1Sar o Judsko kraľis Jošafat avľa pale khere andro Jeruzalem bachtales,
2avľa o prorokos Jehu, le Chananiskero čhavo, arakhľa pes leha a phenďa leske: “Gondoľines tuke, hoj hin mištes te pomožinel le bijedevleskere manušenge a te sikavel o jileskeriben olenge, ko džan pro RAJ? Vašoda hin pre tute le RAJESKERI choľi.
3Ale o RAJ paš tu arakhľa the vareso lačho: Tu zňičinďal savore Ašerakere modlengere slupi andral odi phuv a kamehas te kerel oda, so hin le Devleske pre dzeka.”
4Choc o Jošafat bešelas andro Jeruzalem, pale geľa ko manuša la Beer-Šebatar dži paš o Efrajimike brehi, hoj te vakerel le manušenca, hoj pes pale te visaren ko RAJ, savo hino Del lengere phure dadengero.
5Andre dojekh zoralo foros andre Judsko phuv ačhaďa sudcen.
6Phenďa le sudcenge: “Merkinen pre oda so kerena, bo na sudzinen andre manušeskero nav, ale andro RAJESKERO nav. Ov hino tumenca paš dojekh sudos, sar sudzinena varekas.
7Vašoda keren peskeri buči pačivalones a mi el tumen dar anglo RAJ, bo o RAJ amaro Del hino čačipnaskero, na kidel peske avri manušen, aňi na del pes te cinel.”
8Paľis o Jošafat the andro Jeruzalem ačhaďa Leviten, rašajen the anglune muršen sar sudcen, hoj te sudzinen le manušen te len hin vareso maškar peste, abo te vareko na doľikerel le RAJESKERO zakonos.
9Paľis o Jošafat lenge prikazinďa: “Keren oda pačivalones, cale jileha a mi el tumen dar anglo RAJ.
10A sar avena angle tumende o manuša andral aver fori, hoj len te rozsudzinen – či džala pal oda, hoj vareko varekas murdarďa, abo hoj vareko na doľikerďa o zakonos, o prikazaňja abo le RAJESKERE lava – mušinen lenge te dovakerel, sar pes majinen te ľikerel, hoj te na keren binos anglo RAJ, hoj le RAJESKERI choľi te na avel pre tumende the pre tumare pašutne. Keren oda a na ela tumen binos.
11O Amariah, o nekbareder rašaj, rozsudzinela savore RAJESKERE veci. O Zebadiah, le Jišmaeloskero čhavo, savo hino vodcas upral o kmeňos Juda, rozsudzinela savore kraľiskere veci a o Leviti ena o uradňika paš o sudos. Aven bi e dar a o RAJ mi el oleha, kas hin čačipen.”
