Kölfel 18:1-39

¹Ngeni ewe mi emweni chon köl: Echö köl än Tafit nöün ewe Samol mi Lapalap we chon angang. A apasa kapasen ei köl ngeni ewe Samol mi Lapalap lon ewe rän, lupwen ewe Samol mi Lapalap a angasa i seni lepöün ekewe chon oputa meinisin, pwal seni lepöün Saul. Iwe, a apasa: Ai Samol mi Lapalap, üa echenuk, en ai pöchökül.

²Ewe Samol mi Lapalap ai achau, i imwei imwen maun, pwal i chon angasaei, ai Kot, ai achau ewe ia üa op ie. A epeti seniei feiengau usun eu tittin maun, a peniei o tümwünüei.

³Üa kökköri ewe Samol mi Lapalap, ewe mi fich ngeni ach sipwe mwareiti. A amanauaei seni ekewe chon oputaei.

⁴Ekewe feiengauen mäla ra pwelifeiliei, ekewe öütöüten feiengau ra puitiei.

⁵Ekewe feiengauen lenien sotup ra pwelifeiliei, ekewe likatupun mäla ra mochen säreei.

⁶Üa kökköri ewe Samol mi Lapalap lon ai riaföü, üa siö ngeni ai Kot pwe epwe alisiei. A rongorong mweliei seni lon imwan imwenfel, a aüselinga ai siö ngeni.

⁷Iwe, fanüfan a chechech o mwöükük, nge longolongun ekewe chuk ra pwal chechech o chüngüchüng pokiten än Kot song.

⁸Ötüöt a ötüwu seni lon pwötün, nge ekkei lapalap a ngetewu seni lon awan, pwal mooch mi sarara a küwu seni.

⁹A tinenifeseni läng o feitiu. Kuchuchol ra nom fän pechen.

¹⁰A wawa eman kerop o äs, a müttir feito won pöükässin asepwäl.

¹¹A pwölüela ngeni inisin rochopwak, kuchu mi malul o uren koluk ra pwelifeili.

¹²Seni lon ewe saramaram mi nom mwan ütten fau me moochen ekkei ra towu o tinenifeseni ewe kuchuchol.

¹³Ewe Samol mi Lapalap a pwal apüngü chopulap lon läng, Ewe mi Unusen Tekia a aronga mwelian.

¹⁴A esefichala wokun kewe föün esefich o atoropasa chon oputan, a efifi ngeniir inefi o asürela.

¹⁵Mürin, epin matau a pwä, longolongun fanüfan a lingetä, lupwen ka apwüngü chon oputom o leüömong ngeniir fän om song, ai Samol mi Lapalap.

¹⁶Iwe, ewe Samol mi Lapalap a angetiu seni won ewe leni mi tekia o amwöchüei, a efieitä seni lon ekewe koluk mi alolol.

¹⁷A angasaei seni ekewe chon pälüeniei mi pöchökül, seni chokewe mi oputaei, pun ra kon pöchökül ngeniei.

¹⁸Iwe, ra münitiei lon ränin ai feiengau, nge ewe Samol mi Lapalap a tümwünüei.

¹⁹A alisiei lon ai feiengau o angasaei, pun a pwapwa rei.

²⁰Ewe Samol mi Lapalap a liwiniöchüei, pun üa föri mine a pwüng, a afeiöchüei, pun esap wor ai tipis.

²¹Üa aleasochisi än ewe Samol mi Lapalap kewe allük, nge üsap rik seni ai Kot ren och föför mi ngau.

²²Üa apwönüetä an kewe allük meinisin, nge üsap aleasolap ngeni an kewe pwüüng.

²³A silei pwe esap wor ai mwäl, pwe üa püsin tümwünüei seni tipis.

²⁴Iei mine ewe Samol mi Lapalap a liwiniöchüei, pun üa föri mine a pwüng, pun a silei pwe esap wor ai tipis.

²⁵Ai Samol mi Lapalap, ka allükülük ngeniir mi allükülük, ka pwal pwärätä om unusen pwüng ngeniir mi unusen pwüng.

²⁶Ka pwärätä om limelimöch ngeni ir mi limelimöch, nge ekewe mi pwor manauer ka pwärätä om pöchökül ngeniir.

²⁷Ka angasa aramas mi tipetekison, nge chokewe mi lamalamtekia ka atekisoneretiu.

²⁸Ai Samol mi Lapalap, ka asarama manauei, en ai Kot ka awili ai rochopwak ngeni saram.

²⁹Ewer, ren om alisiei üa tongeni fiu ngeni ekewe chon oputaei, ren en ai Kot üa tongeni mwet won eu tit.

³⁰Än Kot kewe föför ra unusen pwüng, än ewe Samol mi Lapalap kapasen pwon a let. I a usun chök tittin maun fän iten chokewe meinisin mi op ren.

³¹Ewe Samol mi Lapalap i chök Kot. Kot echök ach achau.

³²I ewe Kot mi apöchökülaei o anükünüköchü ai al.

³³A amüttiriei usun müttirin chia, a pwal aleniöchüei won ekewe leni mi tekia.

³⁴A asipa pei ngeni maun pwe üa tongeni pworefengeni efoch esefich seni piras.

³⁵Ka epeti seniei feiengau o amanauaei, poum a amwöchüei, nge om alilis a atekiaeitä.

³⁶Ka achölapa ewe al üa fetal won, pwe pechei esap mit.

³⁷Üa tapweri chon oputaei o liapeniir. Üsap kulsefäl seniir tori ra rosola.

³⁸Üa atururela pwe resap chüen tongeni ütä. Ra turula arun pechei.

³⁹Ka ngeniei pöchökül pwe üa tongeni maun, ka pwal akufu me mwei ekewe chon ü ngeniei.