ܡܙܡܘܪ̈ܐ 18:1-39

¹ܘܐܡܝܼܪܹܗ: ܟܹܐ ܡܲܚܸܒܸܢܘܼܟ݂ ܡܵܪܝܵܐ، ܚܲܝܠܝܼ.

²ܡܵܪܝܵܐ ܩܵܝܝܼ ܝܠܹܗ، ܘܚܸܣܢܝܼ، ܘܦܲܨܝܵܢܝܼ، ܐܲܠܵܗܵܐ ܐܝܼܨܵܪܝܼ ܕܫܵܩܠܹܢ ܓܵܘܣܵܐ ܒܝܼܹܗ، ܡܵܛܵܠܝܼ، ܩܲܠܥܝܼ ܘܚܲܝܠܵܐ ܕܦܘܼܪܩܵܢܝܼ.

³ܒܸܬ ܩܵܪܹܝܢ ܠܡܵܪܝܵܐ ܕܝܼܠܹܗ ܡܫܘܼܒܚܵܐ، ܘܡ̣ܢ ܕܸܫ̃ܡܸܢܝܼ̈ ܒܸܬ ܦܵܝܫܹܢ ܦܘܼܪܩܵܐ.

⁴ܟܪܝܼܟܸܢܗܘܿܢ ܚܸܒ݂ܠܹ̈ܐ ܕܡܵܘܬܵ‌ܐ، ܛܵܘܦܵܢܹ̈ܐ ܣܸܪ̈ܝܹܐ ܨܦܝܼܚ ܠܗܘܿܢ ܥܲܠܝܼ.

⁵ܚܲܒ݂ܠܹ̈ܐ ܕܫܝܘܿܠܔ ܩܵܡ ܚܲܪܕܝܼ ܠܝܼ، ܬܦܝܼܩ ܠܗܘܿܢ ܒܝܼܝܼ ܢܸܫܒܹ̈ܐ ܕܡܵܘܬܵ‌ܐ.

⁶ܟܲܕ ܥܝܼܩ ܠܵܗ̇ ܐܸܠܝܼ، ܩܪܹܐ ܠܝܼ ܠܡܵܪܝܵܐ، ܘܡܘܼܩܘܸܚ ܠܝܼ ܠܐܲܠܵܗ‌ܝܼ، ܫܡܝܼܥ ܠܹܗ ܡ̣ܢ ܗܲܝܟܠܹܗ ܩܵܠܝܼ، ܘܓܥܵܝܬ‌ܝܼ ܩܲܕܡܘܼܗ‌ܝ ܡܛܹܐ ܠܵܗ̇ ܠܢܵܬܝܵܬܘܼ̈ܗ‌ܝ.

⁷ܗ̇ܝܓܵܗ ܫܥܝܼܫ ܠܵܗ̇ ܘܕܘܼܪܘܸܕ ܠܵܗ̇ ܐܲܪܥܵܐ، ܪܓܝܼܕ ܠܗܘܿܢ ܘܫܥܝܼܫ ܠܗܘܿܢ ܒܸܢܝܲܬܹ̈‌ܐ ܕܛܘܼܪ̈ܵܢܹܐ، ܡ̣ܢ ܚܸܡܬܵ‌ܐ ܕܟܲܪܒܹܗ.

⁸ܐܣܝܼܩ ܠܹܗ ܬܸܢܵܐ ܡ̣ܢ ܢܵܚܝܼܪܹܗ، ܘܢܘܼܪܵܐ ܐܵܟ݂ܘܿܠܵܐ ܡ̣ܢ ܦܘܼܡܹܗ، ܓܘܼܡܪܹ̈ܐ ܠܒ݂ܝܼܟ݂ ܠܗܘܿܢ ܡܸܢܹܗ،

⁹ܡܘܼܟܸܦ ܠܹܗ ܫܡܲܝܹ̈ܐ ܘܨܠܹܐ ܠܹܗ، ܟܲܕ ܥܲܝܒ݂ܵܐ ܚܸܫܟܵܢܬܵ‌ܐ ܬܚܘܿܬ ܐܲܩܠܵܬܘܼ̈ܗ‌ܝ.

¹⁰ܪܟܝܼܒ݂ ܠܹܗ ܥܲܠܔ ܟܪܘܿܒ݂ܵܐ ܘܦܪܝܼܚ ܠܹܗ، ܘܣܛܹܐ ܠܹܗ ܥܲܠܔ ܓܘܼܠܦܵܢܹ̈ܐ ܕܦܵܘܚܵܐ.

¹¹ܥܒ݂ܝܼܕ ܠܹܗ ܠܚܸܫܟܵܐ ܣܸܬܵܪܹܗ، ܡܛܲܠܠܹܗ ܚܵܕܸܪ̈ܘܵܢܘܼܗ‌ܝ، ܠܚܸܫܟܵܐ ܕܡ̈ܝܼܵܐ، ܥܲܝܒ݂ܵܬܹ̈‌ܐ ܕܪܩܝܼܥܵܐ.

¹²ܡ̣ܢ ܫܲܦ̮ܩܵܐ ܕܩܲܕܡ ܦܵܬܹܗ ܥܲܝܒ݂ܵܬܘܼ̈ܗ‌ܝ ܡܘܼܥܪܹܐ ܠܗܘܿܢ ܒܲܪܕܵܐ ܘܓܘܼܡܪܹ̈ܐ ܕܢܘܼܪܵܐ.

¹³ܘܩܘܼܪܩܸܡ ܠܹܗ ܒܫܡܲܝܵܐ ܡܵܪܝܵܐ، ܘܥܸܠܵܝܵܐ ܝܘܼܗܒܹܠܔ ܠܹܗ ܩܵܠܹܗ، ܒܲܪܕܵܐ ܘܓܘܼܡܪܹ̈ܐ ܕܢܘܼܪܵܐ.

¹⁴ܘܫܘܼܕܸܪܹܗ ܓܹܐܪ̈ܘܼܗ‌ܝ ܘܒܘܼܪܒܸܙܵܝ ܠܹܗ، ܘܫܘܼܕܸܪܹܗ ܒܸܪ̈ܩܹܐ ܪܵܒܵܐ ܘܚܒ݂ܝܼܛܵܝ ܠܹܗ.

¹⁵ܘܡܘܼܒܝܸܢܗܘܿܢ ܪ̈ܵܗܛܹܐ ܕܡ̈ܝܼܵܐ، ܘܦܝܼܫ ܠܗܘܿܢ ܓܸܠܝܹܐ ܫܘܼܬܐܵܣܹ̈ܐ ܕܬܹܒܹܝܠܔ، ܡ̣ܢ ܢܓ̰ܵܘܬܘܼܟ݂، ܝܵܐ ܡܵܪܝܵܐ، ܡ̣ܢ ܢܫܲܡܬܵ‌ܐ ܕܦܵܘܚܵܐ ܕܢܵܚܝܼܪܘܼܟ݂.

¹⁶ܫܘܼܕܸܪܹܗ ܡ̣ܢ ܪܵܘܡܵܐ ܓ̰ܢܝܼܒܸܢܹܗ، ܓܪܝܼܫܸܢܹܗ ܡ̣ܢ ܡ̈ܝܼܵܐ ܙܲܪ̈ܒܵܢܹܐ.

¹⁷ܩܵܡ ܦܲܨܹܐ ܠܝܼ ܡ̣ܢ ܕܸܫ̃ܡܸܢܝܼ̈ ܚܲܝܠܵܢܹ̈ܐ، ܘܡ̣ܢ ܣܵܢܝܵܢܝܼ̈ ܕܝܼܢܵܐ ܒܘܼܫ ܙܲܪ̈ܒܵܢܹܐ ܡܸܢܝܼ.

¹⁸ܐܬܹ‌ܐ ܠܗܘܿܢ ܥܲܠܝܼ ܒܝܵܘܡܵܐ ܕܓܘܼܢܚܝܼ، ܐܝܼܢܵܐ ܗܘܹܐ ܠܹܗ ܡܵܪܝܵܐ ܣܢܵܕܬܵ‌ܐ ܐܸܠܝܼ.

¹⁹ܘܦܘܼܠܛܸܢܹܗ ܠܪܘܵܚܵܢܝܼ، ܩܵܡ ܦܲܨܹܐ ܠܝܼ ܒܗ̇ܝ ܕܒܣܝܼܡ ܠܵܗ̇ ܠܹܗ ܒܝܼܝܼ.

²⁰ܩܵܡ ܦܵܪܹܥ ܠܝܼ ܡܵܪܝܵܐ ܐܲܝܟ݂ ܙܲܕܝܼܩܘܼܬ‌ܝܼ، ܐܲܝܟ݂ ܕܸܟ݂ܝܘܼܬܵ‌ܐ ܕܐܝܼܕܵܬ‌ܝܼ̈ ܡܘܼܕܸܪܹܗ ܐܸܠܝܼ.

²¹ܣܵܒܵܒ ܢܛܝܼܪܝܼ ܐܘܼܪ̈ܚܵܬܹ‌ܐ ܕܡܵܪܝܵܐ، ܘܒܪܲܫܝܼܥܘܼܬܵ‌ܐ ܠܵܐ ܦܪܝܼܫ ܠܝܼ ܡ̣ܢ ܐܲܠܵܗ‌ܝܼ.

²²ܣܵܒܵܒ ܟܠܵܝܗ‌ܝ ܕܝܼܘܵܢܘܼ̈ܗ‌ܝ ܠܒܲܠܩܘܼܒ݂ܠܝܼ ܝܢܵܐ، ܘܡ̣ܢ ܩܵܢܘܿܢܘܼ̈ܗ‌ܝ ܠܵܐ ܕܝܼܪܝܼ.

²³ܘܗܘܹܐ ܠܝܼ ܬܲܡܝܼܡܵܐ ܥܲܡܹܗ، ܘܢܛܝܼܪܝܼ ܓܵܢܝܼ ܡ̣ܢ ܥܵܘܠܝܼ.

²⁴ܒܘܼܬ ܐܵܗܵܐ، ܡܘܼܕܸܪܹܗ ܐܸܠܝܼ ܡܵܪܝܵܐ ܐܲܝܟ݂ ܙܲܕܝܼܩܘܼܬ‌ܝܼ، ܐܲܝܟ݂ ܕܸܟ݂ܝܘܼܬܵ‌ܐ ܕܐܝܼܕܵܬ‌ܝܼ̈ ܩܲܕܡ ܥܲܝܢܘܼ̈ܗ‌ܝ.

²⁵ܥܲܡ ܡܪܲܚܡܵܢܵܐ ܟܹܐ ܗܵܘܹܝܬ ܡܪܲܚܡܵܢܵܐ، ܥܲܡ ܓܲܒ݂ܪܵܐ ܬܲܡܝܼܡܵܐ ܟܹܐ ܗܵܘܹܝܬ ܬܲܡܝܼܡܵܐ؛

²⁶ܥܲܡ ܕܸܟ݂ܝܵܐ ܟܹܐ ܗܵܘܹܝܬ ܕܸܟ݂ܝܵܐ، ܘܥܲܡ ܦܟ̰ܝܼܠܵܐ ܟܹܐ ܗܵܘܹܝܬ ܝܵܕܘܿܥܵܐ.

²⁷ܣܵܒܵܒ ܐܲܢ݇ܬ ܟܹܐ ܦܲܪܩܹܬ ܥܲܡܵܐ ܡܸܣܟܹܢܵܐ، ܐܝܼܢܵܐ ܥܲܝ̈ܢܹܐ ܪ̈ܵܡܵܢܹܐ ܟܹܐ ܡܲܟܸܦܸܬ.

²⁸ܣܵܒܵܒ ܐܲܢ݇ܬ ܟܹܐ ܒܲܗܪܸܢܸܬ ܫܪܵܓ݂ܝܼ، ܡܵܪܝܵܐ ܐܲܠܵܗ‌ܝܼ ܟܹܐ ܒܲܗܪܸܢ ܚܸܫܟܝܼ.

²⁹ܣܵܒܵܒ ܒܝܼܘܼܟ݂ ܡܵܨܹܝܢ ܪܵܚܛܹܢ ܥܲܠܔ ܓܲܝܣܵܐ، ܘܒܐܲܠܵܗ‌ܝܼ ܡܵܨܹܝܢ ܫܵܘܪܹܢ ܡܥܲܠܔ ܫܘܼܪܵܐ.

³⁰ܬܲܡܝܼܡܬܵ‌ܐ ܝܠܵܗ̇ ܐܘܼܪܚܵܐ ܕܐܲܠܵܗܵܐ، ܚܲܒܪܵܐ ܕܡܵܪܝܵܐ ܨܘܼܪܸܦܵܐ ܝܠܹܗ، ܡܵܛܵܠܵܐ ܝܠܹܗ ܠܟܠܔ ܡ̇ܢ ܕܫܵܩܹܠܔ ܓܵܘܣܵܐ ܒܝܼܹܗ.

³¹ܣܵܒܵܒ ܡܵܢܝܼ ܝܠܹܗ ܐܲܠܵܗܵܐ ܫܒ݂ܘܿܩ ܡ̣ܢ ܡܵܪܝܵܐ؟ ܘܡܵܢܝܼ ܝܠܹܗ ܐܝܼܨܵܪܵܐ ܫܒ݂ܘܿܩ ܡ̣ܢ ܐܲܠܵܗܲܢ؟

³²ܐܲܠܵܗܵܐ ܕܟܹܐ ܡܲܠܒܸܫ ܠܝܼ ܚܲܝܠܵܐ، ܥܒ݂ܝܼܕ ܠܹܗ ܐܘܼܪܚܝܼ ܬܲܡܝܼܡܬܵ‌ܐ.

³³ܟܹܐ ܥܵܒܹܕ ܐܲܩܠܵܬ‌ܝܼ̈ ܐܲܝܟ݂ ܐܲܩܠܹ̈ܐ ܕܐܲܝ̈ܠܹܐ، ܘܥܲܠܔ ܕܘܼܟܵܢܝܼ̈ ܪ̈ܵܡܹܐ ܟܹܐ ܡܲܟܠܹܐ ܠܝܼ.

³⁴ܟܹܐ ܬܲܠܡܸܕ ܐܝܼܕܵܬ‌ܝܼ̈ ܠܦܠܵܫܵܐ، ܕܡܵܬܚܝܼ ܕܪ̈ܵܥܢܵܢܝܼ ܩܸܫܬܵ‌ܐ ܕܢܚܵܫܵܐ.

³⁵ܩܵܡ ܝܵܗܒܹܬ ܠܝܼ ܡܵܛܵܠܵܐ ܕܦܘܼܪܩܵܢܘܼܟ݂، ܘܝܲܡܝܼܢܘܼܟ݂ ܩܵܡ ܣܵܢܕܵܐ ܠܝܼ، ܘܓ̰ܲܘܲܒܬܘܼܟ݂ ܐܸܠܝܼ ܩܵܡ ܓܲܪܘܸܣܵܐ ܠܝܼ.

³⁶ܡܘܼܪܘܸܚ ܠܘܼܟ݂ ܐܘܼܪܚܝܼ ܩܵܐ ܦܵܣܘܿܥܝܵܬ‌ܝܼ̈، ܗܵܕܵܐ ܕܠܵܐ ܫܥܝܼܫ ܠܗܘܿܢ ܦܟ̰ܘܼܪܹ̈ܐ ܕܐܲܩܠܵܬ‌ܝܼ̈.

³⁷ܢܦܝܼܠܔ ܠܝܼ ܒܵܬܪ ܕܸܫ̃ܡܸܢܝܼ̈ ܘܛܘܼܠܩܵܝ ܠܝܼ، ܘܠܵܐ ܕܝܼܪܝܼ ܗܲܠܔ ܬܝܵܡܬܵܝܗ‌ܝ.

³⁸ܒܠܝܼܣܵܝ ܠܝܼ ܘܠܹܐ ܡܵܨܝܼ ܩܵܝܡܝܼ، ܢܦܝܼܠܔ ܠܗܘܿܢ ܬܚܘܿܬ ܐܲܩܠܵܬ‌ܝܼ̈.

³⁹ܘܫܩܝܼܠܔ ܠܝܼ ܚܲܝܠܵܐ ܠܦܠܵܫܵܐ، ܡܘܼܒܪܸܟ ܠܘܼܟ݂ ܬܚܘܿܬ‌ܝܼ ܠܩܵܝܡܵܢܹ̈ܐ ܕܥܲܠܝܼ.