Psalms 18:1-39

¹(Yawe kager kari alo nuguting te se Saul kuting te ko ura kari David bataguru tam se David wur imi batogam) O Yawe, ani ninguru ka kuesam; ni sokel ani aisisam.

²Yawe mu aninga manga gek am, aninga bitua gek am, se aninga bataguru ta kari; nu aninga Kaem, manga biya bo iwita, se ani kararasam ale aga kager kari memek nunga ko te yumusam. Nu aninga karem, se aninga sokel.

³Aninga niara Kaem nup biya kote beterem, se nu kager kari nuguting te aga bataguru tam.

⁴Ani kuera mayang aga taliparam; lom biya aga ira kaluwuram.

⁵Kuera mateng ko mayang aga talipi saparam; dagarok iwita aga iluwam.

⁶Se ani angamang uririkira sipira mu ningi Yawe aurem, aninga Kaem aga sangukko kote niarem, se nu ko temple ningi baga se agiring ikiam ale dogowa gurugam ale aga niara ikiam.

⁷Noko gomang magara mu ali sisuwuram se duruk bibiya yukuman.

⁸Ale tama bur kuamuru gogong te aratukaso; ale tama kuamili korang te buluk buluk makaso, ale melmasak kai kai namakaso.

⁹Nu taiti gomang kaogam ale tai kaparam; se taiti nuwi kaetam mu sowek bowa ningi anikaso.

¹⁰Engel cherubim bo nu giam ale ilak bingam taiso iwita tairam; ko ariga marir bo luman karogo iwita nu giam ale ilak tairatela tai kaparam.

¹¹Tuwik ko taiti nuwi kaetam mu ningi numi kaluwuram, taiti nuwi ko tiromorom mu nu lautam.

¹²Noko kumik nikim biya taiti nuwi ningi nikim kapakaso, ale pure iwita biliwilik makaso, ale tuwik muguri bibiya iwita kapakaso.

¹³Yawe ko nup kuali biya mu duruk wonong te baga se sokel karogo aikaso se pure iwita pagakaso.

¹⁴Ale pure nikim mu gatu iwita bitakaso se kari memek nunga parusuwukaso.

¹⁵O Yawe, ni iningirem se kamuru te daula aratam ale gagi kuring kauram se saun manga wetang te aratam; se ali ningi ali ko nukuri ilukuawuwaram mu wetang te aratam tala.

¹⁶Yawe kualala baga se kuting garukam ale aga tagi patawuram; gagi biya aga iram, bare nu aga tagiram se bausem.

¹⁷Aninga kager kari mu gek am nunguningkiri, se ani nunga kiarikko me terong; bare nu nuguting te aninga bataguru tam.

¹⁸Ani tom memek ningi kaperem se kager kari taiman agarak kagerman, bare nu aga saongam.

¹⁹Nu aninga saongam ale kuwim ningo te aga beteram; nu aninga kueram ale aga bataguru tam.

²⁰Ani munan laili karo tuem, se Yawe koma ningo aisam; ani memek bo me beterem, se nu marak ningo aisam.

²¹Ani noko munan diram la karem; ani munan memek bo me beterem, ale abiring me gurugu tuem.

²²Ani pempem la noko munan mu angama sengem ko aniso, se kuring me kulukurukasam.

²³Ani noko motam te angimik ikup bo mena; ani aimi ko ninguru sinar tokasam, ale memek bo me bitakasam.

²⁴Se Yawe aninga munan laili arigam ale koma ningo aisam; mu awuk, ani noko motam te diram la bagakasam.

²⁵O Kaem, awiriya ni ko ko kua kaposo, mu ni ka kua kapara ko munan mu kote betesam; se awiriya munan ningo beteso, mu ni ka munan ningo kote betesam.

²⁶Awiriya munan diram la beteso, mu ni munan diram mu ilak betesam; bare awiriya munan daeldel bita lagoso, mu ni aguwaya nu bitarko mu nikate mu am mel gotektir.

²⁷Mu awuk, ni awiriya numi karogo kaposo, mu ni sangaru tasam; bare ni awiriya numi patawuso, mu ni ilak kapasam.

²⁸Nigita, O Yawe, ani nikinang aisisam; aga Kaem, ni aninga tiromorom bataguru sapasam ale nikim aisisam.

²⁹Ni te mu ani aga kager kari memek alo am nunga menawurik nongorak pelerikko; ni aga Kaem abiring ko bager, mu ani kager mu ko lauta am parusuwurikko.

³⁰Kaem ko munan mu ningo se diram; nu mel bo bitirukko balso mu nu eng karo tuso; se kariimet nu kararasan mu nu nononga karem bagoso.

³¹Kaem bo awuk wore Yawe iwita bagoso? Mena. Nu kota suanta Kaem se nanga Manga Gek am.

³²Kaem kota sokel aisiso ale aga bitarso.

³³Nu aninga asiwik sokel tuso, se ani deer iwita duruk kuamuru te araga sanamasam.

³⁴Nu kager aga kasurso, ale agiting sokel tuso, se ani daga wol aora biya mu tagisam.

³⁵O Yawe, kager ningi ni keta aninga saonga karem bagerem; nika kiting sengam te agiting duap ningi aga iluwem; ni kua kaperem ale nup biya aisem.

³⁶Ni aninga lage nungem ale ulaluwurem, bore te se ani asiwik ponor te me gurikirem.

³⁷Ani aga kager kari nunga karem nongorak namerem ale nunga iluwem; ani ninguru nunga maguwurem ale nunga menawurem.

³⁸Ani nunga ita parusuwu asiwik duap ningi nunga beterem; udagi barasamonko koma mena.

³⁹Ni kager ko sokel ani aisem; ale aga kager kari arungu kapa adeleng duap ningi nunga awurem.