Zəbur 18:1-39

¹Musiqi rəhbəri üçün. Rəbb Öz qulu Davudu bütün düşmənlərin və Şaulun əlindən qurtaranda Davudun Ona söylədiyi ilahi. O belə oxudu: Ey mənə qüvvət verən Rəbb, Səni sevirəm.

²Rəbb qayam, qalam, xilaskarımdır, Allahım qayamdır, Ona pənah gətirəcəyəm, Odur qalxanım, qüdrətli qurtarıcım, qülləm.

³Həmdə layiq Rəbbi çağıracağam, Düşmənlərimin əlindən qurtulacağam.

⁴Ətrafımı ölüm ipləri bürümüşdü, Məni əcəl selləri ürkütmüşdü.

⁵Ölülər diyarının ipləri mənə sarılmışdı, Ölüm kəməndləri məni qarşılamışdı.

⁶Əzab içində Rəbbə yalvardım, Allahıma fəryad qopardım. O, məbədindən səsimi eşitdi, Fəryadımsa hüzuruna, Onun qulağına yetdi.

⁷O zaman yer üzü sarsılıb titrədi, Dağların təməlləri lərzəyə gəldi, Onlar sarsıldı, Çünki O qəzəbləndi.

⁸Burnundan tüstü çıxıb yüksəldi, Ağzından yandırıb-yaxan alov püskürdü, Bundan közlər tutuşdu.

⁹O, göyləri yarıb yerədək endi, Qatı zülmət ayaqları altında idi.

¹⁰Bir keruva minib uçdu, Yel qanadları üstə şığıdı.

¹¹Gizlənmək üçün ətrafını zülmətə bürüdü, Tufan qoparan qara buludlardan Özünə çardaq qurdu.

¹²Hüzurundan şəfəq saçdı, Odlu közlər və dolu buludları yardı.

¹³Rəbb göylərdə gurladı, Haqq-Taala səs saldı, Odlu közlər və dolu yağdı.

¹⁴Oxlarını atıb düşmənləri darmadağın etdi, Şimşəyini çaxdırıb onları dağıtdı.

¹⁵Ya Rəbb, Sənin məzəmmətindən, Burnundakı nəfəsinin şiddətindən Suların dərinlikləri göründü, Dünyanın bünövrələri açıq qaldı.

¹⁶O, ucalardan əl uzadıb məni tutdu, Məni dərin suların içindən çıxartdı.

¹⁷Məni qüvvətli düşmənimdən azad etdi, Çünki yağılarım məndən güclü idi.

¹⁸Fəlakətli günümdə qarşıma çıxdılar, Lakin Rəbb mənə dayaq oldu.

¹⁹O məni genişliyə çıxardı, Məndən razı qalıb məni qurtardı.

²⁰Rəbb mənə salehliyim naminə ənam verdi, Mənə əlitəmizliyimin əvəzini verdi.

²¹Çünki Rəbbin yolunu tutmuşam, Pis olub Allahımın yolundan azmamışam.

²²Onun bütün hökmləri önümdədir, Qaydalarından imtina etməmişəm.

²³Onunla mən kamala çatmışam, Özümü günahdan qorumuşam.

²⁴Rəbb mənə salehliyimin əvəzini verdi, Gözünün önündə əlitəmiz olmağımın əvəzini verdi.

²⁵Sədaqətlilərlə sədaqətlisən, Kamillərlə kamilsən.

²⁶Təmizlərlə təmizsən, Əyrilərlə əyriliyinə görə davranırsan.

²⁷İtaətkar insanları qurtarırsan, Təkəbbürlü baxışları alçaldırsan.

²⁸Ya Rəbb, Sən çırağıma işıq verirsən! Allahım Rəbb zülmətimi nura çevirir.

²⁹Səninlə qoşun üstünə hücum çəkirəm, Allahımla sədlər keçirəm.

³⁰Allahın yolu kamildir, Rəbbin kəlamı safdır, Rəbb Ona sığınanların sipəridir.

³¹Rəbdən başqa Allah kimdir ki? Allahımızdan başqa qaya kimdir ki?

³²Allah məni qüvvəsi ilə bürüyər, Yolumu kamil edər.

³³Ayaqlarımı maral ayaqları kimi çevik edər, Məni zirvələrimdə saxlar.

³⁴Əllərimə döyüş təlimi verər, Qollarım tunc kamanın yayını dartar.

³⁵Sən mənə qurtuluş qalxanını verdin, Mənə sağ əlinlə dayaq oldun, Köməyinlə məni yüksəltdin.

³⁶Geniş yer açdın ki, addımlayım, Ayaqlarım büdrəməsin.

³⁷Düşmənlərimi qovub onlara çatdım, Onlar məhv olanadək geriyə qayıtmadım.

³⁸Onları əzdim, qalxa bilmədilər, Ayaqlarımın altına sərildilər.

³⁹Döyüş üçün məni qüvvə ilə bürüdün, Əleyhdarlarımı ayağımın altına saldın.