.
16Avke o Izraeliti denašle anglo Judejci a o Del len diňa andre lengere vasta.
17O Abijah the leskere manuša ňerinde (zviťazinde) upral lende a le Izraelike muršendar peľa andro mariben jepaš milionos murša.
18Akor sas o Izraeliti pokorimen a o Judejci pes imar na daranas, bo pes zmukenas pro RAJ, pre lengere dadengero Del.
19O Abijah dureder džalas pal o Jeroboam a zaiľa leskere fori o Betel, Ješanah the Efron lengere gavenca.
20Avke le Jeroboam imar šoha (ňikda) na sas e zor, so les sas, medik kraľinelas o Abijah. Paľis les o RAJ avke dukhaďa, hoj muľa.
21Ale le Abijoskeri zor sas furt bareder. Iľa peske dešuštar (14) romňijen, savenca les sas bišuduj (22) muršora a dešušov (16) čhajora.
22Savore aver veci, so o Abijah kerďa, the leskero vakeriben, hine pisimen andro zvitkos le prorokoskero Iddoskero.
23Sar o Abijah muľa, parunde les andro Foros le Davidoskero. Pal leste ačhiľa kraľis leskero čhavo, o Asa. Sar ov kraľinelas, sas deš berš smirom andre phuv.
